នៅក្នុងដំណើរទស្សនកិច្ចទៅកាន់មន្ទីរពេទ្យបង្អែកខេត្តសៀមរាប នាព្រឹកថ្ងៃទី០៩ ខែកុម្ភ: ឆ្នាំ២០២២នេះ ឯកឧត្តម W. Patrick Murphy ឯកអគ្គរដ្ឋទូតសហរដ្ឋអាមេរិកប្រចាំនៅកម្ពុជា បានបង្ហាញនូវក្តីសោមនស្សរីករាយក្រៃលែង ដោយថា ដំណើរទស្សនកិច្ចនេះ បាននាំមកនូវភាពស្និតស្នាល ទៅជួបដៃគូសហការដ៏សំខាន់ ដើម្បីស្វែងយល់ពីសុខភាពប្រជាពលរដ្ឋ។
ឯកឧត្តម ក្រុស សារ៉ាត់ ទីប្រឹក្សាក្រសួងសុខាភិបាល និងជាប្រធានមន្ទីរសុខាភិបាល នៃរដ្ឋបាលខេត្តសៀមរាប មានវត្តមានទទួលស្វាគមន៍យ៉ាងកក់ក្តៅបំផុតនោះ បានបង្ហាញនូវសេចក្តីរាយការណ៍សង្ខេប យ៉ាងដូច្នេះថា៖ ខេត្តសៀមរាប មានមន្ទីរពេទ្យបង្អែកខេត្តចំនួន១ មន្ទីរពេទ្យបង្អែកស្រុកប្រតិបត្តិចំនួន៤ និងមណ្ឌលសុខភាពចំនួន៩៣កន្លែង នៅតាមបណ្តាក្រុង-ស្រុកទាំង១២ និងឃុំ-សង្កាត់ទាំង១០០ ទូទាំងខេត្ត។
មន្ទីរពេទ្យបង្អែកខេត្តសៀមរាប ត្រូវបានចាត់ទុកជាមន្ទីរពេទ្យប្រចាំតំបន់ ក្នុងនោះមានអ្នកជំងឺមកពីបណ្តាខេត្តជិតខាងផងដែរ ប្រមាណពី ១០ ទៅ ២០% ។ មន្ទីរពេទ្យ១នេះ ស្ថិតនៅកណ្តាលក្រុងសៀមរាប លើផ្ទៃដីជិត៤ ហិចតា មានគ្រែអ្នកជម្ងឺសរុប ៣៧០គ្រែ អត្រាស្នាក់នៅ ១១០% រយ:ពេលស្នាក់នៅជាមធ្យមពី ៥ថ្ងៃទៅ ១សប្តាហ៍ អត្រាមរណ:មានប្រមាណជា ២% ដែលក្នុងមូលហេតុចម្បងនៃការស្លាប់ គឺដោយសារតែជំងឺរលាកសួត រលាកផ្លូវដង្ហើម និងគ្រោះថ្នាក់ចរាចរណ៍។
សេចក្តីរាយការណ៍នេះ ក៏បានបង្ហាញឲ្យដឹងដែរថា កន្លងមកនេះ មន្ទីរពេទ្យបង្អែកខេត្ត បានទទួលការគាំទ្រពីមជ្ឈមណ្ឌលបង្ការជម្ងឺសហរដ្ឋអាមេរិក ទាំងឧបករណ៍វេជ្ជសាស្ត្រ និងផ្នែកបច្ចេកទេស ដែលជាផ្នែកមួយនៃការចូលរួមទប់ស្កាត់ និងកាត់បន្ថយការរីករាលដាលនៃជម្ងឺកូវីដ-១៩ ។
ឯកអគ្គរដ្ឋទូតសហរដ្ឋអាមេរិក មានប្រសាសន៍ថា៖ នៅក្នុងបរិបទបច្ចុប្បន្ននេះ វិស័យសុខាភិបាលពិតមានសារសំខាន់ណាស់ ព្រោះយើងទាំងអស់គ្នាត្រូវការសុខភាពរឹងមាំ មានសុខភាពទើបយើងអាចសម្រេចបាន លើគ្រប់កិច្ចការទាំងអស់ ហើយអ្វីកាន់តែរីករាយកក់ក្តៅនៅក្នុងដំណើរទស្សនកិច្ចនេះ គឺការបានជួបមន្រ្តីសុខាភិបាល បុគ្គលិកជំនាញពេទ្យឆ្នើមៗ កំពុងសកម្ម ថែទាំ ព្យាបាលអ្នកជម្ងឺបានល្អ ប្រកបដោយវិជ្ជាជីវ:
ឯកឧត្តម ក៏បានឲ្យដឹងដែរថា តាមរយ:ស្ថានទូតអាមេរិក មជ្ឈមណ្ឌលបង្ការជម្ងឺសហរដ្ឋអាមេរិក បានសហការយ៉ាងល្អប្រសើរជាមួយភាគីកម្ពុជា ក្នុងការជួយទប់ស្កាត់ជម្ងឺកូវីដ-១៩។ ក៏បានបង្ហាញនូវក្តីអបអរសាទរផងដែរ ជាមួយជោគជ័យរបស់មន្ទីរពេទ្យបង្អែកខេត្តសៀមរាប ពិសេសចំពោះកិច្ចដំណើរការដ៏ល្អ របស់មន្ទីរពិសោធន៍នៅក្នុងមន្ទីរពេទ្យមួយនេះ ដែលបានខិតខំប្រឹងប្រែង និងប្រើប្រាស់អស់លទ្ធភាព(US CDC Incinerator) ។ វាពិតជាប្រសើរខ្លាំងណាស់ ដែល(US CDC Incinerator) មិនសម្រាប់តែប្រតិបត្តិការ លើបញ្ហាកូវីដ-១៩ ប៉ុណ្ណោះទេ តែក៏សម្រាប់ប្រើប្រាស់ទៅលើ ប្រតិបត្តិការកំចាត់វីរ៉ុសជម្ងឺឆ្លងកាចសាហាវ ផ្សេងៗទៀតផងដែរ។
អត្ថបទ និងរូបភាព: លោកងិន គីមឡេង និងលោកយូ វង្ស កែសម្រួលដោយ លីវ សុខុន!!!
