នៅថ្ងៃទី០៥ ខែតុលា ឆ្នាំ២០២១នេះ លោក កុយ កែហ៊ត់ សមាជិកក្រុមប្រឹក្សាស្រុកជីក្រែង បាននាំយកគ្រឿងឧបភោគបរិភោគនិងថវិកាមួយចំនួន រួមមាន ៖ អង្ករចំនួន២០០គីឡូក្រាម , ត្រីខចំនួន២០យួរ , ទឹកស៊ីអ៊ីវចំនួន២០យួរ , ទឹកក្រូចចំនួន២កេស , ទឹកដោះគោចំនួន១កេស , មីចំនួន ៣០កេស និង ថវិកាចំនួន៥៥ម៉ឺនរៀល ដែលជាអំណោយផ្ទាល់របស់ឯកឧត្តម ទៀ សីហា អភិបាលនៃគណៈអភិបាលខេត្ត និងលោកជំទាវ ទៅប្រគេនដល់ព្រះសង្ឃ នៅវត្តបុព្វទិសារាមហៅវត្តកំពង់ក្តី ស្ថិតនៅភូមិពន្លឺព្រះផុស ឃុំកំពង់ក្តីស្រុកជីក្រែងខេត្តសៀមរាប ដើម្បីជួយសម្រាល និងដោះស្រាយការលំបាកក្នុងអារាមនេះ ព្រោះវត្តនេះកំពុងបិទខ្ទប់ និងផ្អាកការចេញចូលជាបណ្តោះអាសន្ន ដោយសារតែរកឃើញវិជ្ជមានមេរោគកូវីដ-១៩ លើព្រះសង្ឃចំនួន៣អង្គ , សិស្សស្នាក់នៅរៀនក្នុងវត្តចំនួន៣នាក់ និង ដូនជីចំនួន១នាក់ តាំងពីថ្ងៃទី២៤ ខែកញ្ញា ឆ្នាំ២០២១មក ។
មានប្រសាសន៍ក្នុងឱកាសនោះ លោក កុយ កែហ៊ត់ បានពាំនាំនូវការផ្ដាំផ្ញើសួរសុខទុក្ខពីសំណាក់ឯកឧត្តម ទៀ សីហា អភិបាលនៃគណៈអភិបាលខេត្តសៀមរាប និង ឯកឧត្តម អ៊ាន ឃុន ប្រធានក្រុមប្រឹក្សាខេត្ត ប្រគេននិងជូនដល់ព្រះសង្ឃព្រមទាំងអ្នកកំពុងធ្វើចត្តាឡីស័កទាំងអស់ ត្រូវបន្តអនុវត្តនិងស្នាក់នៅដាច់ដោយឡែកឱ្យខាងតែបានចំនួន១៤ថ្ងៃទៅតាមការកំណត់ និងត្រូវអនុវត្តទៅតាមការណែនាំរបស់ក្រុមការងារសុខាភិបាល និងសេចក្តីណែនាំ របស់ក្រសួងសុខាភិបាល ក៍ដូចជាវិធានការ៣ការពារ និង៣កុំរបស់របស់រាជរដ្ឋាភិបាល គឺ “៣ការពារ” និង”៣កុំ” ឲ្យបានខ្ជាប់ខ្ជួន ។
ព្រះបវរវិជ្ជា ទេព ភឿន ព្រះរាជាថ្នាក់កិត្តិយស ព្រះវិន័យធរគណខេត្ត ជាព្រះអនុគណស្រុកជីក្រែង និងជាព្រះចៅអធិការវត្តបុព្វទិសារាម ហៅវត្តកំពង់ក្តី បានថ្លែងនូវអំណរគុណចំពោះឯកឧត្តម ទៀ សីហា អភិបាលខេត្ត និងឯកឧត្តម អ៊ាន ឃុន ប្រធានក្រុមប្រឹក្សាខេត្ត ព្រមទាំងថ្នាក់ដឹកនាំ និង អាជ្ញាធរគ្រប់ជាន់ថ្នាក់ ដែលបានការយកចិត្តទុកដាក់ដល់ព្រះសង្ឃក្នុងគ្រាលំបាកដោយសារវិបត្តិជំងឺកូវីដ-១៩ និងបានជួយឧបត្ថម្ភគ្រឿងឧបភោគបរិភោគជាបន្តបន្ទាប់ សម្រាប់វត្តដែលកំពុងធ្វើចត្តាឡីស័ក គិតមកដល់ពេលនេះអស់រយៈពេល១១ថ្ងៃមកហើយ ។
ព្រះបវរវិជ្ជាបន្តថា ដោយបានការយកចិត្តទុកដាក់ ពីមន្ត្រីសុខាភិបាលនិងអាជ្ញាធរដែនដី បានមកធ្វើការពិនិត្យស្ថានភាពសុខភាពជាប្រចាំ និងបានផ្តល់ថ្នាំសង្កូវជាបន្តបន្ទាប់ដល់អ្នកវិជ្ជមាន រហូតមកដល់ពេលនេះ សុខភាពភិក្ខុ សាមណេរ កូនសិស្ស ដូនជី ទាំង៧អង្គ/នាក់ មានសុខភាពល្អប្រសើរហើយ ជាមួយគ្នានោះ អ្នកដែលប៉ះពាល់ដោយផ្ទាល់និងដោយប្រយោលដែលកំពុងធ្វើចត្តាឡីស័កនៅក្នុងវត្តដែរនោះ ក៏មានសុខភាពល្អជាប្រក្រតីដែរ តែយ៉ាងណាក៍មិនភ្លេចអនុវត្តជាប្រចាំនូវវិធានការ ៣ការពារនិង៣កុំរបស់រាជរដ្ឋាភិបាលឡើយ ៕
អត្ថបទ និង រូបថត ៖ លោក យូ វង្ស
កែសម្រួលអត្ថបទ ៖ លោក លីវ សាន្ត
