ព្រះសង្ឃ រួមនឹងប្រជាពលរដ្ឋ ក៍ដូចជាអ្នកទេសចរជាតិបានសម្ដែងការកោតសរសើរ និងបង្ហាញនូវការពេញចិត្ដនូវការបង្កើតព្រឹត្ដិការណ៍រំលឹកគុណអង្គរ ដោយសារព្រឹត្ដិការណ៍នេះ ជាសារមួយបង្ហាញដល់អ្នកទេសចរអន្ដរជាតិ ឱ្យចាប់អារ្មណ៏ពីរមណីយដ្ឋានអង្គរកាន់តែខ្លាំង ព្រោះបានបង្ហាញពីកិច្ចការការពារបានល្អក្នុងឧទ្យាអង្គរ តាមរយៈការដាក់តាំងពិព័រណ៍។
ព្រះសង្ឃមកពីខេត្ដកំពង់ធំ និងអ្នកទេសចរជាតិនៅខេត្ដសៀមរាប បានលើកឡើងស្រដៀងគ្នាថា ព្រឹត្ដិការណ៍រំលឹកគុណអង្គរនេះ គឺព្រឹត្ដិការណ៍មួយមានសារសំខាន់ណាស់ ព្រោះវាជាការបង្ហាញពីការអភិរក្ស និងអភិវឌ្ឍន៍គ្រប់ទីកន្លែងនៅក្នុងរមណីយដ្ឋានអង្គរ ខណៈដែលអ្នកទេសចរដើរទស្សនាប្រាង្គប្រាសាទបុរាណនានាមិនគ្រប់ទីកន្លែង។ អ្នកទេសចរបានលើកឡើងថា ប្រាសាទបុរាណរបស់ខ្មែរមានស្ទើរគ្រប់ទីកន្លែងក្នុងឧទ្យានអង្គរ ប៉ុន្ដែអ្នកទេសចរទៅទស្សនាមិនគ្រប់ជ្រុងជ្រោយ ប៉ុន្ដែនៅពេលអាជ្ញាធរជាតិអប្សរា បានយករូបភាពពីការអភិរក្សនិងអភិវឌ្ឍន៍ទៅបង្ហាញក្នុងព្រឹត្ដិការណ៍រំលឹកគុណអង្គរនោះ បានធ្វើឱ្យស្គាល់កានតែច្បាស់ ហើយបានដឹងច្រើនតាមរយៈការតាំងពិព័រណ៍នោះ។
ពួកគាត់លើកឡើងទៀតថា ការបង្កើតព្រឹត្ដិការណ៍រំលឹកគុណអង្គរ ក៍ជាការបង្ហាញឱ្យប្រជាជនខ្មែរ នឹករលឹកដល់បុព្វការីជនក៍ ដូចជាព្រះមហាក្សត្រខ្មែរជំនាន់មុន ដែលព្រះអង្គបានបន្សល់ទុកនូវកេរិ៍តំណែលដ៍មហាសាល ឱ្យប្រជាពលរដ្ឋបានទទួលផលពីការធ្វើទេសចរនោះ។ ពួកគាត់បានបង្ហាញការគាំទ្រ ឱ្យមានការបង្កើតព្រឹត្ដិការណ៍ដឹងគុណអង្គរនេះ ជាព្រឹត្ដិការណ៍ដ៍សំខាន់របស់ខ្មែរ និងមានជារៀងរាល់ឆ្នាំ ដើម្បីឱ្យកូនខ្មែរចងចាំនូវវប្បធម៌របស់ខ្លួន។
សូមជម្រាបថា ព្រឹត្ដិការណ៍រំលឹកគុណអង្គរ បានធ្វើឡើងមានរយៈពេល៣ថ្ងៃ គឺចាប់ពីថ្ងៃទី១៤ដល់ថ្ងៃទី១៦ ខែធ្នូ ឆ្នាំ២០២១នេះ ដោយក្នុងព្រឹត្ដិការណ៍នេះ ក្លាយជាព្រឹត្ដិការណ៍ប្រចាំឆ្នាំមួយ របស់អាជ្ញាធរជាតិអប្សរាធ្វើឡើងក្នុងគោលបំណងអបសាទរ ការចុះរមណីយដ្ឋានអង្គរក្នុងបញ្ជីបេតិកភណ្ឌពិភពលោក កាលពីពីឆ្នាំ១៩៩២មក ក៍ដូចជារំលឹកគុណដល់បុព្វការីជនជំនាន់មុន និងអតីតព្រះមហាក្សត្រគ្រប់ជំនាន់មុនផងដែរ។ ព្រឹត្ដិការណ៍នេះ បានធ្វើការតាំងពិព័រណ៍ បង្ហាញសមិទ្ធផលការងាររយ:ពេល ២៩ឆ្នាំ ពីការអភិរក្ស និងការអភិវឌ្ឍន៍ប្រកបដោយចីរភាព របស់អាជ្ញាធរជាតិអប្សរា ព្រមទាំងបង្ហាញពីស្នាដៃសិល្បៈផ្សេងៗ ដែលជាទំនៀមទម្លាប់ប្រពៃណី កម្មវីធីសម្តែងសិល្បៈ ក៍ដូចជាប្រារព្ធពិធីសាសនាផងដែរ៕
អត្ថបទ និងរូបភាព៖ លោក បូ សាវី
កែសម្រួល៖ អ៊ុន ណារាជ្យ
