អាជ្ញាធរសង្កាត់ជ្រាវ និងអាជ្ញាធរក្រុងសៀមរាប បានសហការជាមួយអាជ្ញាធរជាតិអប្សរា ធ្វើការដកបង្គោលរបងថ្មចំនួន ១៦០ដើម ខណៈជនខិលខូចលួចបោះបង្គោលរំលោភយកដីត្រពាំងបុរាណមួយកន្លែងស្ថិតនៅភូមិបុស្សក្រឡាញ់ សង្កាត់ជ្រាវ ក្រុងសៀមរាប។ ការដកបង្គោលចេញវិញនេះ ធ្វើឡើងកាលពីព្រឹកថ្ងៃទី២០ ខែធ្នូ ឆ្នាំ២០២១នេះ ក្រោយពេលជនមិនស្គាល់មុខ បានលួចធ្វើសកម្មភាពហ៊ំព័ទ្ធរបងយកដីក្នុងត្រពាំងបុរាណនោះ រយៈពេល ៣ថ្ងៃមកហើយ។
លោក ក្អោប រ៉ន ចៅសង្កាត់ជ្រាវ ក្រុងសៀមរាប ខេត្តសៀមរាប បានឱ្យដឹងថា បង្គោលរបងថ្មដែលលួចបោះរំលោភដីកណ្ដាលក្នុងត្រពាំងបុរាណនោះ មានទំហំជាង២០០ម៉ែត្រការ៉េ ដែលស្មើនឹងប្រមាណបណ្ដោយជាង៤០ម៉ែត្រ គុណនឹងទទឹង៥០ម៉ែត្រ។ ត្រពាំងបុរាណនេះមានឈ្មោះថា ត្រពាំងហែរផ្កា ដែលអាជ្ញាធរសង្កាត់ និងក្រុងសៀមរាប បានការអនុញ្ញាតពីអាជ្ញាធរជាតិអប្សរា ឱ្យស្ដារត្រពាំងនោះឡើងវិញ ដើម្បីរក្សាទឹកទុកឱ្យប្រជាពលរដ្ឋប្រើប្រាស់ និងធ្វើជាតំបន់ទេសចរនាពេលអនាគត ប៉ុន្ដែរយ:ពេល៣ថ្ងៃកន្លងមកនេះ ដីក្នុងត្រពាំងហែរផ្កានោះ ត្រូវបានជនខិលខូចលួចបោះបង្គោលថ្ម ប៉ុនប៉ងរំលោយកដីយកទៅធ្វើកម្មសិទ្ធិឯកជន។ លោកបន្ដថា បង្គោលថ្ម ដែលលួចបោះក្នុងដីត្រពាំងបុរាណនោះមានចំនួន ១៦០បង្គោល។លោកថា លោកបានឱ្យកងកម្លំាងប៉ូលិសប៉ុស្ដិ៍ទៅកធ្វើការហាមឃាត់ដែរ ប៉ុន្ដែជនខិលខូចនៅតែលួចធ្វើបន្ដ ជាពិសេសលួចធ្វើពេលយប់ ហើយការលួចធ្វើនេះមានរយ:ពេល៣ថ្ងៃមកហើយ។ លោកបានទៀតបន្ដថា ជនខិលខូចនេះ អាជ្ញាធរកំពុងស្រាវជ្រាវរកមុខសញ្ញា ដើម្បីឱ្យចូលខ្លួនមកធ្វើកិច្ចសន្យាបញ្ឈប់បោះបង្គោលរំលោកយកដីត្រពាំងបុរាណនោះបន្ដទៀត។
បើតាមលោកចៅសង្កាត់ជ្រាវ ក្អោប រ៉ន លោកបានឱ្យដឹងថា ត្រពាំងបុរាណឈ្មោះ ត្រពាំងហែផ្កានេះ មានបណ្ដោយ៣០០ម៉ែត្រ និងទទឹង២០០ម៉ែត្រ បច្ចុប្បន្នអាជ្ញាធរសង្កាត់ សហការជាមួយអាជ្ញាធរក្រុង និងអាជ្ញាធរជាតិអប្សរា ធ្វើការអភិវឌ្ឍ និងអភិរក្ស ដោយស្ដារយកអាចម៍ដី ដើម្បីរក្សាទឹកទុកឱ្យសហគមន៍ប្រើប្រាស់។ ជាមួយគ្នានោះ ត្រពាំងបុរាណនេះ ក្រៅពីជនខិលខូចដែលមិនស្គាល់ឈ្មោះ លួចបោះបង្គោលថ្មប៉ងយកដីក្នុងត្រពាំងបុរាណនោះ ក៏នៅមានប្រជាពលរដ្ឋ ៨គ្រួសារ ធ្វើផ្ទះនៅក្នុងត្រពាំងបុរាណនោះផងដែរ ប៉ុន្ដែអាជ្ញាធរបានចាត់វិធានការ និងឱ្យយរុះរើនៅពេលក្រោយ។
បើតាមលោក ក្អោប រ៉ន ត្រពាំងបុរាណនេះនឹងត្រូវជីកស្តារជម្រៅបីម៉ែត្រ និងចាក់បំពេញមាត់ត្រពាំង ដើម្បីរៀបចំជារមណីដ្ឋានទេសចរណ៍ ដែលកិច្ចការនេះអាជ្ញាធរគ្រោងនឹងបញ្ចប់នៅចុងរដូវប្រាំងឆ្នាំ២០២២ខាងមុខនេះ៕
អត្ថបទ និងរូបភាព៖ លោកជា ស្រស់ ,លោក បូ សាវី
កែសម្រួល៖ លីវ សុខុន
