សមត្ថកិច្ចនគរបាលខេត្តសៀមរាប បានឲ្យដឹងថា ជនជាតិបារាំងម្នាក់ ឈ្មោះ GUBRI PIERRE LEON MAURICE ភេទ ប្រុស កើតថ្ងៃទី ៣០ ខែវិច្ឆិកា ឆ្នាំ១៩៣៤ កាន់លិខិតឆ្លងដែនលេខ ១៧DI១៧៩៦០ ជាជនចូលនិវត្តន៍ បានដេកស្លាប់នៅក្នុង បន្ទប់ផ្ទះជួលមួយកន្លែង ស្ថិតក្នុងភូមិ វិហារចិន សង្កាត់ ស្វាយដង្គំ ក្រុង/ខេត្តសៀមរាប នាវេលាម៉ោង២១ និង៣០នាទី ថ្ងៃទី ១៩ ខែ កុម្ភៈ ឆ្នាំ ២០១៩។
សមត្ថកិច្ចនគរបាលបានឲ្យដឹងទៀតថា តាមការសាកសួរបំភ្លឺពីប្រពន្ធជនរងគ្រោះបានឲ្យដឹងថា ជនរងគ្រោះមានជំងឺប្រចាំកាយជាយូរមកហើយដោយដេកនៅតែលើគ្រែមិនអាចដើរបានឡើយ ហើយយប់ថ្ងៃទី ១៩ ខែកុម្ភៈ ឆ្នាំ២០១៩ ដោយស្ថានភាពជំងឺរបស់គាត់កាន់តែធ្ងន់ធ្ងរ គាត់ក៍បានស្លាប់នៅវេលាម៉ោងប្រហែល ២១ និង៣០នាទី ។
សមត្ថកិច្ចនគរបាលបានឲ្យដឹងបន្ថែមទៀតថា តាមការពិនិត្យសាកសពនៅលើខ្លួនសព ពុំមានស្លាកស្នាម និងកំណត់សំគាល់អ្វីដែលទាក់ទងទៅនឹងករណីឃាតកម្មឡើយ ហើយការសន្និដ្ឋានពីលោកវេជ្ជបណ្ឌិត អ៊ិត ឆបឆរ័ត្ន គ្រូពេទ្យអមតុលាការខេត្តក៏បានឲ្យដឹងថា ជនរងគ្រោះពិតជាបានស្លាប់ដោយសារជំងឺមហារីកសួតពិតប្រាកដមែន ហើយសាកសពត្រូវបានបញ្ជូនទៅតម្កល់ទុកបណ្តោះអាសន្ននៅមន្ទីរពេទ្យអន្តរជាតិរ៉ូយ៉ាល់អង្គរ ដើម្បីរង់ចាំក្រុមគ្រួសារមកទទួលយក។
អត្ថបទ និង រូបថត ៖ លោក ថាច់ ពិសុទ្ធ
កែសម្រួលអត្ថបទ ៖ អ៊ុន ណារាជ្យ
