ក្រុមអ្នកបច្ចេកទេសផ្នែកបុរាណវិទ្យារបស់អាជ្ញាធរជាតិអប្សរា បាននឹងកំពុងដំណើរការជួសជុលថែទាំប្រាសាទលលៃ ពីព្រោះថាប្រាសាទមួយនេះ មានអាយុកាលជាង ១ពាន់ឆ្នាំមកហើយ ហើយកំពុងមានសភាពទ្រុឌទ្រោមប្រឈមនឹងគ្រោះថ្នាក់យ៉ាងខ្លាំង។
លោក សារ៉ាយ គឹមហួល មន្រ្តីបច្ចេកទេសអភិរក្សក្រុមប្រាសាទរលួស បានឲ្យដឹងនៅព្រឹកថ្ងៃទី០៩ ខែកុម្ភ:នេះថា ក្នុងការជួសជុលថែទាំប្រាសាទលលៃនេះ ក្រុមការងារកំពុងយកចិត្តទុកដាក់ជួសជុលពង្រឹងរចនាសម្ព័ន្ធខ្លោងទ្វារ ដែលធ្វើកំណាយឃើញនៅមុខប្រាសាទផ្នែកខាងកើត ហើយតម្រូវឱ្យធ្វើការជួសជុលពង្រឹងរចនាសម្ព័ន្ធជើងក្រោមរបស់តួប្រាសាទ និងចាប់ផ្តើមធ្វើកំណាយយកគំនរថ្ម ដែលបាក់លុបតួប្រាង្គនិរតីរបស់ប្រាសាទចេញ ដើម្បីត្រៀមធ្វើការជួសជុលបន្តនាពេលខាងមុខទៀតផងដែរ។
លោក គឹមហួល បន្តថា ចំពោះការងារជួសជុល និងថែទាំនេះ ក្រុមមន្ត្រីជំនាញបានអនុវត្តជាប្រចាំ នៅតាមចំណុចដែលមានហានិភ័យខ្ពស់ជាចាំបាច់ ។ប្រាសាទលលៃ ស្ថិតក្នុងភូមិលលៃ ឃុំបាគង ស្រុកប្រាសាទបាគង ខេត្តសៀមរាប។ ប្រាសាទនេះមានតួប៉ម៤ ធ្វើអំពីឥដ្ឋ សង់រាងជា២ជួរមុខក្រោយនៅលើជើងគ្រឹះ ដែលមានទទឹង៨០ម៉ែត្រ និងបណ្តោយ៩០ម៉ែត្រ។ ប្រាសាទលលៃ បានកសាងនៅចុងសតវត្សទី៩ នៃគ្រឹះសករាជ៨៩៣ ដោយព្រះបាទយសោវរ័ន្មទី១ ដើម្បីឧទ្ទិសថ្វាយព្រះឥសូរ ក្នុងសាសនាព្រាហ្មណ៍។
សូមជម្រាបជូនថា បើតាមលោក គឹមហួល ចំពោះការងារជួសជុល និងថែទាំនេះ ក្រុមមន្ត្រីជំនាញបានអនុវត្តជាប្រចាំ នៅតាមចំណុច ដែលមានហានិភ័យ ពោលគឺប្រាសាទដទៃទៀតមដែលស្ថិតក្នុងក្រុមប្រាសាទរលួស ក្នុងនោះមានប្រាសាទរលួស, ប្រាសាទលលៃ ប្រាសាទព្រៃមន្ទីរ, ប្រាសាទបាគង និងប្រាសាទត្រពាំងផុង ដែលប្រាសាទបុរាណទាំងនោះស្ថិតក្នុងស្រុកប្រាសាទបាគងជាមួយគ្នា៕
អត្ថបទ និងរូបភាព: លោកជា ស្រស់ កែសម្រួលដោយ លីវ សុខុន!!!
