អាជ្ញាធរសង្កាត់ជ្រាវ នៅព្រឹកថ្ងៃទី០៥ ខែមករា ឆ្នាំ២០២២នេះ បានធ្វើការច្រានចោលនូវការចោទប្រកាន់តាមបណ្តាញសង្គមនានាថា អាជ្ញាធរសង្កាត់ជ្រាវ បានចាក់ដីលុបត្រពាំងបុរាណមួយកន្លែងឈ្មោះត្រពាំងស្វាយ ស្ថិតក្នុងភូមិបុស្សក្រឡាញ់ សង្កាត់ជ្រាវ ក្រុងសៀមរាប ដើម្បីពុះជាដីឡូតិ៍ចែកគ្នា។
លោក ក្អោប រ៉ន ចៅសង្កាត់ជ្រាវ បានអះអាងថា មិនមានការចាក់ដីលុបត្រពាំងបុរាណដូចការចោទប្រកាន់នោះទេ។ លោកថា ទីតាំងដែលបានចាក់ដីលុបនោះ គឺជារណ្តៅដែលគណ:កម្មការភូមិបុស្សក្រឡាញ់ បានជីកយកអាចម៍ដីទៅចាក់ធ្វើផ្លូវ កាលពីឆ្នាំ២០០៩ ដែលរណ្តៅជីកនោះមានទំហំ២១គុណ៥២ម៉ែត្រ ។ លោកបន្តថា ការចាក់លុបរណ្តៅដីខាងលើ មួយផ្នែកសម្រាប់បំពេញធ្វើជាផ្លូវសាធារណ: និងមួយផ្នែកទៀត ដើម្បីរៀបចំផ្តល់ជាទីតាំងដល់ពលរដ្ឋ ៨គ្រួសារដែលរងផលប៉ះពាល់ពីការជីកស្តារត្រពាំងហែរផ្កា សម្រាប់ស្នាក់នៅបណ្តោះអាសន្ន ទម្រាំថ្នាក់លើរកទីតាំងដោះដូរដល់ពួកគាត់ជាផ្លូវការ។
លោកចៅសង្កាត់បញ្ជាក់ថា ការចាក់លុបរណ្តៅដីខាងលើនេះ ក៏មានការចូលរួម២សហការណ៍ពីប្រជាពលរដ្ឋក្នុងមូលដ្ឋានជាច្រើនផងដែរ អីចឹងទេសូមសាធារណ:ជនកុំមានការយល់ច្រឡំ។
ដូចគ្នានឹងការអះអាងរបស់អាជ្ញាធរសង្កាត់ជ្រាវនេះដែរ លោក ហៀប ង៉ា ប្រជាពលរដ្ឋក្នុងភូមិបុស្សក្រឡាញ់នេះ បានអះអាងថា ទីតាំងខាងលើនេះពិតជារណ្តៅដីរួមក្នុងភូមិ ពុំមែនជាត្រពាំងបុរាណ ដូចការលើកឡើងនោះឡើយ។ ម្យ៉ាងវិញទៀតការចាក់ដីបំពេញឡើងវិញដើម្បីផ្តល់ជាទីតាំងដល់ពលរដ្ឋដែលកំពុងរងផលប៉ះពាល់ពីការជីកស្តារត្រពាំងហែរផ្កា គឺជាការយកចិត្តទុកដាក់របស់អាជ្ញាធរសង្កាត់ជ្រាវពិតប្រាកដ ព្រោះទីនេះពុំមែនជាត្រពាំងបុរាណនោះទេ។
យោងតាមលោក ក្អោប រ៉ន ចៅសង្កាត់ជ្រាវ បានឲ្យដឹងថា នៅទូទាំងសង្កាត់ជ្រាវ មានត្រពាំង និងទួលបុរាណប្រមាណជា៥២ទីតាំង ដែលទីតាំងទាំងនោះលោកបានធ្វើរបាយការណ៍ដាក់ជូនខាងមន្ទីរវប្បធម៌ និងវិចិត្រសិល្បៈរួចរាល់ហើយដែរ ហើយក្នុងចំណោម ទីតាំងបុរាណដ្ឋានទាំងនោះ ក៏មិនមានឈ្មោះត្រពាំងស្វាយ ដែលគេបានលើកឡើងនេះដែរ។
ពាក់កព័ន្ធនឹងត្រពាំងស្វាយនេះដែរ បើយោងតាមឯកឧត្តម ឡុង កុសល អគ្គនាយករង និងជាអ្នកនាំពាក្យ នៃអាជ្ញាធរជាតិអប្សរា បានមានប្រសាសន៍ នៅរសៀលថ្ងៃទី០៥ ខែមករានេះថា ត្រពាំងស្វាយនេះវាស្ថិតនៅជារចនាសម្ព័ន្ធរបស់ត្រពាំងហែរផ្កាដែរ។ ចំពោះការចាក់ដីចូលត្រពាំងមួយនេះ ខាងអាជ្ញាធរជាតិអប្សរា បានទាក់ទងជាមួយនឹងអាជ្ញាធរក្រុងសៀមរាប រួចហើយដែរ ដោយសុំឲ្យរក្សាទុកនូវរូបរាងដើមវិញ៕
អត្ថបទ និងរូបភាព: លោកជា ស្រស់ កែសម្រួលដោយ លីវ សុខុន!!!
