កាលពីរសៀលថ្ងៃ០៤ ខែវិច្ឆិកា ឆ្នាំ២០២១នេះ លោក ង៉ាន់ ភិរុណ អភិបាលរងខេត្តសៀមរាប និងជាប្រធានក្រុមការងារខេត្តចុះជួយស្រុកបន្ទាយស្រី បាននាំយកនូវគ្រឿងឧបភោគបរិភោគ សម្ភារ:ប្រើប្រាស់ និងថវិកា ដែលជាអំណោយសប្បុរសធម៌របស់សម្តេចពិជ័យសេនា ទៀ បាញ់ ឧបនាយករដ្ឋមន្ត្រី រដ្ឋមន្ត្រីក្រសួងការពារជាតិ និងជាប្រធានក្រុមការងារថ្នាក់ជាតិ ចុះជួយមូលដ្ឋានខេត្តសៀមរាប មកប្រគល់ជូនដល់ក្រុមគ្រួសារកុមារាក្រីក្រ ឈ្មោះ គង់ សីហា ស្ថិតនៅក្នុងភូមិត្មាតពង ឃុំរុនតាឯក ស្រុកបន្ទាយស្រី ខេត្តសៀមរាប ដែលជាគ្រួសារមួយមានជីវភាពខ្វះខាតខ្លាំង ដោយមានឳពុកម្តាយជាកសិករដើរស៊ីឈ្នួល និងជួលដីស្រែគេធ្វើ មូលហេតុតែមិនមានដីស្រែចម្ការផ្ទាល់ខ្លួនសម្រាប់ធ្វើនោះទេ។
លោក ង៉ាន់ ភិរុណ បានមានប្រសាសន៍ថា ដោយមើលឃើញពីទុក្ខលំបាក របស់កុមារាក្រីក្រ និងក្រុមគ្រួសារ ឈ្មោះ គង់ សីហា ដែលថ្មីៗនេះ សាធារណជនបានដឹង ដោយសារតែកុមារានេះមកសាលារៀន ដើម្បីចូលរៀនថ្ងៃដំបូងរបស់គាត់ គ្មានស្បែកជើងពាក់ និងពាក់កាតចាក់វ៉ាក់សាំងបង្ការជំងឺកូវីដ-១៩ ដោយប្រើថង់ប្លាស្ទិកនោះ ហើយ បន្ទាប់ពីគេបានបង្ហោះផ្សាយនៅលើបណ្តាញសង្គមហ្វេសប៊ុករបស់អង្គការមួយនោះ។ ទើបសម្តេចពីជ័យសេនា ទៀបាញ់ ឧបនាយករដ្ឋមន្ត្រី និងជារដ្ឋមន្ត្រីក្រសួងការពារជាតិ បានចាត់រូបលោក និងក្រុមការងារថ្នាក់ខេត្តចុះជួយស្រុកបន្ទាយស្រីនាំអំណោយមួយចំនួនរួមមាន៖ អង្ករ ១០០គ.ក្រ, ទឹកស៊ីអ៊ីវ ៥យួរ, ទឹកត្រី ៥យួរ, ត្រីខកំប៉ុង ១កេះធំ, មី ១កេះធំ, ម៉ាស់ ៥០០ម៉ាស់, អាកុលលាងដៃ ១០ដប, ទឹកសុទ្ធ ១០យួរ និងថវិកាចំនួន ៤លានរៀល ដើម្បីមកប្រគល់ជូនដល់ក្រុមគ្រួសាររបស់កុមារាគង់សីហា។
ក្នុងឱកាសនោះដែរ លោក ង៉ាន់ ភិរុណ ក៏បានពាំនាំប្រសាសន៍ផ្តាំផ្ញើសាកសួរសុខទុក្ខពីសំណាក់សម្តេចពិជ័យសេនាទៀ បាញ់ នូវក្តីអាណិតអាសូរដល់កុមារតូចៗ និងក្រុមគ្រួសារ ជាពិសេស កុមារដែលគ្រួសារមានជីវភាពខ្វះខាត តែតស៊ូក្នុងការសិក្សារៀនសូត្រ ដោមិនបោះបង់ ឬចុះចាញ់ការលំបាកទោះក្នុងកាលៈទេសៈ ក្រីក្រយ៉ាងណាក៏ដោយ។ ចំពោះគ្រឿងឧបភោគបរិភោគ សម្ភារ:ប្រើប្រាស់ និងថវិកា ទាំងអស់នេះ ដែលសម្តេចពិជ័យសេនា បានឧបត្ថម្ភនាពេលនេះ គឺសម្រាប់ដោះស្រាយជីវភាពរស់នៅប្រចាំថ្ងៃ ការរៀបចំស្ថានភាពគ្រួសារឱ្យល្អប្រសើរ និងផ្គត់ផ្គង់ដល់ការរៀនសូត្ររបស់ក្មួយប្រុស និងក្រុមគ្រួសារបន្តទៀត។
បន្ថែមពីនេះទៀតលោក ង៉ាន់ ភិរុណ ក៏មានប្រសាសន៍ផ្តាំផ្ញើ និងសូមឱ្យឪពុកម្តាយរបស់កុមារាគង់សីហា ត្រូវធានាឱ្យបានពីអនាគត នៃការសិក្សារបស់កូនៗ ក៏ដូចជាយកឱកាសដ៏កម្រនេះរៀបចំអនាគត់គ្រួសារ និងមុខរបរប្រចាំជីវិតរបស់ខ្លួនឱ្យបានត្រឹមត្រូវ ប្រយត្ន័ប្រយែងផង និងសូមអោយកុមារាគង់ សីហា ត្រូវតែខិតខំប្រឹងប្រែងរៀនសូត្រ និងតស៊ូជំនះលើភាពក្រីក្រ លើកស្ទួយកិត្តិយសគ្រួសារ ហ៊ានកែប្រែជោគវាសនារបស់ខ្លួន និងក្លាយជាតំណាង នៃភាពជោគជ័យសម្រាប់ឱ្យកុមារដទៃទៀត ដែលមានជីវភាពលំបាកដូចជាក្មួយអាចសំឡឹងមើលមកក្មួយជានិមិត្តរូបរបស់ពួកគេ និងអាចយកគំរូជាកុមារល្អ យុវជនល្អ នៅក្នុងសង្គមជាតិផងដែរ៕
អត្ថបទ និងរូបភាព៖ លោក ទ្រា ពន្លឺ, លោក ស៊ាន សុផាត
កែសម្រួល៖ លោក លីវ សុខុន
