យុវសិស្សចំនួន១៦២នាក់មកពីវិទ្យាល័យក្នុងស្រុកចំនួន៣ គឺ ស្រុកសូទ្រនិគម , ស្រុកជីក្រែង និង ស្រុកស្វាយលើ ត្រូវបានធ្វើការបំពាក់កន្សែងយុវជនកាកបាទក្រហមកម្ពុជា នៅព្រឹកថ្ងៃទី ១៦ ខែ ធ្នូ ឆ្នាំ២០២១នេះ នៅក្នុងបរិវេណវិទ្យាល័យហ៊ុន សែន ដំដែក ស្រុកសូទ្រនិគម ខេត្តសៀមរាប ក្រោមអធិបតីភាពរបស់ លោកជំទាវ សោម សេរីវឌ្ឍន៍ នាយិកានាយកដ្ឋានធនធានមនុស្សនៃកាកបាទក្រហមកម្ពុជា និងឯកឧត្តម គុជ លីណា អនុប្រធានគណៈកម្មាធិការសាខាកាកបាទក្រហមកម្ពុជាខេត្តសៀមរាប ដោយមានការចូលរួមពីប្រធានកិត្តិយសអនុសាខា អាជ្ញាធរស្រុក និង សហភាពសហព័ន្ធយុវជនកម្ពុជាស្រុក នៃស្រុកទាំង៣ ។
មានប្រសាសន៍ក្នុងឱកាសនោះ លោកជំទាវ សោម សេរីវឌ្ឍន៍ នាយិកានាយកដ្ឋានធនធានមនុស្សនៃកាកបាទក្រហមកម្ពុជា បានពាំនាំនូវការផ្តាំផ្ញើ សួរសុខទុក្ខរបស់សម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន ប្រធានកាកបាទក្រហមកម្ពុជា ព្រមទាំងបានធ្វើ ការកោតសរសើរ ចំពោះស្មារតីចូលរួមរបស់ក្មួយៗ យុវជនកាកបាទក្រហមកម្ពុជាខេត្តសៀមរាប ក្នុងការចូលរួមប្រយុទ្ធប្រឆាំងនឹងជំងឺកូវីដ-១៩ យ៉ាងសកម្មជាមួយអាជ្ញាធរមូលដ្ឋាន ហើយក៏មិនមានបង្កការឆ្លងដល់ក្មួយៗ ណាម្នាក់ឡើយ ដែលកត្តាទាំងនេះ ដោយសារក្មួយៗមានការយល់ដឹងខ្ពស់ ក្នុងវិធីការពារ ក្នុងការអនុវត្តវិធានការ ៣កុំ ៣ការពារ និង សេចក្តីណែនាំរបស់ក្រសួងសុខាភិបាល បានយ៉ាងខ្ជាប់ខ្ជួន ។
ឯកឧត្តម គុជ លីណា អនុប្រធានគណៈកម្មាធិការសាខាកាកបាទក្រហមកម្ពុជាខេត្តសៀមរាប មានប្រសាសន៍ថា កម្ពុជាបានចាត់ទុកយុវជនជាធនធានគន្លឹះ និងមានតម្លៃបំផុតសម្រាប់ការអភិវឌ្ឍសេដ្ឋកិច្ច សង្គមកិច្ច វប្បធម៌ បរិស្ថាន និងការរក្សាសន្តិភាព ហើយនៅគ្រប់សម័យកាល គ្រប់សង្គម យុវជនជាកម្លាំងស្រួចដែលមានកម្លាំងកាយ កម្លាំងចិត្ត និងស្មារតីភ្លឺស្វាង មានទឹកចិត្តក្លាហាន ពុះពារមិនរារែកគ្រប់ឧបសគ្គ ការលំបាកនានា ពិសេសយុវជនគឺជាសសរទ្រូងរបស់ប្រទេសជាតិទាំងនៅពេលបច្ចុប្បន្នទៅអនាគត ជាពិសេសក្នុងពេលដែលប្រទេសកម្ពុជា ក៏ដូចជាខេត្តសៀមរាប កំពុងរងគ្រោះដោយសារការឆ្លងរាលដាលជំងឺកូវីដ-១៩ ក្មួយៗយុវជនកាកបាទក្រហមយើង បានចូលរួមយ៉ាងសកម្មក្នុងការងារមនុស្សធម៌ ក្នុងការចុះចែកស្បៀងដល់ប្រជាពលរដ្ឋជួបការខ្វះខាតនៅតាមមូលដ្ឋាន ។
ឯកឧត្តម គុជ លីណា មានប្រសាសន៍ថា កាកបាទក្រហមកម្ពុជា បានទទួលស្គាល់ថា យុវជនកាកបាទក្រហមកម្ពុជា គឺជាអ្នកស្ម័គ្រចិត្តវ័យក្មេង ដែលជាកម្លាំងស្នូលមួយដ៏មានសារៈសំខាន់ និងសកម្មបំផុត ក្នុងការផ្ដល់នូវសេវាកម្មមនុស្សធម៌ ប្រកបដោយការប្ដេជ្ញាចិត្តខ្ពស់ និងការលះបង់ឥតងាករេ ស្របតាមប្រធានបទ “កាកបាទក្រហមកម្ពុជាមានគ្រប់ទីកន្លែង សម្រាប់គ្រប់ៗគ្នា” និង “យុវជនជាភ្នាក់ងារនៃការផ្លាស់ប្តូរឥរិយាបទក្នុងសង្គម” ប៉ុន្តក៏ត្រូវគោរពវិន័យសាលា និង ខិតខំរៀនសូត្រឲ្យបានពូកែ ធ្វើជាគំរូល្អគ្រប់សម្មភាព ក្នុងស្រទាប់យុវវ័យ ក្លាយជាកូនល្អ សិស្សល្អ មិត្តល្អ និង ពលរដ្ឋល្អក្នុងសង្គម ព្រមទាំងចូលរួម ក្នុងការផ្សព្វផ្សាពីគោលការណ៍គ្រឹះរបស់ចលនាអន្តរជាតិកាកបាទក្រហមអឌ្ឍចន្ទក្រហមនៅក្នុងសាលា និងសហគមន៍ ក្នុងសកម្ម ភាពមនុស្សធម៌ ទាំងក្នុងសាលា និង សហគមន៍របស់ខ្លួន និង ចាកជៀសឲ្យឆ្ងាយពីគ្រឿងញៀន និងត្រូវចេះគោរពច្បាប់ចរាចរណ៍ ព្រមទាំងបានក្រើនរំលឹកដល់ក្មួយៗ ទោះបីយើងបានទទួលការចាក់វ៉ាក់សាំងបានគ្រប់ដូសក៏ពិតមែន តែក៏យើងត្រូវបន្តអនុវត្តវិធានការ ៣កុំ ៣ការពារ និង រៀនរស់នៅតាមបែបគន្លងថ្មី ជាមួយកូវិដ ពីព្រោះថា ជម្ងឺកូវិដវាមិនរើសអើងបុគ្គលណាម្នាក់ឡើយ នៅពេលដែលយើងមានការធ្វេលប្រហែសនោះ ៕
អត្ថបទ និង រូបភាព៖ លោក ស៊ាន សុផាត
កែសម្រួលអត្ថបទ ៖ លោក លីវ សាន្ត
