យោងតាមព័ត៌មានដែលផ្សាយនៅក្នុងទំព័រហ្វេសប៊ុកផ្លូការរបស់អាជ្ញាធរជាតិអប្សរាបង្ហាញថា នៅឆ្នាំនេះតំបន់អង្គរអាចប្រឈមបញ្ហាកង្វះទឹកក្នុងរដូវប្រាំងខាងមុខ។ ការសន្និដ្ឋាននេះ ធ្វើឡើងបន្ទាប់ពីមន្ត្រីជំនាញនៃនាយកដ្ឋានគ្រប់គ្រងទឹករបស់អាជ្ញាធរជាតិអប្សរា បានធ្វើការសង្កេតពីបរិមាណទឹកក្នុងកសិន្ធុអង្គរវត្ត ក្រុងអង្គរធំ បារាយណ៍ខាងជើង ដែលកំពុងប្រឈមនឹងការខ្វះខាតខ្លាំងនារដូវប្រាំងខាងមុខ។
លោក ភឿន សុឃីម អនុប្រធាននាយកដ្ឋានគ្រប់គ្រងទឹក បានឱ្យដឹងពីមូលហេតុនៃការខ្វះខាតទឹកដើម្បីបញ្ជូលក្នុងកសិន្ធុប្រាសាទអង្គរវត្ត ក្រុងអង្គរធំ និងបារាយណ៍ខាងជើងនេះ គឺដោយសារនាយដ្ឋានទឹកបានបើកទ្វារទឹក ដើម្បីបញ្ជូលទឹកទៅស្ទឹងព្រះស្រុក សម្រាប់ស្រោចស្រពស្រែប្រជាពលរដ្ឋចំនួន៣០០ហិចតាចំនួនពីរលើក គឺលើកទី១រយៈពេលពីរសប្តាហ៍ និងលើកទី២រយៈពេលមួយសប្តាហ៍ចេញពីប្រឡាយស្តុកទឹកបម្រុងសម្រាប់បញ្ជូលទៅក្នុងបារាយណ៍ខាងជើង កសិន្ធុក្រុងអង្គរធំ កសិន្ធុប្រាសាទអង្គរវត្ត។
លោកបន្ថែមថា បច្ចុប្បន្នប្រឡាយស្តុកទឹកបម្រុងក៏ពុំមានទឹកដែរ ដោយសារបរិមាណទឹកស្ទឹងសៀមរាប ដែលហូរពីភ្នំគូលែនតិចតួចពេក ហើយ ក្រុមការងារក៏បានចែកទឹកមួយផ្នែកមកក្រុងសៀមរាបផងដែរ។
លោកបញ្ជាក់ថា បើធៀបនឹងឆ្នាំមុន កម្ពស់ទឹកបច្ចុប្បន្ននៅបារាយណ៍ខាងជើងមានកម្រិតទាបជាង០,៨ម៉ែត្រ ប្រហែលជា២,៦លានម៉ែត្រគូប កសិន្ធុក្រុងអង្គរធំទាបជាង០,៩៣ម៉ែត្រ ប្រហែល ៦៥ម៉ឺនម៉ែត្រគូប និងកសិន្ធុប្រាសាទអង្គរវត្តទាបជាង០,៤ម៉ែត្រ ប្រហែល ៣៨ម៉ឺនម៉ែត្រគូប។ សរុបគឺតំបន់អង្គរទាំងមូលបាត់បង់ទឹកប្រមា ៣,៦៣លានម៉ែត្រគូប ដែលនេះជាចំណុចក្រុមការងារត្រូវយកចិត្តទុកដាក់ខ្ពស់ក្នុងការរក្សាទឹកក្នុងអាងស្តុកទឹកទាំងនេះ ដើម្បីធានាក្នុងការគ្រប់គ្រងទឹក ក៏ដូចជាការអភិរក្សប្រាសាទផងដែរ។
ទាក់ទងនឹងការងារគ្រប់គ្រងទឹកនេះដែរ បច្ចុប្បន្នក្រុមការងារ កំពុងមមាញឹកក្នុងការស្តារប្រឡាយនិងបិទទ្វារទឹកពីស្ទឹងសៀមរាប ដើម្បីបញ្ជូលទឹកទៅក្នុងកសិន្ធុក្រុងអង្គរធំ ប្រាសាទអង្គរវត្ត ជៀសវាងរីងស្ងួតនាពេលខាងមុខនេះ។ ក្នុងនោះដែរ អាជ្ញាធរជាតិអប្សរា ក៏សូមអំពាវនាវដល់ប្រជាពលរដ្ឋដែលបានបិទទំនប់កាត់ប្រឡាយស្ទាក់ទឹកសម្រាប់ទុកប្រើប្រាស់ សូមបើកឡើងវិញ ដើម្បីកុំឱ្យមានការលំបាកដល់ការបញ្ជូលទឹកទៅក្នុងកសិន្ធុប្រាសាទនៅក្នុងតំបន់អង្គរ៕
អត្ថបទ និង រូបភាព: ម៉ាត់ អារីហ្វីន
