ក្នុងឱកាសដែលបងប្អូនប្រជាពលរដ្ឋខ្មែរ ជាពុទ្ធបរិស័ទ្ធនៅទូទាំងប្រទស ប្រារព្ធពិធី បុណ្យ មាឃបូជា ជាឱកាសឆ្នាំនេះ ឯកឧត្តមខៀវ កាញារទ្ធី រដ្ឋមន្ត្រី ក្រសួងព័ត៌មាន និងលោក ជំទាវ រួមជាមួយថ្នាក់ដឹកនាំ មន្ត្រីរាជការ ក្រសួង ព៏ត៌មាន ព្រមទាំងលោកយាយ សីលវត្តី ពេន យុត ប្រធានសីលវត្តី វត្តស្វាយដង្គុំ បានប្រារព្ធរៀបចំពិធីបុណ្យ មាឃបូជា នៅរសៀល ថ្ងៃអង្គារ ១៥កើត ខែមាឃ ឆ្នាំច សំរិទ្ធិស័ក ព.ស២៥៦២ ត្រូវនឹងថ្ងៃទី១៩ ខែកុម្ភៈ ឆ្នាំ២០១៩ នាទីអារាម វត្ត មង្គលវ័ន ហៅ ស្វាយដង្គុំ ស្ថិតក្នុង សង្កាត់ មនោរម្យ ខណ្ឌ ៧ មករា រាជធានី ភ្នំពេញ ។
តាមឯកសារ បានអោយដឹងថា ពិធីបុណ្យមាឃបូជា ប្រារព្ធឡើង ដើម្បីរំលឹកដល់ថៃ្ង ដែល ព្រះសម្មា សម្ពុទ្ធ ទ្រង់ប្រកាសបង្កើតព្រះពុទ្ធសាសនាឡើង ក្នុងលោក នាប្រទេសឥណ្ឌា កាល ពី ៥៨៨ ឆ្នាំ មុនគ្រិស្តសករាជ នាថៃ្ង ១៥ កើត ខែមាឃ ក្រោយពីការត្រាស់ ដឹងរបស់ ព្រះអង្គចំនួន ៩ ខែគត់ ។
ការបង្កើត ព្រះពុទ្ធសាសនា ក្នុងឋានៈ ជាអង្គការសាសនាមួយនេះ ធ្វើឡើងនៅក្នុង ចំណោម ព្រះសង្ឃចំនួន ១ ២៥០ អង្គ ជាសមាជិកក្នុងអង្គ មហាសន្និបាតមួយ ដែលបាននិមន្ត មកពីគ្រប់ស្រទាប់វណ្ណៈទាំងអស់។ នៅក្នុងមហាសន្និបាតនោះ ព្រះសម្មា សម្ពុទ្ធ ទ្រង់បាន ប្រកាសនៅគោលការណ៍ចំនួន ១១ សម្រាប់ឲ្យ សមាជិកមហាសន្និបាតទាំងអស់ កាន់យកជា វិថីជីវិត និងសម្រាប់យកទៅផ្សព្វផ្សាយ ដល់ជនដ៏ទៃទៀតឲ្យបានយល់ ពី ពុទ្ធ សាសនា។
ការប្រារព្ធពិធីមាឃបូជាបានប្រយោជន៍ ដូចជា
១៖ ពុទ្ធសាសនិកជន បានយល់ដឹងយ៉ាងត្រឹមត្រូវ ពីសារៈសំខាន់នៃថ្ងៃមាឃបូជានេះ។
២៖ យល់ដឹងគោលធម៌ និងគោលជំហររបស់ព្រះពុទ្ធសាសនា។
៣៖ បណ្តុះសទ្ធាជ្រះថ្លាកាន់តែភិយ្យោភាពឡើង ក្នុងគោលធម៌របស់ព្រះសម្មាសម្ពុទ្ធជាម្ចាស់។
៤៖ បានបដិបត្តិតួនាទីរបស់ពុទ្ធសាសនិកជន ក្នុងថ្ងៃមាឃបូជានេះ។
៥៖ បានជួយជ្រោមជ្រែងព្រះពុទ្ធសាសនា ឲ្យស្ថិតស្ថេរចេរកាលយូរអង្វែង។
ថ្ងៃ មាឃបូជា ចាត់ជាគ្រឿងពិសោធ និងវាស់វែងគុណភាព នៃពុទ្ធសាសនិកជន ឲ្យ ឃើញថា បុគ្គលណា ជាពុទ្ធសាសនិកជនសកម្ម ឬ អសកម្មនៅថ្ងៃនេះឯង ប្រៀបដូចជា កញ្ចក់ ឆ្លុះបំភ្លឺមុខដូច្នោះ។ ព្រោះហេតុនោះ បើបានឋានៈជាពុទ្ធសាសនិកជន ហើយមិនត្រូវ ប្រងើយ កន្តើយ នឹងកាតព្វកិច្ចរបស់ខ្លួននោះទេ ត្រូវព្យាយាមលើក ស្ទួយឋានៈ ពុទ្ធសាសនិកជន របស់ខ្លួនឲ្យ សកម្មឡើង តារយះការធ្វើដំណើរទៅកាន់វត្ត ឬ មណ្ឌលពុទ្ធ សាសនា មិនមែនជា ការងារ ធ្ងន់ធ្ងរឡើយ។ ផ្ទុយទៅវិញ ជាការជួយលើកស្ទួយគុណភាពជីវិត ផ្នែកចិត្ត វិញ្ញាណ របស់ខ្លួនឲ្យ ប្រសើរឡើង តាមគោលការណ៍ចំណុចទី២ថា ធ្វើអំពើល្អឲ្យដល់ ពោល គឺ បណ្តុះ ចិត្ត ឲ្យស្ថិត ក្នុងបុណ្យកុសលនោះឯង។
ថ្ងៃ មាឃបូជា ចាត់ជាថ្ងៃ ព្រះធម៌, ថ្ងៃ វិសាខបូជា ចាត់ជាថ្ងៃព្រះពុទ្ធ, ថ្ងៃអាសាឡ្ហ បូជាចាត់ជា ថ្ងៃព្រះសង្ឃ ៕
អត្តបទ៖ក្រសួង ព៏ត៌មាន
