សិក្ខាសាលា ស្តីពីទម្លាប់ល្អទាំង ៧ ដ៏មានប្រសិទ្ធភាព សម្រាប់ថ្នាក់ដឹកនាំឆ្នើម ដែលរៀបចំដោយ ក្រសួងព័ត៌មាន សហការជាមួយ ក្រុមហ៊ុន វេសឡាញ អេ ខ្យូ ខេ សិន គ្រុប អិល ធី ឌី និង Franklin Covey បានប្រារព្ធបើកនៅព្រឹកថ្ងៃទី ២១ ខែ កុម្ភះ ឆ្នាំ ២០១៩ នាសាលប្រជុំទីស្តីការ ក្រសួង ព័ត៌មាន ក្រោមអធិបតី ភាព ឯ ឧ ខៀវ កាញារីទ្ធ រដ្ឋមន្ត្រី ក្រសួង ព័ត៌មាន។
នៅក្នុងឱកាសនៃអង្គសិក្ខាសាលានោះ លោក ប៉ិច បូឡែន អគ្គនាយក ក្រុមហ៊ុន វេសឡាញ អេ ខ្យូ ខេ សិន គ្រុប អិល ធី ឌី ដែលត្រូវបានអញ្ជើញ ជាវាគ្មិន បានឡើងធ្វើបទបង្ហាញជាបន្តបន្ទាប់ ទាក់ទងទៅនិង ទម្លាប់ល្អទាំង ៧ ដ៏មានប្រសិទ្ធភាព សម្រាប់ថ្នាក់ដឹកនាំឆ្នើម ដែលជាទម្លាប់ នៃការកសាង ផ្លាស់ ប្តូរ ផ្នត់គំនិតថ្មីៗ មិនមែនដូចជាការរៀន បូកលេខនោះទេ ហើយទម្លាប់ទាំង ៧ នេះ អាចយកទៅប្រើក្នុងការងារ ក៏បាន និងក្នុងគ្រួសារ បានដូចគ្នា ដើម្បីមាន ទម្លាប់ល្អនេះទាំងអស់ទើបអាចទៅរួច។ ទម្លាប់ល្អទាំង ៧ រួមមាន:
ទី១ មានភាពម្ចាស់ការ គឺទម្លាប់ទទួលខុសត្រូវលើខ្លួនឯង
ទី ២ គិតហើយសឹមគួរ ទម្លាប់បង្កើតអោយមាន ចក្ខុវិស័យផ្ទាល់ខ្លួន
ទី ៣ ធ្វើការងារសំខាន់មុន ទម្លាប់ គ្រប់គ្រងលើខ្លួនឯង
ទី ៤ គិតបែប ឈ្នះ ឈ្នះ ទម្លាប់គិត ដល់ផលប្រយោជន៏ ទាំងសងខាង
ទី ៥ ស្តាប់គេអោយយល់សិន មុននឹងអោយគេយល់ពីយើង ទម្លាប់ធ្វើទំនាក់ទំនង ដោយសុទ្ធចិត្ត
ទី ៦ សហការដើម្បីឧត្តមប្រយោជន៏ ទម្លាប់ សហការប្រកបដោយភាពឆ្នៃប្រឌិត
ទី ៧ បន្តអភិវឌ្ឍខ្លួន ទម្លាប់បន្តអភិវឌ្ឍ ខ្លួនជាប្រចាំ ។
ឯ ឧ រដ្ឋមន្ត្រី ខៀវ កាញារីទ្ធ មានប្រសាន៍លើកឡើងថា សិក្ខាសាលា នាឱកាសនេះគឺមានសារ:សំខាន់ណាស់ នៃការផ្លាស់ប្តូរទម្លាប់ ពិសេសក្នុងកិច្ច ការងារ ព្រោះពី ១ ឆ្នាំទៅ ១ ឆ្នាំ នៅក្នុងវិស័យបច្ចេកវិទ្យា មានការវិវត្តន៍លឿនណាស់ ហើយអោយយើងមានសំភារះគ្រប់គ្រាន់ទំនើបៗ ប៉ុន្តែបើយើង មានតែ សំភារះ តែមិនមានការផ្លាស់ប្តូរ កែប្រែទម្លាប់ ក្នុងការ ធ្វើការងារ លើការ គិត នោះទេ គឺគ្មានប្រយោជន៏អ្វីទេ។ ជាក់ស្តែងចំពោះអ្នកធ្វើការច្រើនម៉ោង និង អ្នកធ្វើការតិចម៉ោងជាង ជាលទ្ធផលបើគេមានភាពវៃឆ្លាត និងមានការជំនឿចិត្ត លើខ្លួន ហើយហ៊ានសម្រេចចិត្ត គឺទទួលបានលទ្ធផលច្រើនជាងអ្នកធ្វើការច្រើន ម៉ោង ហើយការសម្រេចចិត្តបានតិចជាង។
ឯ ឧ រដ្ឋមន្ត្រី បានលើកឡើងថា បច្ចុប្បន្ននេះ គឺជាសម័យប្រសិទ្ធភាព ការងារ មិនមែនគ្រាន់តែ មកបង្ហាញមុខ អង្គុយមួយកន្លែង នោះទេ បើនៅ ប្រទេសគេ មិនមែនធ្វើការតែក្នុង ការិយាល័យ នោះទេ នៅផ្ទះ និងកន្លែងផ្សេងៗ ក៏អាចធ្វើការបានដែរ ។
ឯ ឧ ខៀវ កាញារីទ្ធ បានលើកឡើងដែរថា ក្នុងជីវិតមនុស្សយើងម្នាក់ៗ គឺត្រូវចំណាយ ១ ភាគ ៣ សម្រាប់ការងារស្នូល ១ ភាគ ៣ រៀនសូត្រដោយខ្លួនឯង និង ១ ភាគ ៣ ទៀត សម្រាប់ សម្រាក លំហែ កាយ។ ដូច្នេះអ្វីដែលសំខាន់គឺការប្រឹងប្រែងរៀនសូត្រ ហើយការរៀន មិនមែនចេះភ្លាម និងជោគជ័យភ្លាមនោះទេ គឺបន្តិចម្តងៗ រហូតចេញបានជាគុណភាព ព្រោះបច្ចេកវិទ្យា មានការវិវត្តន៍លឿន ដែលទាមទារ អោយយើងចេះ ដុះខាត់ខ្លួនឯង ពិពេសការមានទំនាក់ទំនងល្អ ជាមួយគ្នា ទាំង កន្លែងធ្វើការ និងក្នុងសង្គម ។
ឆ្លៀតក្នុងឱកាសនោះ ឯ ឧ រដ្ឋមន្ត្រី បានថ្លែង ការ អរគុណចំពោះ លោក ប៉ិច បូឡែន ដែលបានចំណាយពេលវេលា ដ៏មាន តំលៃមកបង្ហាត់ បង្រៀន ដល់ថ្នាក់ដឹក់នាំ និងមន្ត្រីនៃ ក្រសួងព័ត៌មាន ដោយ មិនគិតថ្លៃ ទាក់ទងទៅនិងចំណេះដឹង ស្តីពីទម្លាប់ល្អទាំង ៧ ដ៏មានប្រសិទ្ធភាព សម្រាប់ថ្នាក់ដឹកនាំឆ្នើម ៕
អត្ថបទ និងរូបភាព: ក្រសួងព័ត៌មាន
