ព្រឹត្ដិការណ៍អង្គរ ពិធីបួងសួងសាសនាដឹងគុណដូនតា ដែលសរុបចំនួន៥ថ្ងៃ ចាប់ពីថ្ងៃទី១២ដល់ថ្ងៃទី១៦ ខែធ្នូឆ្នាំ២០២១នេះ មានអ្នកទេសចរទៅទសន្សនាជាង ៤ម៉ឺនាក់ ខណៈដែលពិធីទាំងពីរនេះ បានរព្ធឡើងជាលើកដំបូង នៅលើទឹកដីអាច្ឆរិយៈមួយនេះ។
បើតាមឯកឧត្ដម ឡុង កុសល អគ្គនាយករង និងជាអ្នកនាំពាក្យអាជ្ញាធរជាតិអប្សរា បានបញ្ជាក់នៅថ្ងៃទី១៦ ខែធ្នូនេះថា អ្នកទេសចរទៅទស្សនាព្រឹត្ដិការណ៍រំលឹកគុណអង្គរ និងពិធីសាសនាដឹងគុណដូនតា ភាគច្រើនជាអ្នកទេសចរក្នុងស្រុក ដោយពួកគាត់បានទៅទស្សនាការតាំងពិរ័ពណ៍សមិទ្ធិផលនានាក្នុងរមណីយដ្ឋានអង្គរ ដែលបានដាក់តាំងក្នុងព្រឹត្ដិការណ៍រំលឹកគុណអង្គរខាងមុខប្រាសាទអង្ករវត្ដ និងទៅទស្សនាការសម្ដែងសិល្បៈផ្សេងបុរាណផ្សេងៗ ក្នុងពេលរាត្រីនាខាងមុខព្រះលានដល់ដំរី និងប្រាសាទអង្គរធំ ដែលតាមការប៉ាន់ប្រមាណមានជាង ៤ម៉ឺននាក់ ក្នុងរយៈពេល៥ថ្ងៃកន្លងមកនេះ។ ព្រឹត្ដិការណ៍រំលឹកគុណអង្គរ និងពិធីសាសនាសំពះដូនតានេះ ធ្វើឡើងនៅខាងមុខប្រាសាទអង្គរវត្ដ និងនៅខាងមុខប្រាសាទភ្នំបាខែង ខណៈដែលព្រឹត្ដិការណ៍នេះជាលើកដំបូង ក៍ដូចជាឆ្នាំសាកល្បងដែលរៀបចំដោយអាជ្ញាធរជាតិអប្សរាផងដែរ។
ឯកឧត្ដម បានបញ្ជាក់ទៀតថា ការចាប់អារម្មណ៍របស់អ្នកទេសចរណ៍ ទៅលើការតាំងពិព័រណ៍នេះ ព្រោះថានៅស្ដង់ពិព័រណ៍នេះ មានដាក់តាំងនៅសមិទ្ធិផលកិច្ចការពារ ពីការអភិរក្ស និងអភិវឌ្ឍន៍នៅក្នុងរមណីយដ្ឋានអង្ករ ដែលអាជ្ញាធរជាតិអប្សរា ដែលអាជ្ញាធរបានអនុវត្ដរយៈពេល ២៩ឆ្នាំកន្លងមក។ នេះគឺជាការចាប់ផ្ដើម របស់ភ្ញៀវទេសចរមកទស្សនាប្រាសាទអង្គរឡើងវិញ បន្ទាប់ពីមានការបើកទូលាយនូវទេសចរក្នុងស្រុក ហើយនឹងអាចមានអ្នកទេសចរអន្ដរជាតិទៅទស្សនានៅអង្គរ នាដំណាច់ឆ្នាំ២០២១នេះ។ ឯកឧត្ដមបន្ថែមថា អាជ្ញាធរជាតិអប្សរានឹងបន្ដបង្កើតព្រឹត្ដិការណ៍ជាច្រើនទៀតនៅឆ្នាំបន្ទាប់ ដើម្បីធ្វើឱ្យយ៉ាងណាឱ្យអ្នកទេសចរណ៍កាន់តែចាប់អារម្មណ៍ទៅលើរមណីយដ្ឋានអង្គរដែលជាបេតិកភណ្ឌពិភពលោកកាន់តែច្រើន។
គួរឲ្យដឹងដែរថា ពិធីសាសនារំលឹកគុណដូនតាមានរយៈពេល ២ថ្ងៃ គឺចាប់ពីថ្ងៃទី១២ដល់ថ្ងៃទី១៣ ខែធ្នូ ឆ្នាំ២០២១។ ដោយឡែកព្រឹត្ដិការណ៍រំលឹកគុណអង្គរ មានរយៈពេល ៣ថ្ងៃ គឺចាប់ពីថ្ងៃទី១៤ ដល់ថ្ងៃទី១៦ ខែធ្នូ ឆ្នាំ២០២១ ដែលប្រកាសបើកលោកជំទាវកិត្តិសង្គហបណ្ឌិត មែន សំអន ឧបនាយករដ្ឋមន្ត្រី រដ្ឋមន្ត្រីក្រសួងទំនាក់ទំនងជាមួយរដ្ឋសភាព្រឹទ្ធសភា និងលោកជំទាវសភាចារ្យ ភឿង សកុណា រដ្ឋមន្ដ្រីក្រសួងវប្បធម៌និងវិចិត្រសិល្បៈ។ ព្រឹត្ដិការណ៍នេះ ធ្វើឡើងក្នុងគោលបំណងដើម្បីអបសាទរការចុះរមណីយដ្ឋានអង្គរក្នុងបញ្ជីបេតិកភណ្ឌពិភពលោកកាលពីថ្ងៃទី១៤ ខែធ្នូ ឆ្នាំ១៩៩២ ក៍ដូចជារំលឹកគុណដល់បុព្វការីជន់ជំនាន់មុន អតីតព្រះមហាក្សត្រគ្រប់ជំនាន់មុនផងដែរ និងដើម្បីអរគុណដល់សន្ដិភាព៕
អត្ថបទ និង រូបភាព៖ លោក បូ សាវី
កែសម្រួលអត្ថបទ ៖ លោក អ៊ុន ណារាជ្យ
