ក្រោមអធិបតីភាព ឯកឧត្តម អ៊ាន ឃុន ប្រធានក្រុមប្រឹក្សាខេត្តសៀមរាប នៅក្នុងកិច្ចប្រជុំសាមញ្ញលើកទី៣៣របស់ខ្លួន ដែលបានប្រប្រឹត្តិទៅនាព្រឹកថ្ងៃទី០៣ ខែកុម្ភៈ ឆ្នាំ២០២២ បញ្ហាស្នើសុំរបស់រដ្ឋបាលស្រុកបន្ទាយស្រី ចំពោះអាជ្ញាធរជាតិអប្សរា ដើម្បីអនុញ្ញាតិឲ្យគម្រោងកាត់បន្ថយភាពក្រីក្រ និងអភិវឌ្ឍកសិកម្មខ្នាតតូចតំបន់បឹងទន្លេសាបជំហាន២ អាចសាងសង់បានផ្លូវបេតុងនិងកៅស៊ូ នៅភូមិថ្នល់ទទឹង និងនៅភូមិថ្នល់បណ្តាយចំនួន៣ខ្សែ នៅឃុំព្រះដាក់ បានដាក់ចូលនៅក្នុងកម្មវត្តុនៃកិច្ចប្រជុំ ដើម្បីដោះស្រាយជូនប្រជាពលរដ្ឋ ដោយសារតែសំណើរនេះ ត្រូវបានអាជ្ញាធរអប្សរា បានបដិសេធជាច្រើនលើកមកហើយនោះ ។
ឯកឧត្តម ទៀ សីហា អភិបាលខេត្តសៀមរាបបានលើកឡើងថា កិច្ចការដ៏សំខាន់នេះ វាបានបង្កើតឲ្យមានសាវតាជាយូរឆ្នាំមកហើយ ដែលមិនអាចពន្យាពេលបន្តបានទៀតនោះឡើយ បើទោះជាក្នុងលទ្ធភាពយ៉ាងណាក៏ដោយ ដំណោះស្រាយ ត្រូវតែស្រាយបំភ្លឺដោយហេតុផលសមស្រប ជូនប្រជាពលរដ្ឋ។ ឯកឧត្តម បានសំណូមពរដោយទទូច បើទោះជាក្នុងតំបន់នោះ មិនមានសក្តានុពលប្រើប្រាស់ខ្លាំងក្តី ក៏ប៉ុន្តៃក៏អាចជឿបានថា អ្នកជំនាញរបស់អាជ្ញាធរជាតិអប្សា និងអាចប្រើប្រាស់សមត្ថកិច្ចរបស់ខ្លួន សម្របសម្រួលជាមួយក្រុមអ្នកជំនាញការបរទេស នៃគណកម្មាធិការអន្តរជាតិ សម្របសម្រួល កិច្ចគាំពារដើម្បីអភិវឌ្ឍរមណីដ្ឋានប្រវត្តិសាស្រ្តអង្គរ ( ICC-Angkor ) បានជោគជ័យ ទៅតាមអ្វីដែលអាចធ្វើទៅបាន។
លោក ឃឹម ហ្វីណង់ អភិបាលស្រុកបន្ទាយស្រិ លើកបញ្ជាក់ថា ការទទួចស្នើសុំនេះ គឺវាពិតជាមានភាពចាំបាច់ខ្លាំងណាស់ដើម្បីជីវភាពរស់ប្រចាំថ្ងៃ ក្រោមចំណុះប្រជាពលរដ្ឋជិត១០០០គ្រួសារ។ យ៉ាងណាក៏ដោយ ប្រជាពលរដ្ឋបានបដិសេដរួចហើយថា មិនព្រមទទួលយកនោះទេ ផ្លូវដីក្រហម ហុយ នាំមកនូវផលអាក្រក់សម្រាប់សុខភាពនោះ និងប៉ះពាល់ដល់បញ្ហាផ្សេងៗជាច្រើនទៀត។ បញ្ហាដែលមានការប៉ះទង្គិចជាមួយអាជ្ញាធរអប្សរា មិនត្រឹមតែជាបញ្ហាផ្លូវនេះនោះឡើយ ៣ឆ្នាំចុងក្រោយនេះ មូលនិធិឃុំ-សង្កាត់របស់ឃុំព្រះដាក់ នៅសល់ជាង ៦០០លានរៀល បូកនឹងមូលនិធិនៃគម្រោងបឹងទន្លេសាប ២០ម៉ឺនដុល្លាទៀត ឃុំព្រះដាក់មានថវិកាជិត ៤០ម៉ឺនដុល្លា ដែលរកគោលដៅប្រើប្រាស់មិនបាន និងអាចប្រឈមដោយម្ចាស់មូលនិធិឧបត្ថម្ភ កាត់ចេញពីគម្រោងវិញ ផងដែរ។
ឯកឧត្តម យិត ចាន់ដារ័ត្ន អគ្គនាយករងអាជ្ញាធរជាតិអប្សរា បានស្រាយបំភ្លឺនៅក្នុងកិច្ចប្រជុំនោះថា ដំណោះស្រាយនេះពិតជាមានសាវតាយូរអង្វែងមកហើយ ក៏ប៉ុន្តែយ៉ាងណាមិនមានន័យថា វានៅឃ្លាតឆ្ងាយពីការទទួលខុសត្រូវដោះស្រាយនោះឡើយ បញ្ហាកូវីដ១៩ ក៏ជាផ្នែកមួយនៃការពន្យាពេលនេះផងដែរ។ ដើមខែមករា ឆ្នាំ២០២២នេះ អាជ្ញាធរជាតិអប្សរា បានដាក់ផែនការរួចហើយ រៀបចំដំណើរទស្សនកិច្ចរបស់ក្រុមជំនាញការអន្តរជាតិ អាដហុក របស់គណកម្មាធិការអន្តរជាតិ សម្រាបសម្រួលកិច្ចការគាំពារ ដើម្បីអភិវឌ្ឍរមណីដ្ខានប្រវត្តិសាស្រ្តអង្គរ ( ICC-Angkor ) ដើម្បីចុះពិនិត្យតាមសំណើរសហគមន៍ ក៏ប៉ុន្តែបញ្ហាកូវិដ-១៩ បំភ្លែងថ្មី កិច្ចប្រជុំត្រូវបានលើកពេលទៅចុងខែមិនា ២០២២ វិញ។
ឯកឧត្តម បានបញ្ជាក់ឲ្យដឹងដែរថា តែយ៉ាងណាក៏ដោយ អាជ្ញាធរអប្សរាបានប្រើប្រាស់ឱកាសដើម្បីទំនាក់ទំនង ផ្ញើសំណើរនិងគោលការណ៍បច្ចេកទេសទៅក្រុមជំនាញការបច្ចេកទេសអន្តរជាតិ ដើម្បីសុំសេក្តីអនុម័ត ហើយសំណើរទាំងនោះ សង្ឃឹមថា អាចនឹងទទួលចម្លើយនៅក្នុងអំឡុងខែកុម្ភៈនេះ។ សំណើរគោលការណ៍បច្ចេកទេសនោះ បើសិនជាត្រូវបានសម្រេចយល់ព្រមមែននោះ អប្សរាគិតរួចហើយនឹងត្រូវយកទៅអនុវត្ត មិនត្រឹមតែនៅសហគមន៍ព្រះដាក់ប៉ុណ្ណោះទេ តែត្រូវអនុវត្តនៅតំបន់ហានីភ័យមានសក្តានុពលបុរាណវិទ្យា ផ្សេងទៀតផងដែរ៕
អត្ថបទ និង រូបភាព៖ លោគ ងឹន គីមឡេង
