ក្រុមប្រតិបត្ដិករទេសចរណ៍ សម្រេចជាផ្លូវការ ការរៀបចំជំនួបពាណិជ្ជកកម្មរវាងអ្នកទិញ និងអ្នកលក់ផ្នែកវិស័យទេសចរណ៍ដ៏ធំមួយ នៅខេត្ដសៀមរាប និងនៅរាជធានីភ្នំពេញ នៅក្នុងខែមេសាឆ្នាំ២០១៩ខាងមុខនេះ ដើម្បីទាក់ទាញអ្នឲកទេសចរណ៍បរទេសមកទស្សនាប្រទេសកម្ពុជាកាន់តែច្រើនបន្ថែមទៀត។
ប្រធានសមាគមទេសចរណ៍អាស៊ីប៉ាស៊ីហ្វិក ហៅកាត់ថា ប៉ាតា (PATA) លោក ធួន ស៊ីណាន បានឲ្យដឹងថា នៅក្នុងពិធីប្រកាសជាផ្លូវការនៃ គម្រោងរៀបចំជំនួបពាណិជ្ជកម្មទេសចរណ៍ លើកទី២ ដែលធ្វើឡើងនៅខេត្ដសៀមរាប កាលពីយប់ថ្ងៃទី១៩ ខែកុម្ភៈ ឆ្នាំ២០១៩ថា ជំនួបពាណិជ្ជកម្មទេសចរណ៍នេះ នឹងមានអ្នកចូលរួមមកពីជាង៨០ប្រទេស នៅលើពិភពលោក ពួកគេសុទ្ធតែជាអ្នកលក់ និងអ្នកទិញ ក្នុងវិស័យទេសចរណ៍ ។
លោកថា តាមគម្រោងជំនួបនេះ នឹងធ្វើនៅខេត្តសៀមរាបនៅថ្ងៃទី២៤ខែមេសាឆ្នាំ២០១៩ ចំណែករាជធានីភ្នំពេញធ្វើឡើងនៅថ្ងៃទី២៧ខែមេសា ឆ្នាំ២០១៩។ ការធ្វើពិពណ៌ពាណិជ្ជកម្មទេសចរណ៍កម្ពុជាអន្ដរជាតិនេះ ដើម្បីទាក់ទាញ និងស្វែងរកភ្ញៀវទេសចរណ៍មកកាន់កម្ពុជាកាន់តែច្រើនឡើងថែមទៀត។
គម្រោងនេះធ្វើឡើងនៅក្នុងកិច្ចពិភាក្សាយោបល់ ជាមួយប្រតិបត្ដិករទេសចរណ៍មកពីតាមបណ្ដាម្ចាស់សណ្ឋាគារ ផ្ទះសំណាក់ និងក្រុមហ៊ុនទេសចរណ៍ ដោយបានសហការជាមួយ សហព័ន្ធទេសសចរណ៍ និងប្រតិបត្ដិទេសចរណ៍គ្រប់វិស័យនៅកម្ពុជាផងដែរ ។
លោកធួន ស៊ីណាន ក៏បានលើកទឹកចិត្តដល់ក្រុមប្រតិបត្ដិករទេសចរណ៍ទាំងអស់នៅកម្ពុជា ចូលរួមនៅក្នុងពិពណ៌ពាណិជ្ជកម្មកម្ពុជាអន្ដរជាតិនេះ ដែលលោកថា នេះជាលើកទី២ហើយនៅប្រទេសកម្ពុជា។
ដោយឡែក ក្រុមប្រតិបត្តិករទេសចរណ៍បានលើកឡើងដូចៗគ្នាថា ពួកគេបានគាំទ្រចំពោះការធ្វើជំនួបពាណិជ្ជកម្មទេសចរណ៍នេះ ព្រោះការធ្វើកន្លងមក បានទទួលជោគជ័យ ដែលមានកំណើនភ្ញៀវទេសចរណ៍ មកកាន់ប្រទេសកម្ពុជាកាន់តែច្រើនជាបន្ដបន្ទាប់។
ពួកគាត់បានបន្ដថា ចាប់ពីខែមេសាទៅជារដូវកាលមិនសូវសំបូរភ្ញៀវ ដូច្នេះក្រុមអ្នកប្រតិបត្ដិករទេសចរណ៍ រូមគ្នា ស្វែងរកភ្ញៀវទេសចរឲ្យស្គាល់ប្រទេសកម្ពុជា ជាពិសេសប្រាសាទអង្គរវត្ដឲ្យកាន់តែច្រើន ។
កម្ពុជាបានព្យាករណ៍ថា ក្នុងឆ្នាំ២០២០ កម្ពុជានឹងទទួលបាន ភ្ញៀវទេសចរអន្តរជាតិសរុប ៧លាននាក់ ក្នុងនោះទេសចរចិនបាន ៣លាននាក់ ហើយនៅឆ្នាំ២០២៥ ទទួលទេសចរចិនបាន ៥លាននាក់ ក្នុងចំនួនទេសចរសរុប១១លាននាក់ និងឆ្នាំ២០៣០ ទទួលទេសចរចិនបាន ៨លាននាក់ ក្នុងចំនួនទេសចរសរុប ១៥លាននាក់។
យោងតាមរបាយការណ៍ប្រចាំឆ្នាំរបស់ក្រសួងទេសចរណ៍បានឲ្យដឹងថា កម្ពុជាទទួលបានភ្ញៀវទេសចរអន្តរជាតិសរុប ៦.២លាននាក់ ក្នុងឆ្នាំ២០១៨។ ចំនួននេះ បានកើនឡើង១១ភាគរយ បើធៀបនឹងឆ្នាំ២០១៧ ដែលមានប្រមាណ៥.៦លាននាក់។ ចំនួននេះដែរ ទេសចរចិនឈរក្នុងលំដាប់ទីមួយ ដោយមានចំនួនប្រមាណ ២លាននាក់ កើនឡើង៧០ភាគរយ ធៀបនឹងឆ្នាំ២០១៧ និងមានក្រុមហ៊ុនចំនួន១២ ហោះហើរត្រង់ពីចិនមកកម្ពុជា សរុប១៥០៤ជើង នៃ១២ក្រុមហ៊ុន។
អត្ថបទ និងអត្ថបទ៖ លោក ជា ស្រស់ , លោក ខេង ឧត្តម
សម្រួលអត្ថបទ÷ សេង ផល្លី
