ជាការចូលរួមចំណែករំលែកទុក្ខជាមួយក្រុមគ្រួសារនៃសព នៅព្រឹកថ្ងៃទី១៧ ខែវិច្ឆិកា ឆ្នាំ២០២១ ឯកឧត្តម រដ្ឋមន្រ្តី ខៀវ កាញារីទ្ធ បានដឹកនាំប្រតិភូក្រសួងព័ត៌មាន អញ្ជើញទៅធ្វើការគោរពវិញ្ញាណក្ខន្ធសព ឯកឧត្តម រស សែ ទីប្រឹក្សាក្រសួងព័ត៌មាន និងជាអតីតប្រធានមន្ទីរព័ត៌មានខេត្តកំពត ដែលត្រូវបានក្រុមគ្រួសារតម្កល់ធ្វើបុណ្យនៅគេហដ្ឋាន ស្ថិតនៅទីរួមខេត្តកំពត។
ឯកឧត្តម រស សែ បានទទួលមរណភាព កាលពីថ្ងៃទី១៥ ខែវិច្ឆិកា ឆ្នាំ២០២១កន្លងទៅ ក្នុងជន្មាយុ ៦៩ឆ្នាំ ដោយរោគាពាធ។ តាមរយៈជីវសង្ខេប ឯកឧត្តម រស សែ កាលពីមុនជាអតីតលេខាសម្ព័ន្ធយុវជនប្រជាជនបដិវត្តន៍កម្ពុជាខេត្តកំពត សម័យទសវត្សរ៍ឆ្នាំ៨០ និងបានបំពេញការងារនៅមន្ទីរឃោសនាវិទ្យុ ព័ត៌មានខេត្ត កាលពីជំនាន់នោះ ហើយក្រោយមកធ្វើនៅមន្ទីរព័ត៌មានខេត្តកំពត ក្លាយជាប្រធានមន្ទីរ រហូតចូលនិវត្តន៍ និងបន្តតូនាទីជាទីប្រឹក្សាក្រសួងព័ត៌មាន។
នៅក្នុងឱកាសដ៏ក្រៀមក្រំនេះឯកឧត្តម រដ្ឋមន្រ្តី ខៀវ កាញារីទ្ធ ក្នុងនាមថ្នាក់ដឹកនាំ និងមន្ត្រីរាជការនៃក្រសួងព័ត៌មាន និងក្នុងនាមឯកឧត្តមផ្ទាល់ មានសេចក្តីក្រៀមក្រំ ក្នុងចិត្តឥតឧបមា ដោយបានទទួលដំណឹងថា ឯកឧត្តម រស សែ ទីប្រឹក្សាក្រសួងព័ត៌មាន និងជាអតីតប្រធានមន្ទីរព័ត៌មានខេត្តកំពត ត្រូវជាស្វាមីរបស់លោកជំទាវ ប៉ុក ណែត បានទទួលមរណភាពទៅហើយ។ មរណភាព ឯកឧត្តម រស សែ គឺជាការបាត់បង់នូវមន្ត្រីដែលមានស្នាដៃមួយរូប ដែលត្រូវជាស្វាមី និងក្រុមគ្រួសារ ជាបិតា បិតាក្មេក និងជាជីតា ជាទីគោរពស្រឡាញ់បំផុតរបស់ក្រុមគ្រួសារទាំងអស់នៃសព ដែលជានិច្ចកាលតែងបាន លះបង់ខ្ពស់ទាំងកម្លាំង កាយ ចិត្ត និងបញ្ញាស្មារតី ក្នុងការបីបាច់ថែរក្សាកូនៗជាទីស្រឡាញ់ និងបានចូលរួម ចំណែកយ៉ាងធំធេងនៅក្នុងវិស័យព័ត៌មាន និងសោតទស្សន៍ ក្នុងការបម្រើជាតិ និងប្រជាពលរដ្ឋ ។
ថ្នាក់ដឹកនាំ និងមន្ត្រីរាជការទាំងអស់នៃក្រសួងព័ត៌មាន សូមសម្ដែងនូវការសោកស្តាយជាអនេក ចំពោះការបាត់បង់មន្ដ្រីដ៏ឆ្នើម និងជាទីគោរព ដែលពេញមួយជីវិតរបស់ ឯកឧត្តម បានចូលរួមយ៉ាងសកម្មក្នុងវិស័យព័ត៌មាន និងសោតទស្សន៍ក្នុងការបម្រើប្រទេសជាតិ និងប្រជាពលរដ្ឋ ប្រកបដោយប្រសិទ្ធភាពខ្ពស់។ ជាថ្មីម្តងទៀត សូមចូលរូមរំលែកទុក្ខដ៏ក្រៀមក្រំ ជាមួយលោកជំទាវ ព្រមទាំងក្រុមគ្រួសារ និងញាតិមិត្តទាំងអស់នៃសព ហើយសូមបួងសួងឲ្យវិញ្ញាណក្ខ័ន្ធសព ឯកឧត្តម រស សែ ជាទីគោរពស្រឡាញ់ បានទៅសោយសុខក្នុងសុគតិភពកុំបីឃ្លៀងឃ្លាតឡើយ៕
អត្តបទនិងរូបភាព៖ទូរទស្សន៍ជាតិកម្ពុជា
