ឯកឧត្តមអភិបាលខេត្តសៀមរាប អនុញ្ញាតឱ្យប្រធានការិយាល័យកុងស៊ុលជប៉ុនប្រចាំនៅខេត្តសៀមរាប ដែលផុតអាណត្តិចូលជួបសម្តែងការគួរសម និងជម្រាបលា

លោក Mitori Naoki មានប្រសាសន៍ថា ក្នុងអាណត្តិរបស់លោក លោកសូមសម្តែងនូវក្តីរីករាយនិងកត់សម្គាល់ឃើញថា មិត្តភាពរវាងប្រទេសជប៉ុននិងកម្ពុជា ពិតមានទំនាក់ទំនងជាមួយគ្នាជាយូរលង់ណាស់មកហើយ ហើយប្រទេសយើងទាំងពីរបានរួមសហការគ្នាលើគ្រប់វិស័យ ទទួលបានការរីកចម្រើនរហូតមកដល់សព្វថ្ងៃ ដោយឡែកកម្ពុជាក៍បាននឹងកំពុងទទួលបានការអភិវឌ្ឍនិងរីកចម្រើនលូតលាស់លើគ្រប់ផ្នែកគ្រប់វិស័យគួរឱ្យស្ងប់ស្ងែងនិងកោតសរសើរ។

មានប្រសាសន៍ក្នុងឱកាសនោះឯកឧត្តម ទៀ សីហា អភិបាលខេត្តសៀមរាប បានថ្លែងអំណរគុណយ៉ាងជ្រាលជ្រៅចំពោះលោក MITORI Naoki ប្រធានការិយាល័យកុងស៊ុលជប៉ុនខេត្តសៀមរាប ដែលកន្លងមក លោកនិងសហការី តែងតែសហការ និងជួយជ្រោមជ្រែង លើកិច្ចសហការប្រតិបត្តិការ ជាពិសេសគម្រោងអភិវឌ្ឍក្នុងខេត្តសៀមរាប ដូច្នេះចំពោះការងារកិច្ចសហប្រតិបត្តិការ យើងផ្តើមចេញពីទំនាក់ទំនងដែលមានផ្លែផ្កានេះហើយ ទើបយើងទទួលបានលទ្ធផលគួរឲ្យកត់សម្គាល់ ។

ក្នុងឱកាសនោះដែរ លោក KAWAGUCHI Maski ប្រធានការិយាល័យកុងស៊ុលជប៉ុនប្រចាំខេត្តសៀមរាប ដែលត្រូវទទួលតួនាទីបន្តនោះ បានសន្យាបន្តរឹតចំណងកិច្ចសហប្រតិបត្តិការល្អរវាងប្រទេសទាំង២ កម្ពុជា-ជប៉ុន ជាពិសេសជំរុញការផ្សព្វផ្សាយវិស័យទេសចរណ៍ និងវិស័យផ្សេងៗទៀត ស្របពេលដែលខេត្តសៀមរាប នឹងត្រូវបើកខេត្តឡើងវិញ នៅដើមខែមករា ឆ្នាំ២០២២ ខាងមុខនេះ ។

គួររំលឹកថាខេត្តសៀមរាបបានចងសម្ព័ន្ធមេត្រីភាពជាមួយខេត្ត-ក្រុងចំនួន ០៣ របស់ជប៉ុន រួមមាន៖ ក្រុងកូតា (kota) នៃខេត្តអាយធំ បានចុះហត្ថលេខារួមគ្នាលើអនុស្សរណៈនៃការយោគយល់គ្នា កាលពីថ្ងៃទី១៨ ខែវិច្ឆិកា ឆ្នាំ២០១០ , ខេត្តខាណាហ្គាវ៉ា (Kanagawa) បានចុះហត្ថលេខារួមគ្នាលើអនុស្សរណៈនៃការយោគយល់គ្នា កាលពីថ្ងៃទី០៥ ខែវិច្ឆិកា ឆ្នាំ២០១៥ និង ក្រុងកូម៉ាត់ស៊ុយ (Komatsu) បានចុះហត្ថលេខារួមគ្នាលើលិខិតផ្តួចផ្តើមស្តីពីការបង្កើតសម្ព័ន្ធមេត្រីភាព កាលពីថ្ងៃទី២៥ ខែតុលា ឆ្នាំ២០១៦ ក្នុងគោលបំណងផ្តោតសំខាន់លើវិស័យកសិកម្ម អប់រំ សង្គមកិច្ច សុខាភិបាល ការងាររដ្ឋបាលសាធារណៈ វិស័យវប្បធម៌ សេដ្ឋកិច្ច បរិស្ថាន និងទេសចរណ៍ ៕

អត្ថបទ និង រូបថត ៖ លោក ស៊ាន សុផាត និង លោក យូ វង្ស

កែសម្រួលអត្ថបទ ៖ លោក លីវ សាន្ត