គណៈកម្មាធិការ ប្រយុទ្ធប្រឆាំងអំពើជួញដូរមនុស្សខេត្តសៀមរាប វាយតម្លៃថា កម្មវិធីសុវត្ថិភាព និងយុត្តិធម៌ ដែលជាផ្នែកមួយនៃគំនិតផ្តួចផ្តើមរបស់ Spotlight សម្រាប់ការសម្រេចសិទ្ធិ និងឱកាសដល់ពលករទេសន្តរប្រវេសន៍ ជាស្រ្តីក្នុងតំបន់អាស៊ាន គឺជាកម្មវត្ថុតែមួយ ដែលខេត្តសៀមរាប បាន និងកំពុងអនុវត្ត តាមរយៈនៃគោលដៅអភិវឌ្ឍន៍ ប្រកបដោយចិរភាព។
នៅក្នុងកិច្ចប្រជុំរបស់លេខាធិការដ្ឋាន នៃគណៈកម្មាធិការខេត្តសៀមរាប ប្រយុទ្ធប្រឆាំងអំពើជួញដូរមនុស្ស ប្រចាំឆ្នាំ២០២១ នាព្រឹកថ្ងៃទី២៨ ខែធ្នូ ឆ្នាំ២០២១ នៅសាលាខេត្តនោះ លោកស្រី យូ សុភា អភិបាលរងខេត្ត និងជាប្រធាននៃកិច្ចប្រជុំនេះ បានសម្រេចទទួលយកនូវកិច្ចសហការអនុវត្ត ( កម្មវិធីសុវត្ថិភាព និងយុត្តិធម៌ ) ដោយផ្អែកតាមការលើកសំណើរដោយមន្ទីរការងារ និងបណ្តុះបណ្តាលវិជ្ជាជីវៈ។ កម្មវិធីនេះ គ្រោងនឹងចាប់ផ្តើមអនុវត្តពីពាក់កណ្តាលឆ្នាំ២០២២ខាងមុខនេះតទៅ លើបណ្តាស្រុកជាគោលដៅចំនួន៤ រួមមាន ស្រុកស្រីស្នំ ក្រឡាញ់ អង្គរជុំ និងស្រុកពួក ដោយផ្តោតសំខាន់ជាដំបូង គឺការបណ្តុះបណ្តាលគ្រូបង្គោល។ គោលដៅរបស់កម្មវិធីនេះ គឺពលករទេសន្តរប្រវេសន៍ជាស្រ្តី នឹងទទួលបាននូវការការពារកាន់តែប្រសើរអំពីក្របខ័ណ្ឌអភិបាលកិច្ច ទេសន្តរប្រវេសន៍ការងារ ដែលឆ្លើយតបចំពោះយេនឌ័រ កាត់បន្ថយនូវភាពរងគ្រោះដោយអំពើហឹង្សា និងការជួញដូរមនុស្ស ហើយពួកគេនឹងទទួលបានប្រយោជន៍ ពីការផ្តល់សេវាដែលមានគុណភាព ឆ្លើយតប និងមានការសម្របសម្រួលដ៏ល្អផងដែរ។
ជារួម កម្មវីធីសុវត្ថិភាព និងយុត្តិធម៌ គឺឆ្ពោះទៅសម្រេចឲ្យបាន នូវសិទ្ធិនិងឱកាសរបស់ពលករទេសន្តរប្រវេសន៍ជាស្រ្តី នៅក្នុងតំបន់អាស៊ាន ដែលជាផ្នែកមួយនៃគំនិតផ្តួចផ្តើមរបស់ Spotlight ដើម្បីលុបបំបាត់អំពើហឹង្សាលើស្រ្តី និងក្មេងស្រី ហើយក៏ជាគំនិតផ្តួចផ្តើមសកលអនុវត្តច្រើនឆ្នាំ រវាងសហភាពអ៊ឺរ៉ុប និងអង្គការសហប្រជាជាតិ។ កម្មវិធីនេះ ក៏ត្រូវបានធ្វើឡើងតាមរយៈភាពជាដៃគូ រវាង ILO និង UN Women រួមទាំងមានកិច្ចសហការផងដែរពី UNODC ក្នុងគោលដៅរួម ដើម្បីធានាថា ទេសន្តរប្រវេសន៍ការងារ បានផ្តល់នូវសុវត្ថិភាព និងយុត្តិធម៌ដល់ស្រ្តីគ្រប់រូប ក្នុងតំបន់អាស៊ាន។
សារបាននៃកម្មវិធីនេះ បានបង្ហាញថា ទេសន្តរប្រវេសន៍ការងារអន្តរជាតិមានការកើនឡើងជាបន្តបន្ទាប់ ក្នុងប៉ុន្មានទសវត្សរ៍ចុងក្រោយនេះ ក្នុងចំណោមជនទេសន្តរប្រវេសន៍ ១០ លាននាក់ ជិតពាក់កណ្តាលគឺជាស្រ្តី។ នៅក្នុងវដ្តនៃការធ្វើទេសន្តរប្រវេសន៍ ពលករទេសន្តរប្រវេសន៍ជាស្រ្តី ប្រឈមនឹងអំពើហឹង្សា ការជួញដូរមនុស្ស និងការរើសអើង មិនឲ្យទទួលបានការជ្រើសរើសធ្វើជាពលករដោយយុត្តិធម៌ និងការងារសមរម្យ ពួកគេមានឱកាសតិចតួចប៉ុណ្ណោះ ក្នុងការទទួលបានសេវាការពារ និងគាំទ្រ។
លោកស្រីប្រធានកិច្ចប្រជុំ វាយតម្លៃថា កិច្ចសហការអនុវត្តកម្មវិធីនេះ គឺស្របទៅនឹងទិសដៅដែលបានដាក់ចេញ ដោយលេខាធិការដ្ឋាន នៃគណៈកម្មាធិការខេត្តសៀមរាបប្រយុទ្ធប្រឆាំងអំពើជួញដូរមនុស្ស បន្តពង្រឹងកិច្ចសហការឲ្យបានទូលំទូលាយ ទាំងក្នុងនិងក្រៅប្រទេស ជាមួយមន្ទីរ-អង្គភាព អង្គការដៃគូជាតិ-អន្តរជាតិ ដើម្បីឆ្ពោះទៅគោលដៅរួម គឺការបង្ការ ទប់ស្កាត់ ការពារ និងបង្ក្រាប ឈានទៅលុបបំបាត់ អំពើជួយដូរមនុស្សគ្រប់រូបភាព៕
អត្ថបទ និង រូបភាព៖ លោក ងឹន គីមឡេង
