ព្រឹកមិញនេះ មានករណីគ្រោះថ្នាក់ចរាចរណ៍មួយរវាងម៉ូតូ និងម៉ូតូ នៅលើកំណាត់ផ្លូវជាតិជាតិ៦ ត្រង់ចំណុច មុខសាលារៀន បឋមសិក្សា សម្តេចក្រុមព្រះនរោត្តមរណរិទ្ធ ក្នុងភូមិទឹកថ្លា ឃុំខ្នាត ស្រុកពួក ខេត្តសៀមរាប បណ្ដាលឲ្យមនុស្សម្នាក់បានស្លាប់ និងមនុស្ស០៣នាក់ទៀតបានទទួលរងរបួសធ្ងន់ បើតាមការឲ្យដឹងពីលោកវរសេនីយ៍ឯក ទេព ពុំសែន អធិការនគរបាលស្រុកពួក។
លោកវរសេនីយ៍ឯកបានឲ្យដឹងទៀតថា ហេតុការណ៍នេះកើតឡើងនៅវេលាម៉ោង ០៦ និង៤០នាទីព្រឹក ថ្ងៃទី ២១ខែ កុម្ភះ ឆ្នាំ២០១៩ ដោយ ម៉ូតូមួយគ្រឿងម៉ាកហុងដាឌ្រីម ពណ៌ខ្មៅសេរី ២០១៤ ពាក់ផ្លាកលេខ បន្ទាយមានជ័យ 1I 46 43 បើកបរ ដោយឈ្មោះ យឺន ចាន់ថ្លា ភេទស្រី អាយុ២៧ឆ្នាំ រស់នៅភូមិចំបក់ហែរ ឃុំពួក ស្រុកពួក ខេត្តសៀមរាប របួសធ្ងន់ បានបើកបរផ្លូវត្រង់ ទិសដៅពីលិចទៅកើតបាន បុក ជាមួយ ម៉ូតូម៉ាកហុងដា ក្លិចសេរី ២០១៦ ពណ៌ស ពាក់ផ្លាកលេខសៀមរាប 1AD 16 42 បើកបរដោយ ឈ្មោះ ហូ ហាច ភេទប្រុសអាយុ៣០ឆ្នាំ (ត្រូវជាប្តីស្លាប់) រស់នៅភូមិបឹងខ្នារ ឃុំខ្នាត ស្រុកពួក ខេត្តសៀមរាប បើកបរទិសដៅ ពីកើតទៅលិច និង ដឹកមនុស្សចំនួន ២នាក់ គឺ ១. ឈ្មោះ សោម សុផល អាយុ៣១ឆ្នាំ ត្រូវជាប្រពន្ធ រងរបួសស្រាល ,ទី២. ឈ្មោះ ហូ វិចទ័រ ភេទប្រុស អាយុ៧ឆ្នាំ (កូន) រងរបួសស្រាល។ ហើយមូលហេតុដែលបង្កឲ្យមានករណីគ្រោះនេះ គឺដោយសារតែ អ្នកបើកបរម៉ូតូម៉ាកហុងដាក្លិច បត់ឆ្វេងមិនប្រយ័ត្ន បណ្ដាលឲ្យបុកគ្នាពេញទំហឹងតែម្ដង។
ក្រោយពីការពិនិត្យវាស់វែងរួច សមត្ថកិច្ចបានប្រគល់សពឲ្យក្រុមគ្រួរសារយកទៅធ្វើបុណ្យតាមប្រពៃណី ចំណែកអ្នករងរបួសទាំង០៣នាក់ ត្រូវបានកម្លាំងជំនាញហៅរថយន្តសង្គ្រោះបន្ទាន់មកដឹកយកទៅសង្គ្រោះ នៅមន្ទីរពេទ្យបង្អែកស្រុក រីឯម៉ូតូទាំង០២គ្រឿង ត្រូវបានយកមករក្សាទុក នៅអធិការនគរបាលស្រុក ដើម្បីចាត់ការទៅតាមផ្លូវច្បាប់នៅពេលក្រោយ។
អត្ថបទ និងរូបភាព៖ គឿន វ៉េត
កែសម្រួលអត្ថបទ៖ អ៊ុន ណារាជ្យ
