បើទោះជាករណីជម្ងឺគ្រុនចាញ់នៅកម្ពុជា មានការកើនឡើងនៅក្នុងឆ្នាំ២០១៨កន្លងមកនេះ ក៏ប៉ុន្តែនៅក្នុងឆ្នាំ២០១៨ដដែលនេះ ពុំមានប្រជាពលរដ្ឋកម្ពុជាណាម្នាក់ បាត់បង់ជីវិតដោយសារជម្ងឺគ្រុនចាញ់នោះទេ !
រាជរដ្ឋាភិបាលកម្ពុជា ជានិច្ចកាលបានយកចិត្តទុកដាក់ខ្ពស់ និង ឧបត្ថម្ភគាំទ្រដល់ក្រសួងសុខាភិបាល ដើម្បីសុខភាពរបស់ប្រជាជន ជាពិសេសសការអនុវត្តឲ្យបានសម្រេច នូវផែនការយុទ្ធសាស្ត្រជាតិ លុបបំបាត់ជម្ងឺគ្រនចាញ់ ឆ្នាំ២០១១-២០២៥ និងភាពកាន់តែប្រសើរឡើងនូវស្ថានភាពជម្ងឺគ្រុនឈាម និង ជម្ងឺដង្កូវព្រូន ដោយបានចូលរួមវិនិយោគ និង គៀរគរជំនួយបន្ថែមពីអន្តរជាតិ និង ដៃគូអភិវឌ្ឍនានា ផងដែរ ។
ឯកឧត្តមសាស្ត្រាចារ្យ ម៉ម ប៊ុនហេង រដ្ឋមន្ត្រីក្រសួងសុខាភិបាល លើកឡើងយ៉ាងដូច្នេះ នាព្រឹកថ្ងៃទី២០ ខែកុម្ភៈ ឆ្នាំ២០១៨នៅខេត្តសៀមរាប ក្នុងឱកាសបើកសន្និបាតបូកសារុបការងារឆ្នាំ២០១៨ និងលើកទិសដៅបន្តឆ្នាំ២០១៩ របស់មជ្ឈមណ្ឌលជាតិ ប្រយុទ្ធនឹងជម្ងឺគ្រុនចាញ់ ប៉ារ៉ាស៊ីតសាស្ត្រ និង បាណកសាស្ត្រ ។
ព័ត៌មានជាតិ ថ្មីៗ
ឯកឧត្តមបញ្ជាក់ថា ៖ បើយោងតាមរបាយការណ៍ របស់មជ្ឈមណ្ឌលជាតិ ប្រយុទ្ធនិងជម្ងឺគ្រុនចាញ់ ប៉ារ៉ាស៊ីតសាស្ត្រ និង បាណកសាស្ត្រ ករណីគ្រុនចាញ់មានការកើនឡើងនៅក្នុងឆ្នាំ២០១៨ បើធៀបទៅនឹងឆ្នាំ២០១៧ ក៏ប៉ុន្តែមានការថយចុះករណីស្លាប់ ពីម្នាក់នៅឆ្នាំ២០១៧ មកសូន្យនាក់ក្នុងឆ្នាំ២០១៨ ដែលអាចនិយាយបានថា យើងសម្រេចបានជោគជ័យ ៣ឆ្នាំ មុនគោលដៅគ្រោងទុក ដែលគោលដៅនោះកំណត់ថា ឆ្នាំ២០២០គ្មានអ្នកស្លាប់ដោយជម្ងឺគ្រុនចាញ់ ដែលភាសាជំនាញគេនិយាយថា គោលដៅ ០ នៅក្នុងឆ្នាំ២០២០ ។
ឯកឧត្តមរដ្ឋមន្ត្រី ក៏បានលើកឡើងផងដែរអំពីជម្ងឺគ្រុនឈាម ។ ដោយយោងតាមទិន្នន័យបឋម ក្នុងអំឡុងពេល៣៧សប្តាហ៍ដំបូងក្នុងឆ្នាំ២០១៨ គេសង្កេតឃើញថាករណីគ្រុនឈាមកើនឡើងជាង៣ដង បើធៀបទៅនឹងចំនួនករណី៏នៅក្នុងឆ្នាំ២០១៧ដែលមាន ៦ ៣៧២ករណី ។ ដោយឡែក កម្មវិធីប្រយុទ្ធនឹងជម្ងឺដង្កូវព្រូនបានសិក្សាស្រាវជ្រាវនិងប្រមូលទិន្នន័យជម្ងឺព្រូនថ្លើម នៅក្នុងភូមិសង្ស័យមួយចំនួន ដូចជានៅខេត្តស្ទឹងត្រែង ក្រចេះ កំពង់ចាម ព្រៃវែង ព្រះវិហារ កណ្តាល កំពង់ឆ្នាំង ពោធិសាត់ និង ខេត្តបាត់ដំបង បានរកឃើញថា អត្រាប្រេវ៉ាឡង់នៅក្នុងខេត្តនីមួយៗមានភាពខុសគ្នា ចន្លោះពី ០.៥% ទៅ ៥.៦៩% ។
នៅក្នុងអង្គសន្និបាតនោះ រដ្ឋមន្ត្រីក្រសួងសុខាភិបាល ( ឯកឧត្តម ម៉ម ប៊ុនហេង ) បង្ហាញជំនឿមុតមាំថា ៖ ម្ចាស់ជំនួយ និង ដៃគូទាំងអស់ នឹងបន្តជួយដល់មជ្ឈមណ្ឌលជាតិ ប្រយុទ្ធនឹងជម្ងឺគ្រុនចាញ់ ប៉ារ៉ាស៊ីតសាស្ត្រ និង បាណកសាស្ត្រ ធ្វើកិច្ចសហប្រតិបត្តិការ ដើម្បីបន្តកាត់បន្ថយអត្រាឈឺ និងស្លាប់ដោយជម្ងឺគ្រុនចាញ់ ជម្ងឺគ្រុនឈាម ជម្ងឺដង្កូវព្រូន ដែលជាពិសេសគឺទិសដៅ ឈានទៅរកការលុបបំបាត់ ជម្ងឺគ្រុនចាញ់ទាំងស្រុងនៅឆ្នាំ២០២៥ ខាងមុខ ៕
អត្ថបទ និង រូបភាព: ងិន គឹមឡេង
