ការរៀបចំជាផ្សារបន្លែសុវត្ថិភាពសម្រាប់ម្ហូបអាហារនៅក្នុងក្រុងសៀមរាប ដែលបានដាក់តាំងលក់នៅសួនកំសាន្ត ខាងជើងព្រះរាជដំណាក់ក្នុងក្រុងសៀមរាប នាព្រឹកថ្ងៃទី១៨ ខែកក្កដា ឆ្នាំ២០២០នេះ ដែលគាំទ្រដោយអាជ្ញាធរខេត្ត , មន្ទីរពាណិជ្ជកម្មខេត្ត , មន្ទីរកសិកម្ម រុក្ខាប្រមាញ់និងនេសាទខេត្ត និង ក្រសួងកសិកម្ម រុក្ខាប្រមាញ់និងនេសាទ កំពុងទទួលការចាប់អារម្មណ៍ពីសំណាក់ប្រជាពលរដ្ឋក្នុងក្រុងសៀមរាប ដោយសារបងប្អូនប្រជាពលរដ្ឋយ៉ាងច្រើនកុះករ បាននាំគ្នាមកទិញបន្លែធម្មជាតិនៅតំបន់នេះ ស្របពេលដែលកំពុងមានការបញ្ជុះតម្លែរហូតដល់ ៥០ភាគរយ ដែលមានរយៈពេល២ថ្ងៃ គឺថ្ងៃទី២០ និង២១ ខែវិច្ឆិកា ឆ្នាំ២០២១ ចាប់ពីម៉ោង ៧:០០នាទី រហូតដល់ម៉ោង ១១:០០នាទីថ្ងៃត្រង់។
លោក ភឿន គឹមលី ប្រធានមន្ទីរពាណិជ្ជកម្មខេត្តសៀមរាប មានប្រសាសន៍ថា ផ្សារបន្លែសុវត្ថិភាពចុងសបា្តហ៍ បានការបើកឲ្យដំណើរការឡើងអស់រយ:ពេលជាង ៣ឆ្នាំមកហើយ។ ទីតាំងផ្សារបន្លែសុវត្ថិភាពចុងសបា្តហ៍នេះ យើងបានអនុវត្តល្អតាមការណែនាំរបស់ក្រុមការងារ ក៏ដូចជាអាជ្ញាធរពាក់ព័ន្ធ ដើម្បីរៀបចំក្នុងគោលបំណងជួយជម្រុញទីផ្សារ បន្លែសុវត្ថិភាពរបស់សហគមន៍នៅតាមបណ្តាស្រុក-ក្រុង ក្នុងខេត្តសៀមរាបនេះ ឲ្យកាន់តែមានភាពល្អប្រសើរថែមទៀត និងជំរុញការគាំទ្រផលិតផលបន្លែរបស់កសិករខ្មែរ ឲ្យមានទីផ្សារ និងបង្កើនប្រាក់ចំណូលរបស់សហគមន៍ និងប្រជាពលរដ្ឋនៅមូលដ្ឋានផ្ទាល់តែម្តង។ ជាពិសេសនោះ គឺមានការពេញចិត្តពីប្រជាពលរដ្ឋ ក្នុងការប្រើប្រាស់ និងបរិភោគដែលអាចកាត់បន្ថយការនាំចូលបន្លែផងដែរ។
លោក ភឿន គឹមលី បានបន្តថា បច្ចុប្បន្នមន្ទីរពាណិជ្ជកម្មខេត្តសៀមរាប ជាខេត្តតភ្ជាប់នៃមណ្ឌលភូមិភាគពាយព្យ នៃគម្រោង អេមស៍ (AIMS) កំពុងជំរុញការផ្សារភ្ជាប់ក្រុមកសិករទៅនឹងទីផ្សារ ដែលបានអនុវត្តន៍លើផលិតផលមាន់ស្រែ និងសហគមន៍បន្លែសុវត្ថិភាព ចូលរួមមកពីស្រុកចំនួន៧ គឺស្រុកជីក្រែង ស្រុកស្វាយលើ ស្រុកបន្ទាយស្រី ស្រុកសូទ្រនិគម ស្រុកប្រាសាទបាគង ស្រុកពួក និងក្រុងសៀមរាប ដោយបានសហការជាមួយមន្ទីរកសិកម្មខេត្ត សភាពាណិជ្ជកម្ម គម្រោងលាភ គម្រោង ASPIRE និងដៃគូរផ្សេងៗទៀត។ លោកក៏បានលើកទឹកចិត្តដល់កសិករឱ្យខិតខំពង្រីក ការដាំដុះបន្លែសុវត្ថិភាពឱ្យបានកាន់តែច្រើន ទៅតាមតម្រូវការទីផ្សារនៅក្នុងប្រទេស និងក្រៅប្រទេសជាដើម។
អត្ថបទ និង រូបភាព៖ ស៊ាន សុផាត
