នៅថ្ងៃទី១៨ ខែវិច្ឆិកា ឆ្នាំ២០២១នេះ ឯកឧត្តម ខៀវ កាញារីទ្ធ រដ្ឋមន្រ្តី ក្រសួងព័ត៌មាន និងជាប្រធានក្រុមការងារថ្នាក់កណ្តាលចុះជួយស្រុកកោះសូទិន ខេត្តកំពង់ចាម បានដឹកនាំកិច្ចប្រជុំផ្សព្វផ្សាយផែនការសកម្មភាពជាក់ស្តែង ឆ្ពោះទៅកាន់ការបោះ ឆ្នោតជ្រើសរើសក្រុមប្រឹក្សា ឃុំ សង្កាត់ អាណត្តិទី៥ ឆ្នាំ ២០២២ សម្រាប់ថ្នាក់ដឹកនាំមន្រ្តីរាជការ អាជ្ញាធរដី គ្រប់លំដាប់ថ្នាក់ ក្នុងស្រុកកោះសូទិន ខេត្តកំពង់ចាម។
តាមរបាយការណ៏របស់លោក យី វណ្ណះ អភិបាលស្រុកកោះសូទិន ខេត្តកំពង់ចាម បានអោយដឹងថា បន្ទាប់ពីទទួលបានផែនការណ៍រួមឆ្ពោះ ទៅកាន់ការបោះឆ្នោត ជ្រើសរើសក្រុមប្រឹក្សាឃុំ អាណត្តិទី៥ ឆ្នាំ២០២២ រួមមក អាជ្ញាធរស្រុកបានជម្រុញអោយគ្រប់មូលដ្ឋានឃុំ ដាក់ចេញនូវផែនការសកម្មភាពរួមរបស់ឃុំនីមួយៗ បានរួចរាល់។ ទន្ទឹមនេះបានជម្រុញបង្កើតសកម្មភាពការងារសំខាន់ៗជាច្រើនទៀត ពិសេសដំណើរការនៃការអភិវឌ្ឍ ភូមិឃុំស្រុក អោយកាន់តែរីចំរើន ព្រមជាមួយនឹងការរក្សាសន្តិសុខសណ្តាប់ធ្នាប់សាធារណ: បានកាន់តែប្រសើរបន្ថែមទៀត។
ឯកឧត្តម រដ្ឋមន្រ្តី ខៀវ កាញារីទ្ធ មានប្រសាសន៏លើកឡើងថា ការបោះ ឆ្នោតជ្រើសរើសក្រុមប្រឹក្សាឃុំសង្កាត់ គឺកាន់តែខិតជិតមកដល់ហើយ ដែលជាការដ៏សំខាន់សម្រាប់ទាំងអស់គ្នា ពិសេសអាជ្ញាធរដែនដីទាំងអស់ ត្រូវត្រៀមលក្ខណៈបំពេញអោយបានល្អ ហើយត្រូវប្តូររបៀបរបបធ្វើការងារចាស់ចេញ ដើម្បីអោយបានរហ័ស និងប្រសិទ្ធិភាពខ្ពស់ ក្តាប់អោយបានពីអ្វីដែលមានការប្រែប្រួលក្នុងមូលដ្ឋានរបស់ខ្លួននីមួយៗ។ ក្នុងរយ:កន្លងមកនេះឯកឧត្តម បានអោយបណ្តាឃុំទាំង៨ ក្នុងស្រុកកោះសូទិន ខេត្តកំពង់ចាម បង្កើតជាមួយផេកសម្រាប់ឃុំនីមួយៗ ដើម្បីធ្វើការផ្តាស់ប្តូរបទពិសោធន៏គ្នា ការផ្ទេរព័ត៌មានទៅវិញទៅមកបានរហ័ស ដើម្បីនៅពេលបំពេញកិច្ចការផ្ទាល់ គឺទទួលបានលទ្ធផលល្អ មានផលប្រយោជន៏ និងប្រសិទ្ធិភាពជាងមុន។ ឆ្លៀតក្នុងឱកាសនោះ ឯកឧត្តម ខៀវ កាញារីទ្ធ បានរំលឹកអាជ្ញាធរដែន មន្រ្តីគ្រប់លំដាប់ថ្នាក់ ត្រូវបន្តពង្រឹងសាមគ្គីភា ផ្ទៃក្នុងអោយបានកាន់តែល្អ ត្រូវកសាងមិត្តថ្មី កសាងកំលាំងថ្មី ដោយថែរក្សាកំលាំងចាស់ដដែលដោយមិនមានការបោះបង់ចោលនោះទេ។
ក្នុងឱកាសនោះដែរ ឯកឧត្តម បានផ្តល់ថវិកាដល់ អស់លោកលោកស្រី អញ្ជើញចូលរួមក្នុងកិច្ចប្រជុំចំនួន ៥៦នាក់ ក្នុងម្នាក់ ២ម៉ឺនរៀល ឧបត្តម្ភដល់ស្រុកកោះសូទិន ១លានរៀល។ ចំពោះប្រជាពលរដ្ឋដែលកំពុងធ្វើចត្តាឡីស័កនៅផ្ទះចំនួន ៤គ្រួសារ ទទួលបានថវិកាសរុប ៥៤ម៉ឺនរៀល។
ប្រភព៖ ទូរទស្សន៍ជាតិកម្ពុជា
