នាព្រឹកថ្ងៃទី០៤ ខែតុលា ឆ្នាំ២០២១ ឯកឧត្ដម ជិរ៉ាវុធ សុវណ្ណអាត (Jirawuth Suvanna Arj) អគ្គទីប្រឹក្សា ទទួលបន្ទុកផ្នែកពាណិជ្ជកម្ម នៃស្ថានឯកអគ្គរាជទូតនៃព្រះរាជាណាចក្រថៃ ប្រចាំនៅព្រះរាជាណាចក្រកម្ពុជា និងសហការី បាននាំយកគ្រឿងឧបភោគបរិភោគជាច្រើនមុខ ប្រគល់ជូនដល់រដ្ឋបាលខេត្តសៀមរាប នៅសាលាខេត្តសៀមរាប ក្រោមវត្តមានឯកឧត្ដម ទៀ សីហា អភិបាលនៃគណៈអភិបាលខេត្តសៀមរាប និង លោក ពិន ប្រាកដ អភិបាលរងខេត្ត រួមជាមួយនឹងមន្ត្រីអ្នកមុខអ្នកការនៃសាលាខេត្តជាច្រើនរូបទៀត ។
ឯកឧត្ដម ជិរ៉ាវុធ សុវណ្ណអាត បានមានប្រសាសន៍ថា គ្រឿងឧបភោគបរិភោគដែលបានផ្តល់ជូននាពេលនេះ គឺបានមកពីចូលរួមឧបត្ថម្ភពីបណ្តាក្រុមហ៊ុននានា ប្រមាណជា៣០ក្រុមហ៊ុន តាមរយៈស្ថានទូតប្រទេសថៃប្រចាំកម្ពុជា ដើម្បីចូលរួមជាមួយរដ្ឋបាលខេត្តសៀមរាប ក្នុងសកម្មភាពប្រយុទ្ធប្រឆាំងនឹងការរាលដាលនៃជំងឺកូវីដ-១៩ ដែលសកម្មភាពនេះ វាបានស្តែងចេញពីការរួមគ្នា ក្នុងនាមជាអ្នកជិតខាងល្អជួយគ្នាទៅវិញទៅមក។
ឯកឧត្ដម ជិរ៉ាវុធ សុវណ្ណអាត មានប្រសាសន៍ទៀតថា ការប្រយុទ្ធនឹងការឆ្លងរាលដាលនៃមេរោគកូវីដ-១៩ ក្នុងខេត្តសៀមរាប ត្រូវបានទទួលបន្ទុកការងារធ្ងន់ៗមួយចំនួនដូចជា ជាមណ្ឌលព្យាបាលជំងឺកូវីដ-១៩ កម្រិតធ្ងន់ក្នុងតំបន់ ជាខ្សែត្រៀមទី២ សម្រាប់ការទទួលពលករដែលត្រឡប់ពីប្រទេសថៃ ជាដើម ដូច្នេះគ្រឿងឧបភោគបរិភោគទាំងអស់នេះ ជាផ្នែកមួយសម្រាប់ផ្គត់ផ្គង់តាមមណ្ឌលចត្តាឡីស័ក និងមណ្ឌលព្យាបាលជំងឺកូវីដ-១៩ ក្នុងភូមិសាស្ត្រខេត្ត ។
មានប្រសាសន៍ក្នុងឱកាសនោះ ឯកឧត្តម ទៀ សីហា អភិបាលនៃគណៈអភិបាលខេត្តសៀមរាប បានសម្ដែងនូវអំណរគុណចំពោះស្ថានឯកអគ្គរាជទូតនៃព្រះរាជាណាចក្រថៃ ប្រចាំនៅព្រះរាជាណាចក្រកម្ពុជា ដែលបានផ្ដល់អំណោយជាគ្រឿងឧបភោគបរិភោគជូនដល់រដ្ឋបាលខេត្តសៀមរាប សម្រាប់ផ្គត់ផ្គង់តាមមណ្ឌលចត្តាឡីស័ក និងមណ្ឌលព្យាបាលជំងឺកូវីដ-១៩ ក្នុងភូមិសាស្ត្រខេត្ត ដែលកាយវិការនេះបានបង្ហាញឲ្យឃើញនូវទឹកចិត្តសប្បុរសធម៌ នៃវប្បធម៌ក្នុងការចែករំលែកទុក្ខលំបាករវាងគ្នានិងគ្នា និង ជាការចូលរួមជាមួយរាជរដ្ឋាភិបាល និង រដ្ឋបាលខេត្ត ក្នុងការទប់ស្កាត់ការឆ្លងរាលដាលនៃជំងឺកូវីដ-១៩ ដែលកំពុងតែកើតមានឡើង ។
ឯកឧត្តមអភិបាលខេត្តសៀមរាប មានប្រសាសន៍ទៀតថា ចាប់ពីមានការឆ្លងរាលដាលជំងឺកូវីដ-១៩ គិតមកដល់ដើមខែតុលានេះ ប្រជាពលរដ្ឋនៃខេត្តសៀមរាបដែលជាពលករ ត្រូវបានបញ្ជូនមកពីបណ្តាខេត្តជាប់ព្រំដែនកម្ពុជា-ថៃ ហើយត្រូវបានបញ្ជូនឲ្យសម្រាកធ្វើចត្តាឡីស័កក្នុងខេត្តសៀមរាប មានចំនួនសរុបប្រមាណជាង៦ពាន់នាក់ និងមួយចំនួនផ្សេងទៀតបានទទួលការថែទាំនិងព្យាបាល ក្រោយពេលធ្វើតេស្តលើវត្ថុសំណាក ថាមានវិជ្ជមានកូវីដ-១៩។
សូមបញ្ជាក់ថា រដ្ឋបាលខេត្តបានរៀបចំមណ្ឌលចត្តាឡីស័កនៅទូទាំងខេត្តសរុបមាន៤៧ទីតាំង ដើម្បីទទួលពលរដ្ឋក្នុងខេត្ត និងពលករកម្ពុជាមកពីក្រៅប្រទេស ឱ្យធ្វើចត្តាឡីស័កតាមគោលការណ៍ និងវិធានការសុខាភិបាល ព្រមទាំងបានត្រៀមបម្រុងចំនួន៦០ទីតាំងផ្សេងទៀត ក្នុងករណីមានតម្រូវការចាំបាច់៕
អត្ថបទ និង រូបថត ៖ លោក ជា ស្រស់ និង លោក ងិន គឹមឡេង
កែសម្រួលអត្ថបទ ៖ លោក លីវ សាន្ត
