នៅសាលសន្និសិទ នៃសណ្ឋាគារ សុខាសៀមរាប នាព្រឹកថ្ងៃទី២០ ខែកម្ភះ ឆ្នាំ២០១៩នេះ មានធ្វើអង្គសិក្ខា សាលាស្តីពី កាតព្វកិច្ចពន្ធលើប្រាក់ចំណូលនិងប្រព័ន្ធគ្រប់គ្រងការបង្វិលសងអាករលើតម្លៃបន្ថែមតាមអនឡាញ ក្រោមអធិបតីភាពរបស់ឯកឧត្តម គង់ វិបុល ប្រតិភូរាជរដ្ឋាភិបាល ទទួលបន្ទុកជាអគ្គនាយកនៃអគ្គនាយកដ្ឋានពន្ធដារ និង ឯកឧត្តម ទៀ សីហា អភិបាល នៃគណៈអភិបាលខេត្តសៀមរាប ដោយមានការអញ្ជើញចូលរួមពី សំណាក់ឯកឧត្តម លោកឧកញ៉ា លោក លោកស្រីជាមន្ត្រីសាខាពន្ធដារ មកពីបណ្តារាជធានី ខេត្ត ពាណិជ្ជករ អាជីវករ និង បណ្តាក្រុមហ៊ុន សហគ្រាសក្នុងខេត្ត ប្រមាណជាង៧០០ នាក់។
ក្នុងកិច្ចស្វាគមន៍របស់ លោក ចៅ ម៉ៅមុន្នី ប្រធានសាខាពន្ធដារខេត្តសៀមរាប បានគូសបញ្ជាក់ថា អង្គសិក្ខាសាលានេះ ធ្វើឡើង ក្នុងគោលបំណងវាស់ស្ទង់ពីការយល់ដឹងរបស់ក្រុមហ៊ុន ដើម្បីធានាការបំពេញកាតព្វកិច្ចសារពើពន្ធ ឲ្យបានត្រឹមត្រូវតាម ច្បាប់ និង បទប្បញ្ញត្តិ ស្តីពីពន្ធដារ ដើម្បីជាមូលដ្ឋានឲ្យអគ្គនាយកដ្ឋានពន្ធដារ ផ្តល់ជាវគ្គបណ្តុះ បណ្តាលជាក្រុម ឲ្យចំគោលដៅ ។
មានប្រសាសន៍នោះដែរឯកឧត្តម ទៀ សីហា ក៏បានលើកឡើងថា សិក្ខាសាលាដ៏មានសារៈសំខាន់នេះ ក្នុងបំណងផ្សព្វផ្សាយ អំពីកាតព្វកិច្ចសារពើពន្ធ ក៏ដូចជាយន្តការថ្មីៗ ដែលដាក់ចេញដោយក្រសួងសេដ្ឋកិច្ចនិងហិរញ្ញវត្ថុ ជូន សិក្ខាកាមទាំងអស់ បានជ្រាប និងចូលរួមអនុវត្តប្រកបដោយប្រសិទ្ធភាព និងស្មារតីទទួលខុសត្រូវ ចំពោះធុរៈជនប្រកបអាជីវកម្មនៅក្នុងខេត្តសៀមរាប ។
ឯកឧត្តមក៏បានធ្វើការអំពាវនាវដល់បងប្អូនដែលប្រកបអាជីវកម្ម សូមចូលរួមក្នុងការបំពេញកាតព្វកិច្ចសារពើពន្ធ និង បង់ពន្ធទាំងអស់គ្នា ឲ្យបាន ខ្ជាប់ខ្ជួន ។ ខណៈដែលរាជរដ្ឋាភិបាលបាន និងកំពុងខិតខំប្រឹងប្រែងយ៉ាងខ្លាំងក្លា ក្នុងកិច្ចការអភិវឌ្ឍប្រទេសជាតិ យើងទាំងអស់គ្នាត្រូវចូលរួមគាំទ្រនិងលើកស្ទួយតាមរយៈការបង់ពន្ធនេះ ។
ក្នុងឱកាសនោះដែរឯកឧត្តម គង់ វិបុល ក៏បានលើកនូវគន្លឹះល្អៗមួយចំនួន ដោយគូសបញ្ជាក់ថា ប្រជាពលរដ្ឋមានការ សប្បាយចិត្តក្នុងការរួមចំណែកក្នុងការបង់ពន្ធ ហើយចំណូលពន្ធដារ គឺជាចំណូលមួយ ដូចជាឈាមនៅក្នុងសរីរាង្គមនុស្សយើង ដូច្នេះថវិកាជាតិដែលមានសព្វថ្ងៃនេះ ភាគច្រើនបានមកពីការបង់ពន្ធរបស់ប្រជាពលរដ្ឋជូនថវិកាជាតិ ។
ឯកឧត្តមបានបន្តទៀតថា ក្នុងរយៈពេល៥ឆ្នាំកន្លងមកនេះ លើការងារកំណែទម្រង់ និង ការអនុវត្តរបស់រាជរដ្ឋាភិបាលអាណត្តិទី៥ នៃរដ្ឋសភា ក្រសួងសេដ្ឋកិច្ច និងហិរញ្ញវត្ថុ បានយកចិត្តទុកដាក់ ទៅលើយុទ្ធសាស្ត្រចតុកោណដំណាក់កាលទី៣ របស់រាជរដ្ឋាភិបាល និង យុទ្ធសាស្ត្រស្នូល គឺការ ពង្រឹងនូវអភិបាលកិច្ចល្អ ។ ដើម្បីឈានឲ្យអ្នកជាប់ពន្ធ បង់ពន្ធ ដោយមានជំនឿទុកចិត្តមកលើអគ្គនាយកដ្ឋានពន្ធដារ ក៏ដូចជារាជ រដ្ឋាភិបាល ដោយបានយុកយុទ្ធសាស្ត្រស្នូល មកធ្វើការកំណែទម្រង់នៅអង្គភាពពន្ធដារ ។
ដោយផ្អែកលើយុទ្ធសាស្ត្រចតុកោណ ដំណាក់កាលទី៣ នៃរាជរដ្ឋាភិបាល នៃអាណត្តិទី៥ នៃរដ្ឋសភា ក្រសួងបានរៀបចំនូវកម្មវិធីកំណែទម្រង់ប្រព័ន្ធហិរញ្ញវត្ថុសាធារណៈ ដោយផ្តោតទៅលើប្រព័ន្ធហិរញ្ញវត្ថុសាធារណៈនេះ អគ្គនាយកដ្ឋានពន្ធដារ សុំទៅក្រសួងសេដ្ឋកិច្ច និង ហិរញ្ញវត្ថុ និង រាជរដ្ឋាភិបាល ពិនិត្យ សម្រេច ទៅលើយុទ្ធសាស្ត្រក្នុងការកៀងគរចំណូល ព្រមទាំងរៀបចំនូវគោលនយោបាយ និង រដ្ឋបាលសារពើពន្ធ របស់អគ្គ នាយកដ្ឋានពន្ធដារ និង យុទ្ធសាស្ត្រផែនការមួយចំនួន ដើម្បីឲ្យបានសមស្របទៅនឹងគោលនយោបាយរបស់រាជរដ្ឋាភិបាល ដោយ យោងតាមយុទ្ធសាស្ត្រកៀងគរចំណូល និង កម្មវិធីកំណែទម្រង់ប្រព័ន្ធហិរញ្ញវត្ថុសាធារណៈ ។
ក្នុងនោះដែរឯកឧត្តមអគ្គនាយក ក៏បានលើកនូវគន្លឹះសំខាន់ៗជាគោលមួយចំនួន នៃយុទ្ធសាស្ត្រកៀងគរចំណូល ចំនួន៥ចំណុច នៃការកំណែទម្រង់របស់ពន្ធដារ ដែល ជាផែនការយុទ្ធសាស្ត្រ និង ផែនការប្រតិបត្តិរបស់ពន្ធដារ គឺមានមុខងារស្នូលចំនួន៥ លើការពង្រឹង និងកែលម្អរក្នុងការចុះបញ្ជីអ្នក ជាប់ពន្ធឲ្យបានល្អ , ការពង្រឹងផ្តល់សេវាអ្នកជាប់ពន្ធឲ្យបានល្អ , ការរៀបចំកែលម្អរនៃការចាត់ចែងសេចក្តីប្រកាសបង់ពន្ធ ឲ្យអ្នកជាប់ពន្ធឲ្យបានល្អប្រសើរ និង រៀបចំកែលម្អរការធ្វើវិសោទនកម្មឲ្យបានល្អ ព្រមទាំងពង្រឹងការអនុវត្តច្បាប់ និង ពង្រឹងវប្បធម៌នៃការ បង់ពន្ធ ។
ម្យ៉ាងទៀតស្នូលមួយទៀត លើការប្រមូលបំណុល និង បណ្តឹងតវ៉ា ព្រមទាំងផែនការយុទ្ធសាស្ត្រមុខងារគាំទ្រ ការពង្រឹង ការគ្រប់គ្រងរចនាសម្ព័ន្ធ និង បណ្តុះបណ្តាលធនធានមនុស្ស និង ត្រូវធ្វើការកែលម្អររចនាសម្ព័ន្ធពន្ធដាររបស់ខ្លួន ដែលជាកត្តាសំខាន់នៃកំណែទម្រង់នោះ គឺការដាក់ឲ្យប្រើប្រាស់ និង អនុវត្តនូវប្រព័ន្ធព័ត៌មានវិទ្យា ដែលជាជំនួយដ៏ល្អលើការងារពន្ធដារ ។
ឯកឧត្តមក៏បានគូសបញ្ជាក់ថា អង្គសិក្ខាសាលានេះ គែជាការចែករំលែកនូវចំណេះដឹង និង បទពិសោធន៍ល្អៗ ដល់បងប្អូនជាពាណិជ្ជករ អាជីវករជាតិ អន្តរជាតិ និង បណ្តាក្រុមហ៊ុន សហគ្រាស ។
ឯកឧត្តមក៏បានធ្វើការផ្តាំផ្ញើដល់អង្គសិក្ខាសាលាទាំងមូល សំខាន់មន្ត្រីសាខាពន្ធដារមកពីរាជធានី ខេត្ត បានទទួលចំណេះដឹងទាំងនេះ យកទៅធ្វើការផ្សព្វផ្សាយបន្តដល់អ្នកជាប់ពន្ធ នៅក្នុង មូលដ្ឋានរបស់ខ្លួនផងដែរ ៕
រូបភាព និងអត្ថបទ: គឿន វេត
