បុរសម្នាក់ជាប្រជាការពារភូមិក្នុងភូមិស្វាយដង្គំ បានដាច់ខ្យល់ស្លាប់ៗភ្លាមៗ កាលពីវេលាម៉ោង១៦ និង០០នាទីរសៀលថ្ងៃទី៣០ ខែកញ្ញា ឆ្នាំ២០២១ បន្ទាប់ពីបុរសខាងលើបានចូលទៅម៉ាស្សានៅកន្លែម៉ាស្សាមួយកន្លែង យីហោ ៧៧៧៧ ស្ថិតនៅភូមិទក្សិណខាងត្បូង សង្កាត់គោកចក ក្រុង/ខេត្តសៀមរាប តែមិនទាន់បានម៉ាស្សាផង ស្រាប់តែបានដាច់ខ្យល់ស្លាប់ភ្លាមៗតែម្តង។
ស្រ្តីជាអ្នកម៉ាស្សា បានឲ្យដឹងថា មុនពេលកើតហេតុជនរងគ្រោះបានចូលកន្លែងម៉ាស្សាខាងលើ ហើយបានអង្គុយនិយាយលេងជាមួយអ្នកម៉ាស្សាម្នាក់ តែមិនទាន់បានម៉ាស្សាផង ជនរងគ្រោះបានដកដង្ហើមថប់ៗ ហើយក៏រឹងខ្លួនឡើងរហូតបបូរមាត់ឡើងព៌ណស្វាយ ស្រាប់តែមួយសន្ទុះក៏បានដាច់ដង្ហើម ស្លាប់តែម្ដងទៅ។
បើតាមបុរសម្នាក់ឈ្មោះ តាន់ តុងហាក់ ភេទប្រុស អាយុ៣៨ឆ្នាំ ជាកូនប្រសារជនរងគ្រោះ បានបញ្ចាក់ថា ជនរងគ្រោះធ្លាប់មានជំងឺលើសឈាម និងជំងឺទឹកនោមផ្អែមប្រចាំកាយផងដែរ។ ជនរងគ្រោះ មានឈ្មោះ នៅ ណាត ភេទប្រុស អាយុ៦០ឆ្នាំ មានអាស័យដ្ឋាននៅភូមិស្វាយដង្គំ សង្កាត់ស្វាយដង្គំ ក្រុងសៀមរាប។
បើតាមសមត្ថកិច្ចនៅកន្លែងកើតហេតុបានឲ្យដឹងថា ក្រោយកើតហេតុសមត្ថកិច្ចជំនាញបានចុះដល់កន្លែងកើតហេតុ និងមកពិនិត្យទៅលើជនរងគ្រោះ ដោយបានសន្និដ្ឋានថា ជនរងគ្រោះបានស្លាប់ដោយសារជំងឺគាំងបេះដូង។ ជាមួយនោះក្រុមគ្រូពេទ្យបានពិនិត្យសំណាក់ទៅលើជនរងគ្រោះ បានរកវិជ្ជមានជំងឺកូវីដ-១៩ ផងដែរ។ ក្រោយពិនិត្យរួចរាល់សមត្ថកិច្ចជំនាញ បានប្រគល់សាកសពជនរងគ្រោះឲ្យក្រុមគ្រូពេទ្យដឹកយកទៅបូជានៅ វត្តអរញ្ញរង្សី ហៅ វត្តល្អក់ ស្ថិតនៅភូមិត្រពាំងទឹម ឃុំកណ្តែក ស្រុកប្រាសាទបាគង ខេត្តសៀមរាប៕
អត្ថបទ និងរូបភាព ៖ លោក ខេង ឧត្តម
