នៅព្រឹកថ្ងៃទី០១ ខែវិច្ឆិកា ឆ្នាំ២០២១ រដ្ឋបាលខេត្តសៀមរាប បានរៀបចំបើកយុទ្ធនាការចាក់វ៉ាក់សាំងការពារជំងឺកូវីដ-១៩ ដល់កុមារតូចអាយុ៥ឆ្នាំក្នុងក្របខណ្ឌទូទាំងខេត្ត នៅមន្ទីរពេទ្យបង្អែកខេត្ត ក្រោមអធិបតីភាពលោក នួន ពុទ្ធារ៉ា អភិបាលក្រុងសៀមរាប និងជាតំណាងដ៏ខ្ពង់ខ្ពស់ឯកឧត្តម ទៀ សីហា អភិបាល នៃគណៈអភិបាលខេត្តសៀមរាប ។
លោក នួន ពុទ្ធារ៉ា មានប្រសាសន៍ថា យុទ្ធសាស្រ្ត និងការអនុវត្តយុទ្ធនាការចាក់វ៉ាក់សាំងការពារជំងឺកូវីដ-១៩ ដល់កុមារតូចអាយុ៥ឆ្នាំនាពេលនេះ គឺជាជំហានថ្មីមួយទៀត កំពុងជ្រាបចូលកាន់តែរឹងមាំក្នុងថ្នាលបណ្តុះបណ្តាលធនធានមនុស្ស និងជាឋាមពលនៃការពង្រឹងគ្រឹះលើវិស័យអប់រំសិក្សាធិការជាតិ ដូចដែលប្រសាសន៍ដ៏ខ្ពង់ខ្ពស់នៃសម្តេចតេជោ ប្រមុខនៃរាជរដ្ឋាភិបាលកម្ពុជា បានថ្លែងឡើងក្នុងន័យនេះ តាំងពីថ្ងៃប្រកាសបើកយុទ្ធនាការចាក់វ៉ាក់សាំងបង្ការកូវីដ-១៩ ជូនកុមារចាប់ពីអាយុ៦ឆ្នាំ ដល់ក្រោម១២ឆ្នាំមកម្លេះ។
លោកមានប្រសាសន៍បន្ថែមថា មុននេះ ប្រជាពលរដ្ឋដែលមានកូនចៅអាយុ៥ឆ្នាំ មានការគិតនិងការព្រួយបារម្ភជាប់ជានិច្ចក្នុងរង្វង់គ្រួសាររបស់ខ្លួន ដោយពួកគាត់យល់ថា កុមារអាយុ៥ឆ្នាំ គឺបានចូលរៀននៅថ្នាក់មត្តេយ្យសិក្សា ហើយកម្រិតថ្នាក់មត្តេយ្យនេះ វាជាថ្នាក់ចាប់ផ្តើមមួយ សម្រាប់ការចាប់យកសមត្ថភាពនៃកុមាតូចលើវិថីសិក្សារបស់ពួកគេ ដើម្បីឆ្ពោះទៅរកការកសាងសមត្ថភាពជាអ្នកកាន់កូនសោរអនាគតដោយខ្លួនឯង ហេតុនេះការចាក់វ៉ាក់សាំងការពារកូវីដ-១៩ សម្រាប់កុមារតូចអាយុ៥ឆ្នាំ គឺជាក្តីសង្ឃឹមដែលមិននឹកស្មានដល់។
លោកអភិបាលក្រុងសៀមរាប មានប្រសាសន៍ទៀតថា ដើម្បីការពារអាយុជីវិតប្រជាជនកម្ពុជាគ្រប់រូបនោះ សម្ដេចតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា បានប្រើប្រាស់គ្រប់វិធីសាស្ត្រ ក្នុងការស្វះស្វែងរកវ៉ាក់សាំងយកមកចាក់ជូនដល់ប្រជាជនកម្ពុជា ដែលបញ្ហានេះ គឺ ជាការគិតគូដ៏ធ្ងន់បំផុតសម្ដេចតេជោ ចំពោះអាយុជីវិតនៃប្រជាជននេះហើយ ដូច្នេះក្នុងនាមជាពលរដ្ឋកម្ពុជា សូមគាំទ្រចំពោះគតិបណ្ឌិតនៃតេជោ សែន ដែលថា សិទ្ធិដែលមនុស្សត្រូវការដំបូងបំផុត មុននឹងចង់បានអ្វីៗបន្ថែមទៀត គឺសិទ្ធិរស់រានមានជីវិត អរគុណសន្តិភាព។
ឯកឧត្តម ក្រុស សារ៉ាត់ ទីប្រឹក្សាក្រសួងសុខាភិបាល និងជាប្រធានមន្ទីរសុខាភិបាលនៃរដ្ឋបាលខេត្តសៀមរាប បានឲ្យដឹងថា កុមារតូចអាយុ៥ឆ្នាំនៅខេត្តសៀមរាប មានចំនួនជាង ២២ម៉ឺននាក់ ហើយយុទ្ធនាការនេះមានរយៈពេល១៤ថ្ងៃ ដោយចាប់គិតពីថ្ងៃទី០១ ខែវិច្ឆិកា ឆ្នាំ២០២១នេះតទៅ ប៉ុន្តែក្រោយពីយុទ្ធនាការ១៤ថ្ងៃនេះ មន្ទីរពេទ្យបង្អែកខេត្ត មណ្ឌលសុខភាពនៅតាមបណ្តាឃុំ-សង្កាត់ ក្រុង-ស្រុកទាំង១២ទូទាំងខេត្ត នៅតែបង្កឱកាសសម្រាប់កុមារតូចអាយុ៥ឆ្នាំ បានទទួលវ៉ាក់សាំងបង្ការនេះ គ្រប់ៗគ្នា។
អត្ថបទ និង រូបថត ៖ លោក ងិន គឹមឡេង
កែសម្រួលអត្ថបទ ៖ លោក លីវ សាន្ត
