ដើមី្បចូលរួមក្នុងយុទ្ធនាការប្រយុទ្ធប្រឆាំងបង្កាទប់ស្កាត់ជំងឺកូវីដ-១៩ ជាមួយរាជរដ្ឋាភិបាល ក៏ដូចរដ្ឋបាលខេត្តសៀមរាប នៅរសៀលថ្ងៃទី១៩ ខែតុលា ឆ្នាំ២០២១នេះ លោក ពិន ប្រាកដ អភិបាលរងខេត្ត តំណាងដ៏ខ្ពងខ្ពស់ ឯកឧត្តម ទៀ សីហា អភិបាល នៃគណៈអភិបាលខេត្តសៀមរាប បានទទួលអំណោយពីក្រុមហ៊ុនឆ្នោត មហាសំណាង រួមមាន៖ មី ៦០កេស, ទឹកសុទ្ធ ៦០កេស និង ម៉ាស់ចំនួន ១កេសផងដែរ។
ក្នុងឱកាសនោះដែរ លោក ពិន ប្រាកដ ក៏បានធ្វើការថ្លែងអំណរគុណដល់ទឹកចិត្តដ៏សប្បុរសធម៌ របស់ក្រុមហ៊ុនឆ្នោតមហាសំណាង ដែលបានផ្តល់ជូននូវគ្រឿងឧបភោគបរិភោគ បម្រើការក្នុងការប្រយុទ្ធប្រឆាំងបង្កា ទប់ស្កាត់ជំងឺកូវីដ-១៩ ដល់រដ្ឋបាលខេត្តសៀមរាបនាពេលនេះ ស្របពេលដែលកម្ពុជាយើង ក៏ដូចជាអាជ្ញាធរខេត្តសៀមរាប បានកំពុងជួបនូវវិបត្តិជំងឺកូវីដ-១៩ ហើយអាជ្ញាធរខេត្ត បានកំពុងផ្គត់ផ្គង់ជាស្បៀងអាហារ និងផ្តល់នូវសម្ភារៈ ឧបករណ៍សម្រាប់ប្រើប្រាស់ជូនទៅតាមបណ្តាក្រុងស្រុក សំខាន់ក្នុងការផ្គត់ផ្គង់ដល់បងប្អូនដែលបានវិលមកពីក្រៅប្រទេស និងជួបនូវហានីភ័យខ្ពស់នៃជំងឺកូវីដ-១៩ ដែលកំពុងធ្វើចត្តាឡីស័កនៅតាមមណ្ឌលក្រុងស្រុក និងគ្រួសារជួបការខ្វះខាតក្នុងបរិបទកូវិដនេះ។
លោក ពិន ប្រាកដ មានប្រសាសន៍ទៀតថា ក្រោមការគិតគូរទុកជាមុន ដោយរដ្ឋបាលខេត្តបានបង្កើនសមត្ថភាពដើម្បីកាត់ផ្តាច់នូវខ្សែចម្លង ព្រោះវាប្រសើរជាជាងការប្រមូលកម្លាំងទៅទប់ទល់ក្នុងពេល និងក្រោយពេលមានការផ្ទុះជំងឺកូវីដ-១៩ ក្នុងសហគមន៍។ ហើយមកដល់ពេលនេះ ខេត្តសៀមរាប ចំពោះបញ្ហាឆ្លងជំងឺកូវីដ-១៩ នៅមិនទាន់ថយចុះទៅឡើយ ដែលជាការព្រួយបារម្ភរបស់អាជ្ញាធរខេត្ត ។ ជាមួយនោះលោកក៏សូមអំពាវនាវដល់បងប្អូនប្រជាពលរដ្ឋទាំងអស់ សំខាន់នៅខេត្តសៀមរាប ទោះបីបងប្អូនបានចាក់វ៉ាក់សាំងគ្រប់ដូស ក៏ពិតមែន តែត្រូវបន្តអនុវត្តវិធានការណ៍របស់រាជរដ្ឋាភិបាល ៣កុំ ៣ការពារ ឲ្យមានប្រសិទ្ធភាពខ្ពស់បំផុត និង សូមបន្តប្រកាន់នូវវិធានសុខាភិបាលឲ្យបានខ្ជាប់ខ្ជួន និង ត្រូវចេះធ្វើការសម្របខ្លួនរស់នៅតាមគន្លងបែបថ្មីជាមួយកូវីដ-១៩ ៕
អត្ថបទ និង រូបភាព៖ លោក ម៉ី សុខារិទ្ធ
