នៅព្រឹកថ្ងៃ៤ ខែកុម្ភៈ ឆ្នាំ២០២២ នៅសាលាខេត្តសៀមរាប មានបើកសិក្ខាសាលាឆ្លុះបញ្ចាំងលទ្ធផលការងារនៃការអនុវត្តផែនការសកម្មភាព ឆ្នាំ២០២១ និងទិសដៅអនុវត្តបន្តឆ្នាំ២០២២ របស់គណៈកម្មាធិការពិគ្រោះយោបល់កិច្ចការស្ត្រី និងកុមារខេត្ត ក្រោមអធិបតីភាព ឯកឧត្តម តោ គឹមស៊ាន សមាជិកក្រុមប្រឹក្សាខេត្ត លោកជំទាវ ស៊ិន ណម សមាជិកក្រុមប្រឹក្សាខេត្ត និងលោកស្រី យូ សុភា អភិបាលរង ព្រមទាំងសមាជិក សមាជិកក្រុង ស្រុក ឃុំ សង្កាត់ និងអង្គការដៃគូសរុប ១៥១នាក់ (ស្រី៩៧នាក់)។
តាមការគូសបញ្ជាក់របស់ លោកជំទាវ ស៊ិន ណម ក្នុងនាម ប្រធាន ប្រធានគណៈកម្មាធិការពិគ្រោះយោបល់កិច្ចការស្រ្តី និងកុមារខេត្ត បង្ហាញថា អង្គសិក្ខាសាលានេះ រៀបចំឡើងក្នុងគោលបំណង ដើម្បីឆ្លុះបញ្ចាំងលទ្ធផលសម្រេចបាន បញ្ហាប្រឈម និងដំណោះស្រាយ នៃការអនុវត្តតួនាទី ភារកិច្ចរបស់ គ.ក.ស.ក ខេត្ត និងបណ្តាវិស័យរបស់ខ្លួនដែលបានធ្វើសកម្មភាពក្នុងការជំរុញគាំទ្រ និងដោះស្រាយបញ្ហាទាំងឡាយដែលកើតមានឡើងចំពោះស្រ្តី យុវវ័យ កុមារ និងជនងាយរងគ្រោះក្នុងរយៈពេលពេញមួយឆ្នាំ២០២១ កន្លងមកនេះ។ ម្យ៉ាងទៀត សិក្ខាសាលានេះ ក៏នឹងស្វែងរកធាតុចូលបន្ថែម ដើម្បីធ្វើការកែលម្អ តម្រង់ទិសដល់បណ្តាវិស័យរបស់ខ្លួនឱ្យ កាន់តែមានភាពល្អប្រសើរឡើងថែមទៀត។
ថ្លែងក្នុងឱកាសនោះ លោកស្រី យូ សុភា បានសាទរចំពោះវឌ្ឍនភាពការងាររបស់ គណៈកម្មាធិការពិគ្រោះយោបល់កិច្ចការស្ត្រី និងកុមារគ្រប់លំដាប់ថ្នាក់ក្នុងខេត្ត ព្រមទាំងអ្នកពាក់ព័ន្ធទាំងអស់ ដែលបានខិតខំប្រឹងប្រែងអស់ពីកម្លាំងកាយចិត្តក្នុងការអនុវត្តតួនាទី ភារកិច្ចរបស់ខ្លួនអស់រយៈពេលពេញមួយឆ្នាំ ដើម្បីលើកកម្ពស់ការយល់ដឹងពីតម្រូវការរបស់ស្រ្តី យុវវ័យ កុមារ និងជនងាយរងគ្រោះ ព្រមទាំងបង្កើនភាពអង់អាចដល់ស្រ្តីក្នុងក្របខណ្ឌ នៃរដ្ឋបាលថ្នាក់ក្រោមជាតិ ។
លោកស្រីអភិបាលរងខេត្ត បានបញ្ជាក់ថា ពាក់ព័ន្ធនឹងគោលបំណងកំណែទម្រង់នានា របស់រាជរដ្ឋាភិបាលកម្ពុជា ដែលកំពុងយកចិត្តទុកដាក់អនុវត្តន៍នាពេលបច្ចុប្បន្ន មានគោលបំណងលើកកម្ពស់ការផ្តល់សេវាសាធារណៈជូនប្រជាពលរដ្ឋឱ្យកាន់តែមានប្រសិទ្ធភាព ដើម្បីលើកកម្ពស់ការអភិវឌ្ឍសេដ្ឋកិច្ចមូលដ្ឋានប្រកបដោយសមធម៌ តម្លាភាព គណនេយ្យភាព និងបរិយាប័ន្ន សំដៅកាត់បន្ថយភាពក្រីក្ររបស់ប្រជាពលរដ្ឋ។ លោកស្រី ជឿជាក់ថា ការលើកឡើងនូវបញ្ហាប្រឈមនិងដំណោះស្រាយក្នុងអង្គសិក្ខាសាលានាពេលនេះ នឹងចូលរួមបន្ថែមក្នុងការអភិវឌ្ឍន៍សមត្ថភាពរបស់សិក្ខាកាម និងអ្នកចូលរួមទាំងអស់ យកទៅអនុវត្តន៍នៅមូលដ្ឋានរបស់ខ្លួនឱ្យកាន់តែមានប្រសិទ្ធភាពខ្ពស់ ៕
អត្ថបទ និង រូបថត ៖ លោក ម៉ី សុខារិទ្ធ
កែសម្រួលអត្ថបទ ៖ លោក សេង ផល្លី
