ថ្លែងនៅក្នុងកិច្ចប្រជុំផ្សព្វផ្សាយ ស្តីពី “ការទទួលទេសចរអន្តរជាតិ និងអ្នកដំណើរដែលបានចាក់វ៉ាក់សាំងកូវីដ-១៩ ពេញលេញ ចូលក្នុងព្រះរាជាណាចក្រកម្ពុជា” ដែលរៀបចំឡើងដោយក្រសួងទេសចរណ៍ នាព្រឹកថ្ងៃទី១៧ ខែវិច្ឆិកា ឆ្នាំ២០២១ ឯកឧត្តម ទៀ សីហា អភិបាលខេត្តសៀមរាប មានប្រសាសន៍ថា ដើម្បីឱ្យខេត្តសៀមរាប ស័ក្តិសមជាខេត្តប៉ូលទេសចរណ៍មួយដ៏សំខាន់ របស់ព្រះរាជាណាចក្រកម្ពុជា ក៏ដូចជាការទាក់ទាញភ្ញៀវទេសចរជាតិ-អន្តរជាតិ ឱ្យមកទស្សនាកម្សាន្តក្នុងខេត្ត នាពេលខាងមុខនេះ បានកាន់តែច្រើន បច្ចុប្បន្ននេះរដ្ឋបាលខេត្ត អាជ្ញាធរជាតិអប្សរា រដ្ឋបាលក្រុងសៀមរាប និងមន្ទីរ-អង្គភាពជំនាញ កំពុងជម្រុញ និងយកចិត្តទុកដាក់លើការកែលម្អ សោភ័ណភាពក្នុងក្រុងឱ្យបានកាន់តែល្អប្រសើរ ពិសេសលើផ្នែកហេដ្ឋារចនាសម្ព័ន្ធ ការបំពាក់ប្រព័ន្ធបំភ្លឺសាធារណៈ ការរៀបចំប្រព័ន្ធបណ្តាញលូទឹកភ្លៀង និងទឹកកខ្វក់ ភ្លើងសញ្ញាចរាចរណ៍ កាមេរ៉ាសុវត្ថិភាព និងការដាំដើមឈើ ការរៀបចំសួនច្បារ ការដាក់ឈ្មោះផ្លូវ ការរៀបចំសណ្តាប់ធ្នាប់ សាធារណៈ និងការរៀបចំកែលម្អ នៅតាមតំបន់រមណីយដ្ឋានអង្គរ។
ឯកឧត្តម ទៀ សីហា មានប្រសាសន៍ទៀតថា តាមរយៈការកែលម្អហេដ្ឋារចនាសម្ព័ន្ធក្នុងក្រុងសៀមរាប នឹងជំរុញដល់ការលើកកម្ពស់សោភ័ណភាពក្រុង ពិសេសបានរួមចំណែកយ៉ាងខ្លាំងដល់វិស័យទេសចរណ៍ក្នុងខេត្តសៀមរាប កាន់តែល្អប្រសើរថែមទៀត។ ជាពិសេសរដ្ឋបាលខេត្តសៀមរាប បានកំពុងសិក្សា និងរៀបចំទីក្រុងសៀមរាប ជាទីក្រុងឆ្លាតវៃអាស៊ាន (SMART CITY) ក្រោមកិច្ចសហប្រតិបត្តិការបច្ចេកទេសពីទីភ្នាក់ការងារសហប្រតិបត្តិការអន្តរជាតិជប៉ុន (JICA) ដើម្បីរៀបចំផែនការអភិវឌ្ឍទីក្រុងឆ្លាតវៃក្រុងសៀមរាប ដោយផ្តោតទៅលើការដោះស្រាយនូវវិស័យចំនួន ៤គឺ ១.វិស័យទេសចរណ៍ឆ្លាតវៃ, ២.វិស័យចល័តឆ្លាតវៃ, ៣.វិស័យសន្តិសុខឆ្លាតវៃ និង៤.វិស័យគ្រប់គ្រងសំណល់ឆ្លាតវៃ។
ឯកឧត្តម ទៀ សីហា បន្ថែមថា ដើម្បីជាឱកាសសម្រាប់ត្រៀមលក្ខណៈទទួលភ្ញៀវទេសចរជាតិ-អន្តរជាតិ រយៈពេលវែង ក្រោមការដឹកនាំដ៏ត្រឹមត្រូវរបស់សម្តេចតេជោនាយករដ្ឋមន្ត្រី បានផ្តល់គម្រោងស្ថាបនាហេដ្ឋារចនាសម្ព័ន្ធផ្លូវ ចំនួន ៣៨ខ្សែ ក្នុងក្រុងសៀមរាប ដោយគិតត្រឹមថ្ងៃទី១០ ខែវិចិ្ឆកានេះ សម្រេចបានលទ្ធផលចំនួន ៩០% និងគម្រោងការស្តារ-កែលម្អដងស្ទឹងសៀមរាប សម្រេចបានចំនួន ៦៦%។ ទន្ទឹមនឹងនេះ ដោយមានសំណើសុំពីសម្តេចពិជ័យសេនា ទៀ បាញ់ ឧបនាយករដ្ឋមន្ត្រី រដ្ឋមន្ត្រីក្រសួងការពារជាតិ និងជាប្រធានគណៈកម្មការអន្តរក្រសួង សម្តេចតេជោនាយករដ្ឋមន្ត្រី បានឯកភាពផ្តល់គម្រោងចំនួន ២បន្ថែមទៀត គឺការតភ្ជាប់បណ្តាញលូទឹកភ្លៀង និងទឹកកខ្វក់ចូលផ្ទះប្រជាពលរដ្ឋដោយឥតគិតថ្លៃ និងការធ្វើចំណតរថយន្តតាមបណ្តោយផ្លូវជាតិលេខ៦ ដោយចាក់ជាបេតុង។
សូមជំរាបដែរថា កិច្ចប្រជុំផ្សព្វផ្សាយ ស្តីពី “ការទទួលទេសចរអន្តរជាតិ និងអ្នកដំណើរដែលបានចាក់វ៉ាក់សាំងកូវីដ-១៩ ពេញលេញ ចូលក្នុងព្រះរាជាណាចក្រកម្ពុជា នៅព្រឹកនេះដែរ ប្រព្រឹត្តិទៅក្រោមអធិបតីភាព ឯកឧត្តមបណ្ឌិត ថោង ខុន រដ្ឋមន្ត្រីក្រសួងទេសចរណ៍ ឯកឧត្តម ទៀ សីហា អភិបាលខេត្តសៀមរាប ដោយមានវត្តមាន អញ្ជើញចូលរួមរបស់ ឯកឧត្តម សមាជិកក្រុមប្រឹក្សាខេត្ត ឯកឧត្តម លោកជំទាវ លោក លោកស្រី រដ្ឋលេខាធិការ អនុរដ្ឋលេខាធិការ អគ្គនាយក អគ្គនាយករង ប្រធាន អនុប្រធាននាយកដ្ឋាន នៃក្រសួងទេសចរណ៍ លោក លោកស្រី ប្រធានមន្ទីរ-អង្គភាពជុំវិញខេត្ត អភិបាល អភិបាលរងក្រុងស្រុក ទាំង១២នៃខេត្តសៀមរាបផងដែរ៕
អត្ថបទ និង រូបភាព៖ លោក យូ វង្ស
កែសម្រួល៖ អ៊ុន ណារាជ្យ
