នៅព្រឹកថ្ងៃទី០៦ ខែតុលា ឆ្នាំ២០២១ លោកប្រធានមន្ទីរទេសចរណ៍ខេត្ត និងក្រុមការងារ បានទទួលការអនុញ្ញាតពីឯកឧត្តម ទៀ សីហា អភិបាលខេត្តសៀមរាប ផ្ដល់លិខិតអនុញ្ញាតបម្រើសេវាកម្មចំណីអាហារនៅនឹងកន្លែង ជូនដល់ទីតាំង អាហារដ្ឋាន ភោជនីយដ្ឋានចំនួន៩ ក្នុងក្រុងសៀមរាប ដើម្បីសម្រួលដល់ការប្រកបអាជីវកម្ម និងភ្ញៀវទេសចរស្របពេលថ្ងៃឈប់សម្រាក នៃពិធីបុណ្យភ្ជុំបិណ្ឌ។
តាមការលើកឡើងរបស់ លោក ង៉ូវ សេងកាក់ ប្រធានមន្ទីរទេសចរណ៍ខេត្ត បង្ហាញបន្ទាប់ពីមានការបើកតំបន់ក្រហម និងតំបន់លឿងទុំក្នុងភូមិសាស្ត្រខេត្តសៀមរាប ក្រុមការងារចម្រុះរដ្ឋបាលខេត្ត និងក្រុមការងារជំនាញរបស់មន្ទីរទេសចរណ៍ខេត្ត បានចុះមកពិនិត្យ និងវាយតម្លៃទីតាំងអាជីវកម្មជាបន្តបន្ទាប់ ដើម្បីសម្រួលដល់ប្រជាពលរដ្ឋអាចបើកអាជីវកម្មឡើងវិញ។ លើសពីនោះ លោកក៏បានជំរុញដល់ម្ចាស់ទីតាំងជីវកម្មនានា ណែនាំដល់បុគ្គលិកពាក់បណ្ណបានទទួលការចាក់សាំង និងផ្ដល់ការបញ្ចុះតម្លៃដល់អតិថិជនណាដែលទទួលបានការចាក់វ៉ាក់សាំងផងដែរ ដើម្បីបង្ហាញពីទំនុកចិត្ត និងកាត់បន្ថយហានិភ័យដល់សុខភាពភាគីទាំងសងខាង។
លោកប្រធានមន្ទីរទេសចរណ៍ខេត្ត ក៏បានបញ្ជាក់ផងដែរថា ក្នុងករណីទីតាំងអាជីវកម្ម ដែលទទួលបានលិខិតអនុញ្ញាតនេះ ហើយពុំបានគោរពតាមការណែនាំ ក្រុមការងារជំនាញនឹងធ្វើការដកហូតលិខិតអនុញ្ញាតវិញ ហើយនិងធ្វើការពិន័យតាមនីតិវិធី តាមលិខិតបទដ្ឋានគតិយុត្ត។
បើតាម លោក ធឹម សេរីវុឌ្ឍ ប្រធានការិយាល័យគ្រប់គ្រងឧស្សាហកម្មទេសចរណ៍ នៃមន្ទីរទេសចរណ៍ខេត្តសៀមរាប បញ្ជាក់ថា ការស្នើលិខិតអនុញ្ញាតបម្រើសេវាកម្មនៅនឹងកន្លែង របស់អាហារដ្ឋាន និងភោជនីយដ្ឋានទេសចរណ៍នេះ ពុំមានការបង់ប្រាក់ឡើយ។ ក្នុងនោះ ការវាយតម្លៃចែកចេញជា ៣ប្រភេទ គឺអាហារដ្ឋាន និងភោជនីយដ្ឋានទេសចរណ៍ កម្រិតខ្ពស់ វាយតម្លៃលើ ៥៩ចំណុច មធ្យម វាយតម្លៃលើ ២១ចំណុច និងទាប វាយតម្លៃលើ ១២ចំណុច។ ទីតាំងដែលទទួលបានលិខិតអនុញ្ញាត ត្រូវមានពិន្ទុយ៉ាងតិច ៨០ភាគរយ នៃពិន្ទុសរុប។
លោកប្រធានការិយាល័យ បានបញ្ជាក់ផងដែរថា ការចុះវាយតម្លៃនេះ ក្រុមការងាររបស់លោកបានចាប់ផ្ដើមបន្ទាប់ពីមានការបើកតំបន់ក្រហម និងតំបន់លឿងទុំក្នុងភូមិសាស្ត្រខេត្តសៀមរាប ចំពោះប្រជាពលរដ្ឋជាម្ចាស់អាជីវកម្ម អាហារដ្ឋាន និងភោជនីយដ្ឋានទាំងអស់ ដែលពុំទាន់បានទទួលឯកសារវាយតម្លៃ អាចស្វែងរកលេខទូរស័ព្ទក្រុមការងារ នៅតាមសង្កាត់របស់ខ្លួនរស់នៅ ឬទាក់ទងមកមន្ទីរទេសចរណ៍ខេត្តផ្ទាល់។
ទន្ទឹមនោះ អ្នកគ្រប់គ្រងទីតាំងភោជនីយដ្ឋានមួយកន្លែងក្នុងក្រុងសៀមរាប បញ្ជាក់ថាភោជនីយដ្ឋានរបស់អ្នកនាង ទើបតែផ្ដល់សេវាកម្មនៅនឹងកន្លែងនៅថ្ងៃនេះប៉ុណ្ណោះ បន្ទាប់ពីទទួលបានលិខិតអនុញ្ញាតពីរដ្ឋបាលខេត្ត និងបានអនុវត្តន៍តាមកការណែនាំ ដោយមានឧបករណ៍វាស់កម្ដៅ ស្កែនQR Code Stop Covid កាត់បន្ថយការទទួលអតិថិជន៥០ភាគរយ តាមរយៈការរក្សាគម្លាត នៅនឹងតុអាហារ។
គួរជម្រាបដែរថា ក្នុងឱកាសថ្ងៃឈប់សម្រាកនៃពិធីបុណ្យភ្ជុំបិណ្ឌថ្ងៃទី០៥ ម្សិលមិញនេះ មានចំនួនអ្នកទេសចរណ៍ក្នុងប្រទេស មកទស្សនា និងបំពេញភារកិច្ចផ្សេងៗក្នុងខេត្តសៀមរាប មានប្រមាណ៦,០០០ពាន់នាក់ ក្នុងនោះប្រមាណ ២០ភាគរយ ជាទេសចរមកពីបណ្ដារាជធានីខេត្តផ្សេងៗ។
អត្ថបទ និងរូបភាព ៖ លោក សេង ផល្លី
