កាលពីព្រឹកថ្ងៃទី៧ ខែកុម្ភៈ ឆ្នាំ២០២២ ព្រឹកមិញនេះ សម្តេចពិជ័យសេនា ទៀ បាញ់ ឧបនាយករដ្ឋមន្ត្រី រដ្ឋមន្ត្រីក្រសួងការពារជាតិ និងជាប្រធានក្រុមការងាររាជរដ្ឋាភិបាលចុះជួយខេត្តសៀមរាប ឧបត្ថម្ភម៉ូតូម្នាក់មួយគ្រឿង រួមជាមួយនឹងលិខិតសរសើរនិងមួកសុវត្ថិភាពចំនួន១ ដល់សិស្សចំនួន១៥៣នាក់ ក្នុងខេត្តសៀមរាប ដែលបានប្រឡងសញ្ញាបត្រមធ្យមសិក្សាទុតិយភូមិ សម័យប្រឡង ថ្ងៃទី២៧ ខែធ្នូ ឆ្នាំ២០២១ កន្លងទៅនេះ ទទួលបាននិទ្ទេស A ។
មានប្រសាសន៍ក្នុងឱកាសនោះ សម្តេចពិជ័យសេនា ទៀ បាញ់ ក្នុងនាមរាជរដ្ឋាភិបាល និងក្នុងនាមក្រុមការងាររាជរដ្ឋាភិបាលចុះជួយខេត្តសៀមរាប បានសម្តែងសេចក្តីសោមនស្សរីករាយ និងចូលរួមអបអរសាទរចំពោះសិស្សានុសិស្សខេត្តសៀមរាបចំនួន១៥៣រូប ក្នុងចំណោមសិស្សានុសិស្ស ចំនួន១.៧៥៣នាក់ ដែលទទួលបាននិទ្ទេសAទូទាំងប្រទេស ព្រមទាំងបានកោតសរសើរ និងវាយតម្លៃខ្ពស់ចំពោះឯកឧត្តម លោកជំទាវ អស់លោក លោកស្រី ថ្នាក់ដឹកនាំគ្រប់លំដាប់ថ្នាក់ ពិសេសលោកគ្រូ អ្នកគ្រូ មាតាបិតា និងអាជ្ញាធរមានសមត្ថកិច្ចទាំងអស់ ដែលបានខិតខំប្រឹងប្រែងបង្ហាត់បង្រៀន ទំនុកបម្រុង សហការជិតស្និទ្ធចូលរួមយ៉ាងសកម្មបំពេញការងារក្នុងវិស័យអប់រំ យុវជន និងកីឡា ក្នុងឆ្នាំសិក្សា២០២១ ប្រកបដោយជោគជ័យ ដែលសមិទ្ធផលនេះជាការចូលរួមចំណែក និងជួយគាំទ្រលើគ្រប់ផ្នែកនិង ជាសក្ខីកម្ម បង្ហាញពីប្រសិទ្ធភាពនៃការអប់រំ ប្រកបដោយគុណភាព បានកើតចេញពីសមត្ថភាព និងកិច្ចខិតខំប្រឹងប្រែងរបស់សិស្សានុសិស្ស លោកគ្រូ អ្នកគ្រូ ក្នុងការចូលរួមលើកកម្ពស់វិស័យអប់រំ ដើម្បីជម្រុញកំណើនសេដ្ឋកិច្ច និងការអភិវឌ្ឍន៍ ប្រកបដោយចីរភាព។
សម្តេចពិជ័យសេនា បានបន្ថែមថា វិស័យអប់រំនៅទូទាំងប្រទេសនិយាយជារួម និងនិយាយដោយឡែកនៅខេត្តសៀមរាប មានភាពរីកចម្រើនជាបន្តបន្ទាប់គួរឲ្យកត់សម្គាល់ ប្រកបដោយមោទនភាព ហើយលទ្ធផលដែលទទួលបាននេះ គឺមានកត្តា០២សំខាន់ ៖ ទី១. ការខិតខំប្រឹង ប្រែងរៀនសូត្រផ្ទាល់របស់សិស្ស និង ទី២. ដោយសារការខិតខំរបស់រាជរដ្ឋាភិបាល ដែលបានផ្តល់ឱកាសឲ្យមានសន្តិភាព ស្ថេរភាព និងមានហេដ្ឋារចនាសម្ព័ន្ធ សាលារៀន និងគ្រូបង្រៀន ហើយបើមិនមានកត្តារួមគ្នាទាំងនេះទេ ក៏មិនអាចមានលទ្ធផលដូចពេលនេះដែរ ដូច្នេះ ក្មួយៗជាទំពាំងស្នងឬស្សី ជាអ្នកបន្តវេននាពេលអនាគត ហេតុនេះត្រូវខិតខំយកចិត្តទុកដាក់រួមគ្នាការពារសន្តិភាព ដែលកម្រមាននាពេលនេះ ឲ្យបានជាដាច់ខាត ដោយមិនអនុញ្ញាតឲ្យជនណាម្នាក់ ឬក្រុមបក្សណាមួយ ឬជនបរទេសណា មកបំផ្លាញសន្តិភាពនៅកម្ពុជា បានជាដាច់ខាត ពិសេសត្រូវខិតខំបន្តការសិក្សាទៅមុខទៀត ដើម្បីទទួលបានចំណេះដឹង ចំណេះធ្វើ សម្រាប់ដឹកនាំនាវាកម្ពុជា ឆ្ពោះទៅរកការអភិវឌ្ឍន៍ប្រកបដោយប្រសិទ្ធភាពខ្ពស់។
ព័ត៌មានជាតិ ថ្មីៗ
សម្តេចពិជ័យសេនា ទៀ បាញ់ បានបញ្ជាក់ទៀតថា សន្តិភាពនៅកម្ពុជាកើតមានឡើងដោយសារយុទ្ឋសាស្ត្រនៃគោលនយោបាយឈ្នះ ឈ្នះ របស់សម្តេចតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា ហើយសម្តេចតេជោ បានចាត់ទុកវិស័យអប់រំ ជាការងារអាទិភាព ព្រោះការអប់រំបានបង្កើតឡើងមូលធនមនុស្ស គំនិតច្នៃប្រឌិត បច្ចេកវិទ្យា ដែលជាកត្តាដ៏សំខាន់មិនអាចខ្វះបាន សម្រាប់ទ្រទ្រង់កំណើនសេដ្ឋកិច្ច និងការអភិវឌ្ឍន៍ប្រកបដោយចីរភាព និងដើម្បីធានាបាននូវសក្តានុពល សម្រាប់ការប្រកួតប្រជែងជាអន្តរជាតិ ការធ្វើពិពិធកម្ម សេដ្ឋកិច្ចជាតិ និងនិរន្តភាពនៃការអភិវឌ្ឍន៍សេដ្ឋកិច្ច និងសង្គមរបស់យើង។
ក្នុងឱកាសនោះដែរ សម្តេចពិជ័យសេនា ទៀ បាញ់ បានអំពាវនាវដល់លោកគ្រូ អ្នកគ្រូនិង សិស្សានុសិស្សទាំងអស់ ត្រូវបន្តលើកកម្ពស់សុខភាពអនាម័យឱ្យបានខ្ជាប់ខ្ជួន ក្នុងបរិបទកូវីដ-១៩នេះ ជាពិសេសអនុវត្តឲ្យបានខ្ជាប់ខ្ជួននូវវិធានការ៣កុំ និង៣ការពារ ដើម្បីទប់ស្កាត់ការឆ្លងជំងឺកូវីដ-១៩នៅក្នុងសាលារៀន និងត្រូវគិតគូពីជម្រើសឱ្យបានច្រើន ក្នុងការផ្តល់សេវាអប់រំ អាស្រ័យលើទីតាំងភូមិសាស្រ្ត នៃហានិភ័យការចម្លងជំងឺកូវីដ-១៩ ។
សូមបញ្ជាក់ថា ការប្រឡងសញ្ញាបត្រមធ្យមសិក្សាទុតិយភូមិឆ្នាំ២០២១នៅខេត្តសៀមរាប មានមណ្ឌលប្រឡងចំនួន ១២មណ្ឌល ស្មើនឹង៣៥៧បន្ទប់ មានបេក្ខជនសរុបចំនួន៨.៨៣២នាក់ ក្នុងនោះស្រីចំនួន ៥.០៣៨នាក់ ហើយក្នុងចំណោមបេក្ខជនទាំងអស់នេះ មានបេក្ខជនប្រភេទជាស្វ័យរិនចំនួន១៥៧នាក់ ក្នុងនោះស្រីចំនួន ៧១នាក់ និងឯកជនបំពេញវិជ្ជាចំនួន១៥៥នាក់ ក្នុងនោះស្រីចំនួន ៦៩នាក់ និងបេក្ខជនប្រភេទជាស្វ័យរិនបំពេញវិជ្ជាចំនួន ២០០នាក់ ៕
អត្ថបទ និង រូបថត ៖ សហការី
កែសម្រួលអត្ថបទ ៖ លោក លីវ សាន្ត
