នៅព្រឹកថ្ងៃទី១៧ ខែធ្នូ ឆ្នាំ២០២១នេះ អាកាសចរស៊ីវិលកម្ពុជា បានបើកវគ្គបណ្តុះបណ្តាលស្ដីពីការគ្រប់គ្រងទ្រព្យសម្បត្តិរដ្ឋតាមប្រព័ន្ធ SARMIS និងវិធីសាស្រ្តរៀបចំរបាយការណ៍សមិទ្ធកម្ម ដែលសិក្ខាសាលានេះ ធ្វើឡើងក្នុងគោលបំណងចូលរួមចំណែកបញ្ជ្រៀបការយល់ដឹង និងពង្រឹងសមត្ថភាពដល់ថ្នាក់ដឹកនាំ និងមន្ត្រីរាជការក្នុងការអនុវត្តប្រព័ន្ធបច្ចេកវិទ្យាព័ត៌មាន គ្រប់គ្រងបញ្ជីសារពើភណ្ឌទ្រព្យសម្បត្តិរដ្ឋ នៅរដ្ឋលេខាធិការដ្ឋានអាកាសចរស៊ីវិល ឱ្យទទួលបានភាពជោគជ័យបន្ថែមទៀត។
ឯកឧត្ដម គឹម សុភ័ណ រដ្ឋលេខាធិការ នៃរដ្ឋលេខាធិការដ្ឋានអាកាសចរស៊ីវិល មានប្រសាសន៍ថា ការគ្រប់គ្រងទ្រព្យសម្បត្តិរដ្ឋតាមប្រព័ន្ធ SARMIS គឺជាផ្នែកមួយនៃកម្មវិធីកែទម្រង់ការគ្រប់គ្រងហិរញ្ញវត្ថុសាធារណៈ ដែលការគ្រប់គ្រងទ្រព្យសម្បត្តិរដ្ឋ តាមប្រព័ន្ធSARMIS នឹងនាំមកនូវការផ្លាស់ប្ដូររបៀបរបបធ្វើការងារ ខណៈដែលបច្ចុប្បន្ននេះការធ្វើការងារនេះ ចំណេញទាំងពេលវេលា ធនធាន និងផ្ដល់នូវតម្លៃបន្ថែមដល់ការងារផ្នែកវិភាគ និងការគ្រប់គ្រងលើសមិទ្ធផល ប្រកបដោយសុក្រឹតភាព។ ប្រព័ន្ធនេះនឹងជួយបង្វែរការងារបច្ចុប្បន្ន ដែលផ្ដោតតែលើប្រតិបត្ដិការលើការរៀបចំបញ្ជីសារពើភណ្ឌទ្រព្យសម្បត្តិរដ្ឋ ទៅជាការងារដែលឈរលើអភិក្រម នៃទស្សទាន និងគោលការណ៍ថវិកាសមិទ្ធកម្ម ការបង្កើតរចនាសម្ព័ន្ធថវិកាសមិទ្ធកម្ម ការកំណត់គោលបំណងគោលនយោបាយ ការបង្កើតសូចនាករសមិទ្ធកម្ម ការកំណត់គោលដៅសូចនាករសមិទ្ធកម្ម ការតាមដានត្រួតពិនិត្យ និងរាយការណ៍នៃការអនុវត្តថវិកាសមិទ្ធកម្ម និងការរៀបចំរបាយការណ៍សមិទ្ធកម្ម ដែលនឹងបង្កលក្ខណៈដល់ការពង្រឹងការងារគ្រប់គ្រងទ្រព្យសម្បត្តិរដ្ឋ និងការអនុវត្តថវិកាកម្មវិធីបម្រើដល់គ្រប់វិស័យ ប្រកបដោយប្រសិទ្ធភាពខ្ពស់សម្រាប់កម្ពុជាទាំងមូល ជាពិសេសជួយលើកកម្ពស់លទ្ធភាព នៃឧត្ដមភាពប្រជែងឈ្នះរបស់កម្ពុជា នៅក្នុងតំបន់ និងនៅលើឆាកអន្ដរជាតិក្នុងវិស័យហិរញ្ញវត្ថុសាធារណៈ។
ឯកឧត្ដមបន្ដថា ការរៀបចំនូវវគ្គបណ្តុះបណ្តាលនាពេលនេះ គឺស្របពេលដែលរាជរដ្ឋាភិបាលបានសម្រេច អនុម័តលើ យុទ្ធសាស្រ្តនៃការកែទម្រង់ប្រព័ន្ធថវិកាឆ្នាំ២០១៨-២០២៥ កាលពីថ្ងៃទី៣០ខែមករាឆ្នាំ២០១៨ដើម្បីត្រៀមខ្លួនអនុវត្តថវិកាសមិទ្ធកម្មនាពេលខាងមុខប្រកបដោយប្រសិទ្ធភាពខ្ពស់។ ឯកឧត្ដមសង្ឃឹមថា ការបោះទុនវិនិយោគរបស់រាជរដ្ឋាភិបាលលើប្រព័ន្ធនៃការគ្រប់គ្រងទ្រព្យសម្បត្តិរដ្ឋ SARMIS នឹងត្រូវបានតបស្នងមកវិញនូវអត្ថប្រយោជន៍យ៉ាងធំធេងក្នុងការកសាង និងអភិវឌ្ឍជាតិ ជូនប្រជាជនកម្ពុជា តាមរយៈការផ្តល់នូវប្រសិទ្ធភាព និងផលិតភាពកាន់តែខ្ពស់ រួមទាំងការជួយកាត់បន្ថយនូវការប្រើប្រាស់ឯកសារក្រដាសស្នាម ដែលត្រូវការហត្ថលេខានៅក្នុងការអនុវត្ត នីតិវិធីចាប់ពីការស្នើសុំធានាចំណាយរហូតដល់ការទូទាត់ចំណាយជាដើម ដែលបច្ចុប្បន្ននេះ កំពុងត្រូវបានអនុវត្តតាមប្រព័ន្ធ FMIS ផងដែរ។ឯកឧត្ដមបន្ថែមថា វគ្គបណ្តុះបណ្តាលនេះ នឹងចូលរួមចំណែកក្នុងការពង្រឹងសមត្ថភាពថ្នាក់ដឹកនាំនិងមន្រ្តីរាជការ កាន់តែប្រសើរឡើងថែមទៀត លើការងារការគ្រប់គ្រងទ្រព្យសម្បត្តិរដ្ឋតាមប្រព័ន្ធ (SARMIS) និងការរៀបចំរបាយការណ៍សមិទ្ធកម្ម នៅរដ្ឋលេខាធិការដ្ឋានអាកាសចរស៊ីវិលមួយនេះ៕
អទ្ថបទ និងរូបភាព ៖ លោក បូ សាវី
កែសម្រួល៖ អ៊ុន ណារាជ្យ
