ហ្វីលីពីនបានធ្វើការទិញប្រព័ន្ធមីស៊ីលប្រឆាំងនឹងនាវាដែលបាញ់ចេញពីឆ្នេរពីក្រុមហ៊ុនយោធាវិនិយោគរួមគ្នារវាងឥណ្ឌា និងរុស្ស៊ី ប្រាម៉ូសអ៊ែររ៉ូស្ពេស ក្នុងតម្លៃក្បែរ ៣៧៥លានដុល្លារសហរដ្ឋអាមេរិក។ នេះបើតាមការចេញផ្សាយដោយទីភ្នាក់ងារសារព័ត៌មាន Al Jazeera នៅថ្ងៃចន្ទ ទី១៧ ខែមករា ឆ្នាំ២០២២។
លោក ឌែហ្វីន ឡូរិនហ្សាណា មន្ត្រីក្រសួងការពារជាតិហ្វីលីពីន បានសរសេរថា គម្រោងនេះ ជាការចរចារវាងហ្វីលីពីន និងរដ្ឋាភិបាលឥណ្ឌា។ ក្នុងកញ្ចប់គម្រោងនោះដែរក្រុមហ៊ុនប្រាម៉ូសនឹងផ្ដល់ប្រអប់មីស៊ីលចំនួន៣ ក៏ដូចជាបង្ហាត់អ្នកប្រតិបត្តិការ និងអ្នកថែទាំមីស៊ីល ហើយព្រមទាំងផ្ដល់ការគាំទ្រដល់ប្រព័ន្ធភ័ស្តុភារនានាទៀតផង។
សារព័ត៌មាន Al Jazeera បានចុះផ្សាយថា ហ្វីលីពីនជាប្រទេសដំបូងដែលបានទិញប្រព័ន្ធមីស៊ីលពីប្រទេសនេះ។
លោក Ramon Zagala អ្នកនាំពាក្យកងទ័ពហ្វីលីពីនបានលើកឡើងថា ការទិញមីស៊ីលទាំងនេះជា «ផ្នែកមួយនៃការការពារទឹកដី» របស់ប្រទេសអាស៊ីអាគ្នេយ៍មួយនេះ។
ហ្វីលីពីន កំពុងតែមានជម្លោះរ៉ាំរ៉ៃជាមួយនឹងមហាអំណាចចិនទាក់ទិននឹងដែនសមុទ្រចិន។
ប្រទេសនេះ កំពុងតែខិតខំព្យាយាមធ្វើទំនើបកម្មប្រព័ន្ធយោធារបស់ខ្លួន ដើម្បីជម្រុះចេញនូវបរិក្ខារយោធាហួសសម័យដែលប្រើប្រាស់ តាំងពីជំនាន់សង្គ្រាមលោកលើកទី២ និងសម័យសង្គ្រាមវៀតណាម៕
