បងប្អូនគ្រួសារកម្មករឡឥដ្ឋ ចំនួន ៥២គ្រួសារស្ថិតនៅ ឃុំលាងដៃ ស្រុកអង្គរធំ ខេត្តសៀមរាប ដែលជួប ការលំបាកផ្នែកជីវភាព ទទួលបានការឧបត្ថម្ភសម្ភារប្រើប្រាស់ និងគ្រឿងឧបភោគបរិភោគ ក្រោមការផ្តួចផ្តើមរបស់ព្រះវិបុលសត្ថា រី សាត ព្រះរាជាគណៈ ថ្នាក់កិត្តិយស និងជាព្រះគ្រូចៅអធិការវត្តកេសរារាម និង ព្រះសច្ចានុបាល ភទ្ទកោ នឿម វុទ្ធី ព្រះរាជាគណៈកិត្តិយស ទីប្រឹក្សាសម្ដេចព្រះមហាសុមេធាធិបតី នន្ទ ង៉ែត សម្ដេចព្រះសង្ឃនាយក នៃព្រះរាជាណាចក្រកម្ពុជា និងជាព្រះចៅអធិការ វត្តបារាយមហានទីរតនារាម (ស្វាយរមៀត ) និង គណៈកម្មការអាចារ្យវត្តកេសរាម រួមជាមួយសិលវ័ន សីលវត្តី បាននិមន្ត និង អញ្ជើញនាំយកជាគ្រឿងឧបភោគបរិភោគ និងសម្ភារៈប្រើប្រាស់ ចែកជូនដល់ពួកគាត់នៅសាលា ឃុំលាងដៃ កាលពីថ្ងៃទី២៨ ខែធ្នូ ឆ្នាំ២០២១។
លោក ថាន់ អាន់ អភិបាលរងស្រុកអង្គរធំ បានថ្លែងអំណរព្រះគុណ និងអរគុណនូវការយកព្រះទ័យ និងយកចិត្តទុកដាក់របស់ព្រះសង្ឃ និងគណៈកម្មការវត្តនេះ ចំពោះសុខទុក្ខនិងការលំបាក របស់បងប្អូនកម្មករឡឥដ្ឋក្នុងមូលដ្ឋាននេះ ដោយបានប្រឹងប្រែង គៀងរគររកជំនួយសប្បុរសធម៌ពីសប្បុរសជនជិតឆ្ងាយ សម្រាប់ជួយសម្រួលដោះស្រាយការលំបាកដល់បងប្អូនប្រជាពលរដ្ឋ ទាំង ៥២គ្រួសារដែលេពួកគាត់ជួបការលំបាកផ្នែកជីវភាព។ លោក អភិបាលរងស្រុក ក៍បានបានអំពាវនាវឱ្យប្រជាពលរដ្ឋទាំងអស់ រៀនរស់តាមបែបគន្លងថ្មីជាមួយកូវីដ-១៩ ជាពិសេសកុំភ្លេចបន្តរួមគ្នាអនុវត្តឱ្យបានខ្ជាប់ខ្ជួននូវសេចក្តីណែនាំរបស់រដ្ឋបាលខេត្ត សេចក្តីអំពាវនាវនានា របស់ក្រសួងសុខាភិបាល និងវិធានការរបស់រាជរដ្ឋាភិបាល ៣ការពារនិង៣កុំ ក្នុងការទប់ស្កាត់ដល់ការឆ្លងជំងឺកូវីដ-១៩ ត្រូវប្រកាន់ខ្ជាប់នូវការរក្សា សំអាតអនាម័យស្អាត ត្រូវពាក់ម៉ាស់ឱ្យបានត្រឹមត្រូវ លាងដៃជាមួយសាប៊ូ អាល់កុលឬជែល និងត្រូវរក្សាគម្លាតសុវត្ថិភាពសង្គមជាដើម។
មានសង្ឃដិកានាឱកាសនោះព្រះវិបុលសត្ថា រី សាត មានសង្ឃដីកាថា៖សម្លៀកបំពាក់ អំណោយនិងថវិកាទាំងនេះ គឺ បានមកពីកម្លាំងសាមគ្គីរបស់បងប្អូនពុទ្ធបរិស័ទ គណៈកម្មការអាចារ្យវត្ត និងសីលវ័ន្តសីលវត្តី បានប្រមូលត្រៀមបម្រុងទុក សម្រាប់ចែករំលែកជូនដល់គ្រួសារខ្វះខាតជាក់ស្តែង ឬអាជ្ញាធរមូលដ្ឋានណា ដែលជួបហានិភ័យ ដោយប្រការផ្សេងៗ សម្រាប់ចូលរួមជួយសម្រាលការលំបាកក្នុងគ្រចាំបាច់ពីព្រោះថា ការលំបាករបស់អាជ្ញាធរមូលដ្ឋាន និងបងប្អូនប្រជាពុទ្ឋបរិស័ទ ក៏ជាទុក្ខលំបាករបស់ព្រះសង្ឃដែរ។ ហេតុដូច្នេះហើយក្នុងនាមមិត្តរួមជាតិ មិត្តរួមសាសន៍ គឺតែងតែជួយគិតគូរ និងផ្តល់ជូនដល់គ្នាគ្នាទៅវិញទៅមក ទៅតាមលទ្ឋភាពដែលក្រុមព្រះសង្ឃ និង ពុទ្ធបរិស័ទអាចធ្វើបាន។
ព្រះអង្គបន្តថា ជារឿយៗ ក្រុមមន្ត្រីសង្ឃសាលាគណខេត្ត ក៏ដូចជាព្រះសង្ឃតាមបណ្តាអារាមផ្សេងៗ រួមជាមួយសីលវ័ន្តសីលវត្តីនានា តែងតែនាំយកស្បៀងអាហារ និង ថវិកាតិចក្តីច្រើនក្តី ដើម្បីចែករំលែកនិងផ្តល់ជូនដល់គ្រួសារដែលជួបហានីភ័យ ជួបការលំបាកដោយសារជម្ងឺ ដោយសារគ្រោះធម្មជាតិផ្សេងៗ ស្របតាមពុទ្ឋឱវាទរបស់ព្រះសម្មាសម្ពុទ្ឋបរមគ្រូនៃយើង ដែលបានទូន្មានទុក ឲ្យយើងទាំងអស់គ្នាត្រូវចេះរួមសុខរួមទុក្ខ ជួយទុក្ខធុរ:សង្គ្រោះ និង សម្រាលទុក្ខលំបាកគ្នាទៅវិញទៅមក។
ព្រះវិបុលសត្ថា រី សាត ក៏បានជំរុញនិងណែនាំដល់បងប្អូនគ្រួសារកម្មករ ឡឥដ្ឋ ក៏ដូចសីលវ័ន្ត សីលវត្តីឲ្យត្រូវប្រកាន់ឲ្យបានខ្ជាប់ខ្ជួននូវវិធានការ ៣កុំ ៣ការពារ របស់ប្រមុខរាជរដ្ឋាភិបាល និង សេចក្តីណែនាំរបស់ក្រសួងសុខាភិបាល ដែលជាយ័នការពារដ៍សាកសិទ្ឋដើម្បី ការពារការឆ្លងជំងឺកូវីដ-១៩ ទោះបីបងប្អូនញាតិញោមទាំងអស់ បានទទួលការចាក់វ៉ាក់សាំងបានគ្រប់ដូសហើយពិតមែន ក៏ត្រូវតែបន្តការអនុវត្តវិធានការ ៣កុំ ៣ការពារ និង ត្រូវចេះរៀនរស់នៅទៅ តាមគន្លងបែបថ្មី ជាមួយកូវិដ ពីព្រោះថាយើងអាចប្រហែសភ្លេចកូវីដ-១៩តែកូវីដ-១៩មិនភ្លេចយើងទេ។
សូមបញ្ជាក់ថា កម្មករឡឥដ្ឋទាំង ៥២គ្រួសារ ក្នុងមួយគ្រួសារទទួលបានដូចជា៖ អង្ករ២០គ.ក្រ មី ត្រីខ ទឹកត្រី ទឹកស៊ីអ៊ិវ សម្លៀកបំពាក់ ស្បែកជើង ជាដើមផង៕
អត្ថបទ និង រូបភាព៖ លោក យូ វង្ស និង ស៊ាន សុផាត
