ថ្ងៃទី០៤ ខែវិច្ឆិកា ឆ្នាំ២០២១ លេខាធិការដ្ឋានក្រុមការងាររាជរដ្ឋាភិបាលចុះមូលដ្ឋានរាជធានីខេត្ត (ក.រ.ម) បានរៀបចំកិច្ចប្រជុំ ដើម្បីជំរុញការបង្កើតលេខាធិការដ្ឋាន ថ្នាក់ខេត្តក្រុងស្រុក បង្ហាញលទ្ឋផលសកម្មភាពការងារ និងតម្រង់ទិសលើទម្រង់របាយការណ៍ ក្រុមការងាររាជរដ្ឋាភិបាលចុះមូលដ្ឋានរាជធានីខេត្ត ធ្វើនៅសាលាខេត្តសៀមរាប ក្រោមអធិបតីភាព ឯកឧត្តម រាជ សុភទ្ទ អនុរដ្ឋលេខាធិការក្រសួងមហាផ្ទៃ និងជាអនុប្រធានអចិន្ត្រៃយ៍លេខាធិការដ្ឋាន ក្រុមការងាររាជរដ្ឋាភិបាលចុះមូលដ្ឋានរាជធានីខេត្ត និង លោក ង៉ាន់ ភិរុណ អភិបាលរងខេត្ត តំណាងដ៍ខ្ពង់ខ្ពស់ ឯកឧត្តម ទៀ សីហា អភិបាលនៃគណៈអភិបាលខេត្តសៀមរាប រួមជាមួយវត្តមាន លោក លោកស្រី ទីចាត់ការរដ្ឋបាលសាលាខេត្ត ប្រធាន អនុប្រធានមន្ទីរ-អង្គភាពជុំវិញខេត្ត អភិបាល អភិបាលរងក្រុង-ស្រុក សរុបចំនួនប្រមាណជា៧០រូប។
ក្នុងក្នុងមតិស្វាគមន៍របស់ លោក ង៉ាន់ ភិរុណ បានបង្ហាញរបាយការណ៍ថា អនុវត្តតាមកម្មវិធីនយោបាយរបស់រាជរដ្ឋាភិបាលកម្ពុជានីតិកាលទី៦ នៃរដ្ឋសភា រាជរដ្ឋាភិបាលកម្ពុជា បានបង្កើតក្រុមការងាររាជរដ្ឋាភិបាលចុះមូលដ្ឋានខេត្តសៀមរាប ដែលមានសម្តេចពិជ័យសេនា ទៀ បាញ់ ឧបនាយករដ្ឋមន្ត្រី រដ្ឋមន្ត្រីក្រសួងការពារជាតិ និងជាប្រធានក្រុមការងាររាជរដ្ឋាភិបាលចុះមូលដ្ឋានខេត្ត សៀមរាប ព្រមទាំងសមាជិក សមាជិកាក្រុមការងាររាជរដ្ឋាភិបាល ចុះមូលដ្ឋានខេត្តសៀមរាបសរុបចំនួន ៧៦១រូប ស្រី ៦៦រូប បានបែងចែកក្រុមការងារទទួលបន្ទុកក្រុង ស្រុក ដើម្បីក្តាប់រាល់បញ្ហាប្រឈម និងក្តីកង្វល់ ព្រមទាំងឆ្លើយតប និងដោះស្រាយជូនបងប្អូនប្រជាពលរដ្ឋ ដែលបានលើកឡើងនូវបញ្ហា នៅមូលដ្ឋានជាប្រចាំ។
លោក ង៉ាន់ ភិរុណបានលើកឡើងថា ទន្ទឹមនឹងការជួបវិបត្តិ នៃការរីករាលដាលជំងឺកូវីដ-១៩ ក្នុងឆ្នាំ២០២១នេះ រដ្ឋបាលខេត្តបានពុះពារ ជំនះនូវបញ្ហាប្រឈមជាច្រើន ដែលធ្វើឱ្យរដ្ឋបាលខេត្តអនុវត្តបានដោយជោគជ័យ និងសម្រេចបាននូវ សមិទ្ធផលមួយចំនួន ជាអាទិ៍ រដ្ឋបាលខេត្ត ក្រុង ស្រុក បានចូលរួមទប់ស្កាត់ ណែនាំ ផ្សព្វផ្សាយ និងអនុវត្តទៅតាមការណែនាំរបស់រាជរដ្ឋាភិបាល និងក្រសួងសុខាភិបាលដល់ប្រជាពលរដ្ឋ ដើម្បីធ្វើការទប់ស្កាត់ការឆ្លងជំងឺ កូវីដ-១៩ ជាប់ជាប្រចាំ ជាមួយគ្នានោះអាជ្ញាធរខេត្ត ក៍បានកំណត់តំបន់ក្រហម តំបន់លឿងទុំ និងតំបន់លឿងក្នុងភូមិសាស្ត្រខេត្តសៀមរាប ដែលជាតំបន់មានការឆ្លងច្រើន ដើម្បីកាត់ផ្តាច់ការឆ្លងជំងឺកូវីដ-១៩ ចេញពីសហគមន៍។ បានរៀបចំអ្នកលក់ដូរស្បៀងអាហារ និងក្រុមការងារដឹកជញ្ជូនទំនិញជាស្បៀងអាហារ ជូនប្រជាពលរដ្ឋដែលរស់នៅក្នុងតំបន់បិទខ្ទប់ ដែលរដ្ឋបាលខេត្ត ជាអ្នកចំណាយថ្លៃដឹកជញ្ជូន។ បានផ្តល់អំណោយជាស្បៀងអាហារដល់ប្រជាពលរដ្ឋដែលមានប័ណ្ណសមធម៌ដែលរស់នៅក្នុងតំបន់បិទខ្ទប់។ បានឧបត្ថម្ភសាច់ប្រាក់ជូនគ្រួសារក្រីក្រ និងងាយរងគ្រោះអំឡុងពេលកូវីដ-១៩ បានអប់រំណែនាំដល់ម្ចាស់អាជីវកម្មក្នុងផ្សារទាំងអស់ឱ្យស្កែន QR Code ដែលក្រុម ការងារបានរៀបចំ ដើម្បីងាយស្រួលក្នុងស្វែងរកអ្នកមានជំងឺកូវីដ-១៩ និងអ្នកពាក់ព័ន្ធជៀសវាងការបិទផ្សារទាំងមូល។ បន្តសហការលើការងារសាងសង់ហេដ្ឋារចនាសម្ព័ន្ឋផ្លូវ ៣៨ខ្សែយ៉ាងសស្រាក់សស្រាំ ពេលនេះសម្រេចបានលទ្ធផល ៨៥.៩៩% ហើយនឹងបញ្ចប់នាដើមឆ្នាំ២០២២ ខាងមុខនេះ ព្រមទាំងបានអនុញ្ញាតឱ្យម្ចាស់អាជីវកម្មបើកដំណើរការឡើងវិញ នូវអាជីវកម្មរបស់ខ្លួន ប៉ុន្តែត្រូវ ស្នើសុំលិខិតអនុញ្ញាត និងត្រូវរៀបចំឲ្យបានត្រឹមត្រូវទៅតាមស្តង់ដារដែលបានកំណត់ ព្រមទាំងរៀន រស់តាមគន្លងថ្មី នៃបរិបទកូវីដ-១៩ ទៀតផង។
ឯកឧត្តម រាជ សុភទ្ទ មានប្រសាសន៍ថា ក្រុមការងាររាជរដ្ឋាភិបាលចុះមូលដ្ឋានរាជធានីខេត្តបង្កើតឡើង ដើម្បីដោះស្រាយបញ្ហាប្រឈម និងសំណូមពររបស់ប្រជាពលរដ្ឋ នៅតាមមូលដ្ឋានតាមរយៈវេទិកាសាធារណៈ ហើយក្រុមការងារនេះដែរបង្កើតឡើងដោយផ្តើមចេញពីរាជរដ្ឋាភិបាលអាណត្តិទី៥ ដែលបានកំណត់ទិសដៅគោលនយោបាយនានា និងយុទ្ឋសាស្ត្រចតុកោណដំណាក់កាលទី៣ ខណៈដែលក្រោយពីការបោះឆ្នោតសកលឆ្នាំ២០១៣ រាជរដ្ឋាភិបាលពិនិត្យឃើញពីក្តីកង្វល់ជាច្រើនរបស់ប្រជាពលរដ្ឋបានដាក់សម្ពាធមកលើអាជ្ញាធរ ទើបបង្កើតក្រុមការងារនេះឡើងដើម្បីស្រង់ទិន្នន័យលើក្តីកង្វល់ សំណូមពរ និងសំណើររបស់បងប្អូនប្រជាពលរដ្ឋដើម្បីយកមកដោះស្រាយ ជាបន្តបន្ទាប់ក្រុមការងារក៍ទទួលបានប្រសិទ្ឋភាព និងលទ្ឋផលគួរជាទីពេញចិត្ត។ ក្រុមការងាររាជរដ្ឋាភិបាលចុះមូលដ្ឋានរាជធានីខេត្តនៅបន្តយន្តការការងាររបស់ខ្លួនជាបន្តទៀត ដោយឈរលើគោលការណ៍ ភាពប្រាកដប្រជា ជាក់លាក់និងទទួលខុសត្រូវ ក្រោយពីរាជរដ្ឋាភិបាលអាណត្តិទី៦ បានរៀបចំដាក់ចេញនួវគោលនយោបាយនានា និងយុទ្ឋសាស្រ្តចតុកោណទី៤ ។
ឯកឧត្តម រាជ សុភទ្ឋ មានប្រសសន៍ថា៖ក្រុមការងារ ក.រ.ម ត្រូវបានរាជរដ្ឋាភិបាលបង្កើតឡើងក្រោមគោលបំណង៣សំខាន់ៗ ទី១ លើកកំពស់ បង្ខិត និង ផ្សារភ្ជាប់រវាងមន្ត្រីរាជរដ្ឋាភិបាលជាមួយប្រជាពលរដ្ឋឱ្យកៀកជិតស្និទ្ឋបំផុតតាមរយៈវេទិកាសាធារណៈ តាមរយៈការចុះសួរសុខទុក្ខតាមខ្នងផ្ទះប្រជាពលរដ្ឋ, ទី២ ចង់ឱ្យបណ្តាវិស័យទាំងអស់របស់ថ្នាក់ជាតិពិនិត្យមើលវឌ្ឍនភាព ស្វែងរកការគាំទ្រ និងពិនិត្យកត្តាប្រឈមជាមួយប្រជាពលរដ្ឋអំពីគោលនយោបាយនានា ដែលបានផ្សព្វផ្សយជូនគាត់, ទី៣ ចង់ឱ្យក្រុមការងារនេះធ្វើការបូកសរុបទាំងក្តីកង្វល់ សំណើរ សំណូមពរនានា និងបញ្ហាប្រឈមទាំងឡាយរបស់ប្រជាពលរដ្ឋ ដើម្បីធ្វើការឆ្លើយតបនិងដោះស្រាយ។រីឯតួនាទីរបស់ក្រុមការងារ ក.រ.ម មានបេសកកម្មដើម្បីត្រួតពិនិត្យ និងគាំទ្រគោលនយោបាយនានា និងយុទ្ឋសាស្ត្រចតុកោណរបស់រាជរដ្ឋាភិបាល។ ឯកឧត្តម បានលើកឡើងផងដែរអំពីគោលការណ៍គ្រឺះនៃការរៀបចំក្រុមការងារគ្រប់លំដាប់ថ្នាក់។
ឯកឧត្តមមានប្រសាសន៍បន្តថា ក្នុងរាជរដ្ឋាភិបាលអាណត្តិទី៦ ទាមទារឱ្យក្រុមការងាររាជរដ្ឋាភិបាលចុះខេត្តនីមួយៗ ត្រូវរៀបចំបណ្តាញក្រុមការងារឱ្យមានរចនាសម្ព័ន្ឋគ្រប់បណ្តាអង្គភាពស្ថាប័ននានាទៅតាមជំនាញ និងវិស័យសម្រាប់ចុះទៅតាមមូលដ្ឋាននីមួយៗ។ ក្រុមការងារលេខាធិការដ្ឋានថ្នាក់រាជធានី ខេត្តក្រុងស្រុកឃុំសង្កាត់មានតួនាទីនិងភារកិច្ចសំខាន់៣ ទី១ ជាអ្នកសម្រាបសម្រួលរាល់កិច្ចប្រជុំទាំងអស់របស់ក្រុមការងារ ទី២ ការរៀបចំបំពេញបន្ថែមនូវក្រុមការងារទាំងអស់ទៅតាមវិស័យជំនាញ តាមកម្រិតថ្នាក់រាជធានីខេត្តក្រុងស្រុក ឃុំសង្កាត់ និងទី៣ បូកសរុបនូវរាល់របាយការណ៍ទាំងឡាយ របស់ក្រុមការងារសម្រាប់ថ្នាក់នីមួយៗ។ ក្រៅពីភារកិច្ច៣នេះលេខាធិការដ្ឋានអនុវត្តទៅតាមយន្តការនៃសភាពការណ៍ជាក់ស្តែងនៃនយោបាយរបស់រាជរដ្ឋាភិបាល។
កិច្ចប្រជុំបានបង្ហាញអំពីលទ្ឋផលការងារប្រចាំឆ្នាំ២០២០ និងទិសដៅអនុវត្តបន្ត និងមតិណែនាំរបស់មន្ត្រីលេខាធិការដ្ឋានក្រុមការងាររាជរដ្ឋាភិបាលចុះមូលដ្ឋានរាជធានីខេត្ត និងពិភាក្សាលើរបាយការណ៍សម្រាប់ក្រុមការងារតាមមូលដ្ឋានក្រុងស្រុក និងយន្តការសំខាន់ៗមួយចំនួនដើម្បីប្រមូលធាតុចូលសម្រាប់ ឱ្យយន្តការនៃការងារទាំងអស់ ដំណើរការទៅរលូន៕
អត្ថបទ និង រូបភាព៖ លោក យូ វង្ស
