នៅថ្ងៃទី១២ ខែធ្នូ ឆ្នាំ២០២១ ក្រសួងធម្មការ និងសាសនា សហការគាំទ្រដោយអង្គការយូនីសេហ្វបានរៀបចំពិធីប្រគេនវិញ្ញាបនបត្រព្រះសង្ឃគ្រូបង្គោលកិច្ចការពារកុមារ យុទ្ធនាការគ្រួសាររឹងមាំប្រចាំខេត្តសៀមរាប ក្រោមអធិបតីភាព ឯកឧត្តម បណ្ឌិត សេង សុមុនី រដ្ឋលេខាធិការក្រសួងធម្មការនិងសាសនា និងព្រះវត្តមាននិមន្តជាអធិបតី ព្រះពិជ័យរង្សី បណ្ឌិត ឡាច លាង ព្រះធម្មធរគណខេត្ត ព្រះអនុគណក្រុងសៀមរាប និងជាព្រះចៅអធិការវត្តទេពពោធិវង្ស រួមជាមួយព្រះថេរានុត្ថេរៈ ជាសិក្ខាកាមប្រមាណជា៦០អង្គ។
ព្រះពិជ័យរង្សី បណ្ឌិត ឡាច លាង ក្នុងនាមសាលាអនុគណក្រុងមានសង្ឃដិកា បង្ហាញការគាំទ្រ និងចាត់ទុកការចូលរួមរបស់ព្រះសង្ឃក្នុងការជួយអប់រំដល់ប្រជាពុទ្ឋបរិស័ទក្នុងសង្គមជាបញ្ហាសំខាន់ ព្រោះថាព្រះសង្ឃជាស្រែបុណ្យរបស់អ្នកគោរព និងជឿកាន់ព្រះពុទ្ឋសាសនា អាចជួយពន្យល់អប់រំដល់ញាតិញោមបានគ្រប់ទីកន្លែង និងគ្រប់ពេលវេលា។ ឯកឧត្តម បណ្ឌិត សេង សុមុនី បាននាំយកប្រសាសន៍ផ្តាំផ្ញើពីសំណាក់ឯកឧត្តម ឈិត សុខុន រដ្ឋមន្ត្រីក្រសួងធម្មការនិងសាសនា ដល់ព្រះតេជគុណគ្រប់ព្រះអង្គដែលជាសិក្ខាកាម សូមជួយបន្តការអប់រំផ្សព្វផ្សាយដល់ប្រជាពុទ្ឋបរិស័ទចំណុះជើងវត្ត ទាំងក្រៅ និងក្នុងវត្ត ឱ្យបានជាប្រចាំ។ ពាក់ព័ន្ឋទៅនឹងអំពើហិង្សាក្នុងគ្រួសារមិនមែនកើតឡើង តែនៅតាមមូលដ្ឋានសហគមន៍នោះទេ សូម្បីតែក្នុងវត្តខ្លះ ក៏កើតមានដែរ ហេតុនេះមានតែព្រះអង្គ គ្រប់អង្គ រួមសហការគ្នាប្តូរពីគោលការណ៍អប់រំ និងដាក់ទណ្ឌកម្មតាមបែបបុរាណដោយការប្រើរំពាត់ ជំនួសវិញដោយការអប់រំដាក់ទណ្ឌកម្មជាពាក្យសំដី ទណ្ឌកម្មយកផលចំណេញ តាមរយ:ឱ្យបោសសំរាម សំអាតបរិស្ថាន ឱ្យជំរះស្មៅ ដងទឹក ស្រោចផ្កាឬដំណាំក្នុងវត្តជាដើម។ឯកឧត្តម បន្តថា៖ អង្គការយូនីសេហ្វផ្នែកអប់រំលើស្ត្រី និងកុមារ បានកោតសរសើរ ចំពោះជោគជ័យរបស់កម្ពុជា ជាពិសេសការអប់រំតាមរយ:ព្រះពុទ្ឋសាសនា ដែលបានខិតខំអប់រំ ណែនាំដល់ពុទ្ឋបរិស័ទដែលគាត់យល់មិនច្បាស់ពីអំពើហិង្សាក្នុងគ្រួសារ និងក្នុងសង្គម ដែលបង្កទៅជាបញ្ហាដល់គ្រួសារ និងសង្គមទាំងមូលផងដែរ ក៏មានកត្តាជោគជ័យនេះអាចកើតឡើងបានដោយសារតែយើងមានច្បាប់ និងគោលនយោបាយរបស់រាជរដ្ឋាភិបាល ក្នុងការប្រយុទ្ឋប្រឆាំងអំពើហិង្សាលើស្ត្រី និងកុមារ។ អង្គការនេះ បានស្រាវជ្រាវរកឃើញថា ព្រះសង្ឃខ្មែរប្រែឥរិយាបទពីការប្រើទណ្ឌកម្មក្តៅ( វាយដំ ) មកជាការអប់រំ បែបត្រជាក់ទទួលបានលទ្ឋផល៧៥% បើប្រៀបធៀបជាមួយបណ្តាប្រទេសកាន់ពុទ្ឋសាសនាក្នុងពិភពលោក។ ហេតុនេះ ដើម្បីឱ្យកាន់តែទទួលបានជោគជ័យ ប្រកបដោយប្រសិទ្ឋភាពបន្ថែមទៀត សូមព្រះថេរានុត្ថេរា ជាសិក្ខាកាមបន្តចុះជួយអប់រំតាជីដូនជី ប្រជាពលរដ្ឋតាមវត្តអារាម តាមមូលដ្ឋាន និងសហគមន៍នានា លើឥរិយាបទទាំង៤ ព្រោះថាព្រះសង្ឃជាអ្នកទ្រទ្រង់នូវទង់ព្រះអរហន្តជានិមិត្តរូប នៃអំពើល្អ ជាស្រែបុណ្យនិ ងជាទីពឹងរបស់ប្រជាពុទ្ឋបរិស័ទ ដើម្បីរួមគ្នាបញ្ចៀសឱ្យបានជាអតិបរមា លើអំពើហិង្សាបុគ្គល និងសហគមន៍ឈានទៅទទួលបានសន្តិភាពបុគ្គល សន្តិភាពគ្រួសារ សន្តិភាពភូមិឃុំ សន្តិភាពសហគមន៍ និងសន្តិភាពជាសកល ដោយគ្មានអំពើហិង្សា តាមរយ:ការចូលរួមអប់រំផ្សព្វផ្សាយទៅតាមគោលការណ៍ព្រះពុទ្ឋសាសនា ពិភពលោកមានសន្តិភាព គឺផ្តើមចេញពីសន្តិភាពបុគ្គល៕
អត្ថបទ និងរូបភាព: លោកយូ វង្ស
កែសម្រួលដោយ លីវ សុខុន!!!
