ឯកឧត្តម ខៀវ កាញារីទ្ធ រដ្ឋមន្រ្តី ក្រសួងព័ត៌មាន នៅព្រឹកថ្ងៃទី០១ ខែតុលា ឆ្នាំ២០២១នេះ បានអញ្ជើញជាអធិបតីក្នុងកិច្ចប្រជុំស្តីពី ការរៀបចំបង្កើតក្រុមការងារមនុស្សធម៌ ជួយសិស្សក្រីក្រ រៀនភាសាចិន នៅតាមូលដ្ឋានខេត្តក្រុងនានា។ សម្រាប់ក្រុមការងារសកម្មភាពមនុស្សធម៌ ជួយកុមារសិស្សក្រីក្ររៀនភាសាចិននេះ បានរៀបចំបង្កើតឡើងដោយគំនិតផ្តួចផ្តើមពីឯកឧត្តមរដ្ឋមន្រ្តី ខៀវ កាញារីទ្ធ ហើយក្រុមការងារនេះ មានឯកឧត្តម ឡុង សេង អនុរដ្ឋលេខាធិការក្រសួងព័ត៌មាន ជាប្រធាន លោកជំទាវ ឡ សុខផេង ទីប្រឹក្សាក្រសួងព័ត៌មាន ជាអនុប្រធាន ឯកឧត្តម តូច ណារត្ន អគ្គនាយករងវិទ្យុជាតិកម្ពុជា សមាជិក រួមទាំងសមាជិកមួយចំនួនទៀត មកពីនាយកដ្ឋានហិរញ្ញវត្ថុ និងមន្រ្តីដែលទទួលការងារភាសាចិន។
ភារកិច្ចការងាររបស់ ក្រុមការងារសកម្មភាពមនុស្សធម៌ជួយកុមារកំព្រា រៀនភាសាចិនរបស់ក្រសួងព័ត៌មាន គឺគៀរគរជំនួយពីសប្បុរជន អង្គការនានា និងសមាគមចិនទាំងក្នុង និងក្រៅប្រទេស ដើម្បីគាំទ្រសកម្មភាពមនុស្សធម៌។ ចូលរួមសម្របសម្រួលរាល់សកម្មភាពមនុស្សធម៌ របស់រដ្ឋមន្រ្តីក្រសួងព័ត៌មានសុំកិច្ចសហការពីអគ្គនាយកដ្ឋានទាំង៥ ចំណុះអោយក្រសួងព័ត៌មាន រាល់ពេលចុះធ្វើសកម្មភាពមនុស្សធម៌ជួយសិស្សក្រីក្រដែលរៀនភាសាចិន នៅតាមូលដ្ឋានខេត្តក្រុងនានា។
លោកជំទាវ ឡ សុខផេង បានជម្រាបជូនពីបទពិសោធន៏ការងារដែលបានធ្វើរយ:ពេល ២០ឆ្នាំនៅកម្ពុជាមកនេះ ដែលកាលពីពេលមុនក្រោមការជួយឧបត្តម្ភគាំទ្រ ពីកាសែតស៊ីនជីវ ប្រទេសចិន បានធ្វើកិច្ចការងារជួយដល់សិស្សក្រីក្រកម្ពុជា នៅតាមទីជនបទបានរៀនភាសាចិន តែប៉ុន្មានឆ្នាំចុងក្រោយនេះ បានផ្អាកសកម្មភាពការងារនេះ ទៅហើយ តែសម្រាប់លោកជំទាវ នៅតែជួយបានខ្លះៗ សម្រាប់សិស្សក្រីក្រ បានបន្តរៀនភាសាចិន តាមប្រពន្ធ័ អេឡិកត្រូនិក ដោយសារសាលារៀនបានបិទ ព្រោះបញ្ហាជំងឺកូវីដ-១៩ ។ នៅតាមបណ្តាខេត្ត ក្នុងប្រទេសកម្ពុជា មានសាលាបង្រៀន ភាសាចិន ប្រមាណ ៣០កន្លែង តែសម្រាប់នៅខេត្តកំពត មានរហូតដល់ទៅ ៥កន្លែង ហើយសម្រាប់ការជួយឧបត្តម្ភសម្រាប់រៀនភាសាចិន ក្នុងសិស្សម្នាក់អស់ប្រមាណពី ១០០ ទៅ ១៥០ដុល្លា។
ឯកឧត្តម រដ្ឋមន្រ្តី ខៀវ កាញារីទ្ធ បានបញ្ជាក់ថា កិច្ចប្រជុំនាឱកាសនេះ គ្រាន់តែជាការរៀបចំក្រុមការងារមួយ ដើម្បីលើកជាផែនការ និងសម្មភាពការងារដែលត្រូវជួយដល់ សិស្សក្រីក្របានរៀនភាសាចិន។ កិច្ចការងារធ្វើឡើងបន្ទាប់ពីមានការគាំទ្រពី សារព័ត៌មាន អាស៊ី-ប៉ាស៊ីហ្វិក ថែមស៌ AP Time ប្រទេសចិន។ ដូច្នេះក្រុមការងារនឹងពិនិត្យ លើកជាគម្រោងក្នុងការជួយដល់សិស្សក្រីក្របានរៀនភាសាចិន នៅក្នុងជំហានទី១ ប្រមាណពី ៥០ទៅ ១០០ នាក់។
ឯកឧត្តម រដ្ឋមន្រ្តី បានបញ្ជាក់ថា ក្នុងរយ:ពេលជិត ២០ឆ្នាំមកនេះ បានធ្វើការងារជាមួយលោកជំទាវ ឡ សុខផេង តាមរយៈកាសែតស៊ីនជីវ ដែលបើកស្នាក់ការនៅកម្ពុជា បានស្វែងរកមូលនិធិមកជួយដល់សិស្សក្រីក្របានរៀនភាសាចិន និងនាំយកនូវគ្រូស្មគ្រ័ចិត្តពីប្រទេសម៉ាឡេស៊ី និងប្រទេសចិន មកជួយបង្ហាត់បង្រៀន សិស្សនៅតាមបណ្តាខេត្ត នានា និងនៅជនបទដាច់ស្រយាលថែមទៀតផងដែរ។ បន្ទាប់ពីបានសិក្សារៀនសូត្រ ចេះដឹងនូវភាសាចិននេះរួចមក សិស្សានុសិស្សអាចរកការងារធ្វើបាន ហើយប្រែក្លាយ ជីវភាពគ្រួសារទាំងមូលតែម្តង និងមានអនាគតល្អថែមទៀតផង៕
#ទូរទស្សន៍ជាតិកម្ពុជា
