នៅព្រឹកថ្ងៃទី២៧ ខែតុលា ឆ្នាំ២០២១ ឯកឧត្តម ខៀវ កាញា រីទ្ធ រដ្ឋមន្ត្រី ក្រសួងព័ត៌មាន បានទទួលអំណោយជាសម្ភារបច្ចេកទេសសម្រាប់ចម្លងប្រពន្ធ័រូបភាព វីដេអូ ពីអានណាឡូកទៅឌីជីថល ជាម៉ាស៊ីនប្រភេទចាក់កាសែត VHS B TA Cam និង DV Cam ជាអំណោយរបស់រដ្ឋបាលជាតិវិទ្យុ និងទូរទស្សន៍ នៃសាធារណរដ្ឋប្រជាមានិតចិន ជូនដល់អគ្គនាយកដ្ឋានទូរទស្សន៍ជាតិកម្ពុជា តាមរយៈឯកឧត្តម WANG WENTIAN ឯកអគ្គរដ្ឋទូតចិន ប្រចាំកម្ពុជា។
ក្នុងឱកាសនោះដែរ ឯកឧត្តម រដ្ឋមន្រ្តី ខៀវ កាញារីទ្ធ បានសំដែងនូវការអរគុណចំពោះរដ្ឋបាលជាតិវិទ្យុ និងទូរទស្សន៍ នៃសាធារណរដ្ឋប្រជាមានិតចិន ដែលបានផ្តល់នូវសម្ភារៈបច្ចេកទេសសម្រាប់ការងារផ្សព្វផ្សាយដល់ទូរទស្សន៏ជាតិកម្ពុជានៅពេលនេះ ដែលបញ្ជាក់ឲ្យឃើញកាន់តែច្បាស់ថា ភាគីមិត្តចិន ជានិច្ចកាលតែងតែឈរនៅខាងកម្ពុជា ក្នុងការគាំទ្រទាំងផ្នែកឧបករណ៏ សម្ភារៈបច្ចេកទេស និងការងារបណ្តុះបណ្តាលធនធានមនុស្ស ព្រមទាំងផ្លាស់ប្តូរដំណើរទស្សនកិច្ចរបស់មន្រ្តីជាន់ខ្ពស់ និងមន្រ្តីជំនាញរបស់ក្រសួងព័ត៌មានកម្ពុជាទៅកាន់ប្រទេសចិនផងដែរ។
ក្នុងនាមរាជរដ្ឋាភិបាលចិន ឯកឧត្តម WANG WENTIAN មានប្រសាសន៏លើកឡើងពីចំណងមិត្តភាព និងកិច្ចសហការគ្នារវាងចិន និងកម្ពុជា មានតាំងពីយូរណាស់មកហើយ ដែលជាចំណងនៃកិច្ចសហប្រតិបត្តិការយ៉ាងជ្រាលជ្រៅ ជាចំណងមិត្តភាព ជាចំណងបងប្អូនយ៉ាងរឹងមាំលើគ្រប់វិស័យ។ ឯកឧត្តមឯកអគ្គរដ្ឋទូត ក៏បានសំដែងនូវការស្វាគមន៏យ៉ាងជ្រាលជ្រៅ ចំពោះរាល់កិច្ចសហប្រតិបត្តិការ តាមរយៈស្ថានទូតចិនប្រចាំកម្ពុជា សម្រាប់គម្រោងនៃដំណើរការនៃកិច្ចអភិវឌ្ឍន៏ របស់ក្រសួងព័ត៌មានកម្ពុជានៅក្នុងកម្រិតណាមួយដែលស្ថានទូតចិនអាចចូលរួមក្នុងកិច្ចសហប្រតិបត្តិការបាន។ ជាមួយនេះ ឯកឧត្តម ឯកអគ្គរដ្ឋទូតចិន បានកោតសរសើរចំពោះ ឯកឧត្តម រដ្ឋមន្រ្តី ខៀវ កាញារីទ្ធ លើទស្សនៈក្នុងវិស័យសារព័ត៌មាន ទស្សនៈអំពីស្ថានការណ៏ ទូទៅទាំងនៅកម្ពុជា និងអន្តរជាតិ ជាពិសេសតែងតែបានឆ្លើយបំភ្លឺទៅលើមតិសាធារណជន ចំពោះបញ្ហាការបំភៃ្ល បំភ្លើស និងការប្រឆាំងនានា ពីស្ថាប័នព័ត៌មាន ដើម្បីពន្យល់ដល់សាធារណជនអំពីចំណងមិត្តភាព និងកិច្ចសហប្រតិបត្តិការល្អរវាងចិន និងកម្ពុជា។ ឯកឧត្តមសង្ឃឹមជឿជាក់ថា នៅពេលបញ្ចប់នូវស្ថានភាព នៃការឆ្លងរីករាលដាលនៃជំងឺកូវីដ-១៩ នឹងមានរៀបចំការបណ្តុះបណ្តាលធនធានមនុស្ស តាមរយៈដំណើរទស្សនកិច្ចសិក្សាដកពិសោធន៏ និងសិក្ខាសាលានានា ដល់មន្រ្តីព័ត៌មានក្រសួងព័ត៌មាន និងមន្រ្តីកម្ពុជា។ ក៏ប៉ុន្តែស្ថិតក្នុងស្ថានភាពនៃការឆ្លងរីករាលដាលនៃជំងឺកូវីដក៏ដោយ តែប្រទេសចិនបានផ្តល់ការ សិក្សាតាមប្រពន្ធ័អនឡាញ ដែលកំពុងធ្វើនាពេលបច្ចុប្បន្ន។
ឯកឧត្តម រដ្ឋមន្រ្តី ខៀវ កាញារីទ្ធ បានអះអាងបញ្ជាក់ថា សម្ភារទាំងនេះ ទោះបីបន្តិចបន្ទូចក៏ពិតមែន តែប្រៀបបានដំណើរមួយនៅកណ្តាលសមុទ្រ ដែលអ្នកដំណើរត្រូវការទឹកសាប ហើយសម្រាប់សម្ភារៈទាំងនេះ ជាទឹកសាបសម្រាប់តម្រូវការរបស់ ទូរទស្សន៏ជាតិកម្ពុជាយកមកប្រើប្រាស់។
សម្ភារបរិក្ខាបច្ចេកទេស អេឡិកត្រូនិចនេះ ជាការផ្ទេរ ឬចម្លង រូបភាពវីដេអូ ដែលបានប្រើប្រាស់កន្លងមក ហើយបានត្រូវរក្សាទុកនៅឃ្លាំងឯកសារ ទូរទស្សន៏ជាតិកម្ពុជា តាំងពីយូរមកជាប្រភេទប្រពន្ធ័ចាស់ៗ មានន័យថាធ្វើការចម្លង រូបភាពពី Analog ទៅជារូបភាពប្រភេទ Digital វិញ ដែលស្រួលក្នុងការយកប្រើប្រាស់ និងរក្សាទុកបានយូរអង្វែង រាល់ឯកសារដែលបានចម្លងចេញមកនេះ៕
អត្តបទនិងរូបភាព៖ទូរទស្សន៍ជាតិកម្ពុជា
