មជ្ឍមណ្ឌលបណ្តុះបណ្តាលអង្គរ និងនាយកដ្ឋានអភិវឌ្ឍន៍ទេសចរណ៍អង្គរ នៃអាជ្ញាជាតិអប្សរា បានបើកវគ្គបណ្តុះបណ្តាលជំនាញ ស្តីពីការពង្រឹងដមត្ថភាពបដិសណ្ឋារកិច្ចដល់មន្ត្រី និងបុគ្គលិក ដែលកំពុងបម្រើការជាភ្នាក់ងារទេសចរណ៍ចំនួន១០០នាក់។ វគ្គបណ្ដុះបណ្ដាលនេះ ធ្វើឡើងនៅសាលប្រជុំអាជ្ញាធរជាតិអប្សរា កាលពីថ្ងៃទី០៨ ខែកុម្ភៈ ឆ្នាំ២០២២ ក្រោមអធិបតីភាពឯកឧត្ដម ឡុង កុ សល អគ្គនាយករង ជាអ្នកនាំពាក្យ និងជាតំណាងដ៏ខ្ពង់ខ្ពស់របស់ឯកឧត្ដមអគ្គនាយក ហង់ ពៅ។
ឯកឧត្ដម ឡុង កុសល អគ្គនាយករង នៃអាជ្ញាធរជាតិអប្សរា មានប្រសាសន៍ថា វគ្គបណ្តុះបណ្តាលជំនាញបដិសណ្ឋារកិច្ចនេះ គឺពិតជាមានសារសំខាន់ណាស់ សម្រាប់មន្ត្រី និងភ្នាក់ងារទេសចរណ៍ នៃអាជ្ញាធរជាតិអប្សរា ដែលកំពុងបម្រើសេវាកម្មទេសចរណ៍ ដោយត្រូវគិតគូរទាំងគុណភាព នៃសេវាកម្មទេសចរណ៍ និងគិតគូរពីផលប៉ះពាល់នៃភ្ញៀវទេសចរ ដែលមកទស្សនា នៅតំបន់ប្រាសាទបុរាណយើងនេះ ។ «យើងត្រូវតែសិក្សាបន្ថែមសមត្ថភាពរបស់យើង ក្នុងន័យធ្វើយ៉ាងណាឱ្យភ្ញៀវទេសចរ ដែលមកទស្សនាអង្គរ អាចទទួលបានបទពិសោធន៍ដ៏ល្អបំផុត ហើយផ្តល់ផលប៉ះពាល់ដ៏តិចបំផុតដល់តំបន់រមណីយ ដ្ឋានអង្គរ»។ ឯកឧត្ដមមានប្រសាសន៍បន្ថែមទៀតថា អាជ្ញាធរជាតិអប្សរាតែងយកចិត្តទុកដាក់ចំពោះការបណ្តុះបណ្តាលធនធានមនុស្សឱ្យបានច្រើនជំនាញដល់មន្ត្រី បុគ្គលិក ដើម្បីអភិវឌ្ឍន៍សមត្ថភាព និងចំណេះដឹងប្រកបដោយគុណភាព ប្រសិទ្ធភាព និងក្រមសីលធម៌វិជ្ជាជីវ:។
សូមជម្រាបថា វគ្គបណ្តុះបណ្តាលជំនាញបដិសណ្ឋារកិច្ចភ្ញៀវទេសចរដែលធ្វើឡើងនៅសាលសន្និសីទអង្គរនេះ រៀបចំឡើងក្នុងគោលបំណង ផ្ដល់ជំនាញយ៉ាងត្រឹមត្រូវដល់ភ្នាក់ងារទេសចរណ៍ របស់អាជ្ញាធរអប្សរា ទាំងការស្វាគមន៍ និងបម្រើសេវាយ៉ាងកក់ក្ដៅ ក្នុងដំណើរការ គ្រប់គ្រងតំបន់រមណីយដ្ឋានអង្គរ ដើម្បី រួមចំណែកការលើកតម្លៃសម្បត្តិបេតិកភណ្ឌរបស់ពិភពលោក។ ការបណ្តុះបណ្តាល បានផ្តោតទៅលើខ្លឹមសារ៤ចំណុចរួមមាន៖ ១-របៀបបដិសណ្ឋារកិច្ចសម្រាប់ភ្នាក់ងារទេសចរណ៍។ ២- បទប្បញ្ញត្តិ នៃការទស្សនាប្រាសាទ និងរមណីយដ្ឋានអង្គរ។ ៣- លំហាត់ដំណោះស្រាយលើបញ្ហាប្រឈមនានានៅតាមប្រាសាទ និងទី៤- បំប៉នជំនាញផ្នែកភាសាអង់គ្លេស សម្រាប់ប្រើប្រាស់ក្នុងវិជ្ជាជីវ:៕
អត្ថបទ និងរូបភាព: លោកបូ សាវី កែសម្រួលដោយ លីវ សុខុន!!!
