កាលពីព្រឹកថ្ងៃទី២៧ ខែតុលា ឆ្នាំ២០២១នេះ អង្គការភ្លែនអន្តរជាតិកម្ពុជា បានរៀបចំពិធីប្រកាសផ្សព្វផ្សាយផែនការ៥ឆ្នាំលើកទី៤របស់ខ្លួន ( ២០២១-២០២៦ ) លើប្រធានបទ ២.៥លានហេតុផល សំដៅលើកកម្ពស់សិទ្ធិអំណាចរបស់ក្មេងស្រី ក្មេងស្រីវ័យជំទង់ និងស្រ្តីវ័យក្មេងនៅកម្ពុជា ចាប់ពីអាយុ១២ឆ្នាំដល់២៤ឆ្នាំ ចំនួន២.៥លាននាក់ ដើម្បីលើកកម្ពស់សិទ្ធិអំណាចរបស់ពួកគេ ក្នុងនោះ១លាននាក់ដោយផ្ទាល់ និង១.៥លាននាក់ដោយប្រយោលតាមរយៈនៃប្រព័ន្ធ Online Zoom ក្រោមវត្តមានរបស់លោកជំទាវ ស៊ិន ណម សមាជិកាក្រុមប្រឹក្សាខេត្ត តំណាងឯកឧត្តមអភិបាលខេត្ត និងជាប្រធានគណៈកម្មាធិការពិគ្រោះយោបល់កិច្ចការស្រ្តី និងកុមារខេត្តសៀមរាប ដែលពិធីនេះ ត្រូវបានភ្ជាប់ជាមួយ ពិធីអបអរទិវាក្មេងស្រីអន្តរជាតិផងដែរ។
លោកស្រី គ្វីននេត វ៉ង នាយិកាប្រចាំប្រទេសរបស់អង្គការភ្លែនអន្តរជាតិកម្ពុជា បានបង្ហាញថា ជិត២០ឆ្នាំហើយដែលភ្លែនបានសម្រេចគោលបំណងរបស់ខ្លួន ដើម្បីឲ្យពិភពលោកមួយមានយុត្តិធម៌ ជាមួយនឹងការលើកកម្ពស់សិទ្ធិកុមារ និងសមភាពសម្រាប់ក្មេងស្រី ហើយសម្រាប់៥ឆ្នាំបន្តទៀតនេះ អង្គការភ្លែន មានមហិច្ឆតាបង្កើនកិច្ចសហប្រតិបត្តិការជាដៃគូយុទ្ធសាស្រ្ត ដើម្បីលើកកម្ពស់សិទ្ធិអំណាចរបស់ក្មេងស្រី ក្មេងស្រីវ័យជំទង់ និងស្រ្តីវ័យក្មេងនៅកម្ពុជា លើកស្ទួយសំឡេងនៃភាពចម្រុះរបស់ពួកគេ ដើម្បីគាំទ្រឲ្យពួកគាត់ទទួលបាននូវចំណេះដឹង ជំនាញ ទំនុកចិត្តដែលអាចបំពេញបានសិទ្ធិ និងសក្តានុពលរបស់ខ្លួន ពិសេសយុទ្ធសាស្រ្ត៥ឆ្នាំលើកទី៤របស់អង្គការភ្លែនអន្តរជាតិកម្ពុជា គឺឈរលើកម្មវិធីពហុវិស័យចំនួន៤ គឺការចាប់ផ្តើមជាមួយនឹងសុខភាព កិច្ចការពារជំនាន់ថ្មី ការរៀនសូត្រពេញមួយជីវិត និងភាពដឹកនាំរបស់ក្មេងស្រី។
លោកស្រីនាយិកាអង្គការភ្លែនអន្តរជាតិកម្ពុជា បានឲ្យដឹងដែរថា ការផ្លាស់ប្តូរភូមិសាស្រ្តគោលដៅ គឺជាគំរូអនុវត្តល្អមួយ ក្នុងចំណោមបួន ដើម្បីធ្វើឲ្យមានគុណភាពក្នុងការអនុវត្តកម្មវិធីស្នូលពហុវិស័យនៃយុទ្ធសាស្រ្ត ២.៥លានហេតុផល ហើយការផ្លាស់ប្តូរគោលដៅនេះ គឺឆ្ពោះទៅរកក្រុមគោលដៅដែលជួបការលំបាកក្នុងការទទួលបានឱកាស ដូចនេះ ភ្លែន បានកំណត់គោលដៅ២នៅតំបន់ឥសាន មានខេត្តរតនគិរី និងខេត្តស្ទឹងត្រែង និងប្រហែលជាអាចពង្រីកតំបន់ប្រតិបត្តិការទៅខេត្តឧត្តរមានជ័យ ខណៈបេសកកម្មនៅខេត្តសៀមរាបនៅតែមានបន្តដដែល ហើយអាចបន្តទៅខេត្តបាត់ដំបង ក្រចេះ មណ្ឌលគិរី និងខេត្តព្រះវិហារ។
មានប្រសាសន៍ក្នុងឱកាសនោះដែរលោកជំទាវ ស៊ិន ណម ក្នុងនាមប្រធានគណៈកម្មាធិការពិគ្រោះយោបល់ កិច្ចការស្រ្តី និងកុមាខេត្តសៀមរាប បានបង្ហាញនូវការគាំទ្រចំពោះផែនការយុទ្ឋសាស្ត្រថ្មីនេះ និងបានវាយតម្លៃថា ផែនការនេះ ឆ្លើយតបបានទៅនឹងផែនការថ្នាក់ជាតិ និងថ្នាក់ក្រោមជាតិរបស់រាជរដ្ឋាភិបាលកម្ពុជា ដែលផ្តោតលើវិស័យធំៗ មួយចំនួនរួមមាន៖ ការគាំពារ និងអភិវឌ្ឍន៍កុមារតូចៗ ជាពិសេសក្មេងស្រី ជំរុញការអនុវត្តការងារពាក់ព័ន្ធនឹងទឹកស្អាត អនាម័យ អាហាររូបត្ថម្ភ ការអប់រំ និងបណ្តុះបណ្តាលបច្ចេកទេសវិជា្ជជីវៈ កិច្ចការពារកុមារ និងយុវជនជំនាន់ថ្មី ភាពជាអ្នកដឹកនាំរបស់ក្មេងស្រីនៅតាមភូមិសាស្ត្រអាទិភាព នៃខេត្តសៀមរាប ដែលជាខេត្ត យុទ្ឋសាស្ត្រ រយៈពេលយូរអង្វែងរបស់អង្គការភ្លែន ហើយគម្រោងយុទ្ឋសាស្ត្រទាំងនេះ ពិតជាឆ្លើយតប ទៅនឹងតម្រូវការជាក់ស្តែងរបស់កុមារ យុវជន និងប្រជាពលរដ្ឋនៅក្នុងសហគមន៍៕
អត្ថបទ និង រូបថត ៖ លោក ងិន គឹមឡេង
កែសម្រួលអត្ថបទ ៖ លោក លីវ សាន្ត
