នៅថ្ងៃទី២១ ខែកុម្ភៈ ឆ្នាំ២០១៩នេះ លោក William Telliez ជាជនបារាំង ដែលបានមករស់នៅប្រទេសកម្ពុជា តាំងពីឆ្នាំ២០០១ និង ជាម្ចាស់ភោជនីយដ្ឋាន The Square 24 បានស្ម័គ្រចិត្តប្រគល់ភាជន៍បុរាណចំនួន២ ជូនដល់អាជ្ញាធរជាតិអប្សរា ក្រោយពីរក្សាទុកអស់រយៈពេល១៥ឆ្នាំកន្លងមក។
លោក William Telliez បានឱ្យដឹងថា ភាជន៍ទាំងពីរនេះ ត្រូវបានរកឃើញកាលពីឆ្នាំ២០០៤ ឬ២០០៥ ក្នុងជម្រៅដី៣ម៉ែត្រ កាលលោកឱ្យកម្មករជីកដីធ្វើបង្គន់នៅក្នុងសណ្ឋាគារបុប្ផាអង្គរ ហើយបានរក្សាទុករហូតដល់ឆ្នាំ២០១៩ ព្រោះមិនដឹងយកទៅប្រគល់អ្នកណាទើបមានសុវត្ថិភាព ប៉ុន្តែដោយបានឃើញការផ្សព្វផ្សាយពីការប្រគល់ភាជន៍ក្នុងតំបន់អង្គរ នៅតាមបណ្តាញសារព័ត៌មាន លោកក៏បានទាក់ទងទៅសាលាបារាំងចុងបូព៌ា ហើយគេក៏ណែនាំឱ្យទាក់ទងមកអាជ្ញាធរជាតិអប្សរា ។
លោក William Telliez បានឱ្យដឹងទៀតថា ការប្រគល់បុរាណវត្ថុទាំងពីរនោះ ទៅអាជ្ញាធរជាតិអប្សរានោះ ព្រោះភាជន៍ទាំងពីរនេះ គឺជាកម្មសិទ្ធិរបស់ខ្មែរ វាមានតម្លៃណាស់សម្រាប់ខ្មែរក្នុងការសិក្សាស្រាវជ្រាវ វាមិនមែនកម្មសិទ្ធិលោក ឬរបស់ឯកជនណាមួយទេ ហើយបើលោករក្សាទុកវាក៏គ្មានតម្លៃអ្វីដែរ ដូច្នេះលោករីករាយខ្លាំងណាស់បានរកអ្នករក្សាទុកភាជន៍នេះប្រកបដោយសុវត្ថិភាព និងមានប្រយោជន៍សម្រាប់ជាតិខ្មែរ ។
អ្នកស្រី សឹង ស្រីទូច បុគ្គលិកជំនាញកុលាលភាជន៍ខ្មែរ នៃមជ្ឈមណ្ឌលស្រាវជ្រាវអន្តរជាតិនិងតម្កល់ឯកសារអង្គរ បានឱ្យដឹងថា យើងនៅមិនទាន់អាចសន្និដ្ឋានបានថា ភាជន៍ទាំងពីរនេះមានប្រភពមកពីខាងណាឱ្យច្បាស់លាស់ទេ ព្រោះមិនដូចភាជន៍ខ្មែរ ប៉ុន្តែតាមការពិនិត្យមើលសាច់ដី ដោយប្រើកែវពង្រីក គឺជាភាជន៍បុរាណពិតប្រាកដ ប៉ុន្តែអាជ្ញាធរជាតិអប្សរា នឹងធ្វើការសម្អាត ហើយធ្វើការសិក្សាស្រាវជ្រាវបន្ថែម និងសួរព័ត៌មានពីអ្នកស្រាវជ្រាវផ្សេងៗទៀត ពីប្រភពនិងអាយុកាលរបស់ភាជន៍ទាំងពីរនាពេលបន្តទៅទៀត ៕
អត្ថបទ និង រូបថត ៖ លោក អ៊ិន សីហរិទ្ធ
កែសម្រួលអត្ថបទ ៖ លោក លីវ សាន្ត
