ប្រធានមជ្ឈមណ្ឌលជាតិ ប្រយុទ្ធនឹងជំងឺគ្រុនចាញ់ បានឲ្យដឹងថា កម្ពុជាសម្រេចបានជោគជ័យមុនកាលកំណត់ដល់ទៅ០៣ឆ្នាំ ក្នុងការបញ្ចប់លែងឲ្យមានមនុស្សស្លាប់ដោយសារជំងឺមួយនេះ។
មានប្រសាសន៍នៅក្នុងពិធីបើកសន្និបាតបូកសរុបការងារឆ្នាំ២០១៨ និងលើកទិសដៅការងារឆ្នាំ២០១៩ របស់មជ្ឈមណ្ឌលជាតិប្រយុទ្ធប្រឆាំងនឹងជំងឺគ្រុនចាញ់ ប៉ារ៉ាស៊ីតសាស្ត្រ និងបាណកសាស្ត្រ នាព្រឹកថ្ងៃទី២០ ខែកុម្ភៈ ឆ្នាំ២០១៩ នក្នុងក្រុងសៀមរាប លោកវេជ្ជបណ្ឌិត ហ៊ុយ រ៉េកុល ប្រធានមជ្ឈមណ្ឌលជាតិមួយនេះ បានលើកឡើងថា កាលពីឆ្នាំ២០១៧កន្លងទៅ មានមនុស្សតែម្នាក់ប៉ុណ្ណោះ បានស្លាប់ដោយសារជំងឺគ្រុនចាញ់ ក្នុងចំណោមអ្នកជំងឺចំនួន៤៥,៩៩១ករណី។ ហើយនៅឆ្នាំ២០១៨ ចំនួនអ្នកកើតជំងឺគ្រុនចាញ់មានចំនួនកើនឡើង រហូតដល់ទៅ៦៥,១១៥ករណី ប៉ុន្តែមិនមានអ្នកស្លាប់ដោយសារជំងឺនេះឡើយ។
លោកវេជ្ជបណ្ឌិតបានពន្យល់ថា ការមិនមានអ្នកស្លាប់នេះ ដោយសារតែឆ្នាំ២០១៨ ជំងឺគ្រុនចាញ់ប្រភេទធ្ងន់មានការថយចុះខ្លាំង ដែលមកនៅត្រឹមតែ២៧,៦ភាគរយប៉ុណ្ណោះ ប៉ុន្តែវាបានកើនឡើងនូវជំងឺគ្រុនចាញ់ប្រភេទ។
តាមគោលដៅគ្រោងទុក កម្ពុជា បានកំណត់ថា នៅឆ្នាំ២០២០ នឹងលែងឲ្យមានអ្នកស្លាប់ដោយសារជំងឺគ្រុនចាញ់។
យោងតាមរបាយការណ៍របស់មជ្ឈមណ្ឌលជាតិប្រយុទ្ធប្រឆាំងនឹងជំងឺគ្រុនចាញ់ ប៉ារ៉ាស៊ីតសាស្ត្រ និងបាណកសាស្ត្រ បានបង្ហាញថា ឆ្នាំ២០១៨ ជំងឺគ្រុនចាញ់បានកើតជាប្រចាំនៅតាមតំបន់ខ្លះនៃ២១ខេត្ត ហើយមានកំណើនខ្ពស់ក្នុងអំឡុងខែមិថុនា ដល់ខែកក្កដា។ របាយការណ៍បង្ហាញថា ក្នុងចំណោមខេត្តទាំងនោះ មានខេត្តចំនួន៧ រួមមាន៖ ខេត្តពោធិសាត់ កំពង់ស្ពឺ មណ្ឌលគិរី ស្ទឹងត្រែង ព្រះវិហារ ក្រចេះ និងខេត្តរតនគីរី មានករណីជំងឺគ្រុនចាញ់កើតឡើងច្រើនរហូតដល់ទៅ៧៨ភាគរយនៃជំងឺគ្រុនចាញ់ទូទាំងប្រទេស៕
អត្ថបទ៖ ជា ស្រស់, រូបភាព៖ ខេង ឧត្តម
កែសម្រួល៖សេង ផល្លី
