ដែលកិច្ចប្រជុំនេះធ្វើឡើង នៅសាលប្រជុំធំសាលាខេត្តសៀមរាប កាលពីរសៀលថ្ងៃទី០៧ ខែកុម្ភ: ឆ្នាំ២០២២ ក្រោមអធិបតីភាពដ៏ខ្ពង់ខ្ពស់សម្ដេចពិជ័យសេនា ទៀ បាញ់ ឧបនាយករដ្ឋមន្ត្រី រដ្ឋមន្ត្រីក្រសួងការពារជាតិ និងជាប្រធានក្រុមការងាររាជរដ្ឋាភិបាលចុះជួយមូលដ្ឋានខេត្តសៀមរាប ឯកឧត្តម ទៀ សីហា អភិបាល នៃគណ:អភិបាលខេត្តសៀមរាប និងឯកឧត្តមអ៊ាន ឃុន ប្រធានក្រុមប្រឹក្សាខេត្ត។ ដោយមានវត្តមានចូលរួមពីសំណាក់ឯកឧត្តម លោកជំទាវ អនុប្រធានក្រុមការងារ សមាជិក សមាជិកាក្រុមការងារថ្នាក់ជាតិ ថ្នាក់ខេត្ត អភិបាលក្រុង ស្រុក ប្រមាណជាង ១០០នាក់។
នាឱកាសនោះ បន្ទាប់ពីឯកឧត្តម ទៀ សីហា អភិបាលខេត្ត និងជាអនុប្រធានអចិន្ត្រៃយ៍ក្រុមការងារ បានអាននូវរបាយការណ៍ លទ្ធផលការងារប្រចាំឆ្នាំ២០២១ និងទិសដៅអនុវត្តបន្តឆ្នាំ២០២២រួចមក សម្ដេចពិជ័យសេនា ទៀ បាញ់ ប្រធានក្រុមការងាររាជរដ្ឋាភិបាលក្បាលចុះមូលដ្ឋានខេត្តសៀមរាប មានប្រសាសន៍បើកអង្គប្រជុំ និងវាយតម្លៃខ្ពស់ទៅលើលទ្ធផល ដែលរដ្ឋបាលខេត្ត សម្រេចបានយ៉ាងល្អប្រសើរ ទោះបីជា ស្ថិតក្រោមបរិបទ នៃការរីករាលដាលជំងឺកូវីដ-១៩ និងមេរោគបម្លែងថ្មីអូមីក្រុង កំពុងនៅតែជាវាយលុកយ៉ាងណាក្តី ប៉ុន្តែក្រុមការងារចុះមូលដ្ឋានខេត្ត និងអាជ្ញាធរខេត្ត បានធ្វើសកម្មភាពបម្រើប្រជាពលរដ្ឋ ក៏ដូចជាការទប់ស្កាត់ការឆ្លងជំងឺនេះ តាមរយ:ការផ្សព្វផ្សាយ ការចុះជួយឧបត្ថម្ភគាំទ្រដល់ប្រជាពលរដ្ឋ ដើម្បីការពារសុខមាលភាពរបស់បងប្អូនមិនអោយមានហានិភ័យខ្ពស់ឡើយ ។ សម្តេចពិជ័យ មានប្រសាសន៍លើកឡើង អំពីការដោះស្រាយបញ្ហាប្រឈមនានាកន្លងមក នៅក្នុងភូមិសាស្ត្រខេត្តសៀមរាប បានកាត់បន្ថយភាពអសកម្ម ហើយធ្វើឱ្យមានការជឿទុកចិត្តលើអាជ្ញាធរយើង និងការដឹកនាំរបស់រាជរដ្ឋាភិបាល។ សម្តេច បន្តទៀតថា នៅគ្រប់សមទ្ធិផលទាំងអស់ ដែលក្រុមការងារ និងសប្បុរសជន បានចូលរួមកន្លងមក សម្រាប់កសាងស្ថាបនាឡើង នូវសមិទ្ធផល ក្នុងខេត្ត តាមបណ្តាក្រុង ស្រុក គឺដើម្បីផលប្រយោជន៍ប្រទេសជាតិ និងប្រជាជន។ ជាមួយនោះ យើងត្រូវតែពង្រឹងការផ្តល់សេវាសាធារណ:លើវិស័យមួយចំនួន ដែលជាតម្រូវកាត និងកង្វះខាតរបស់ប្រជាពលរដ្ឋ គប្បីយើងគ្រប់គ្នាត្រូវ ពង្រឹងពង្រីក ហើយធ្វើការកែលម្អ និងធ្វើការដោះស្រាយ នៅតាមវេទិកាសាធារណ: ជាពិសេសតាមរយ:ក្រុមការងាររាជរដ្ឋាភិបាល ថ្នាក់ខេត្តចុះមូលដ្ឋាន ធ្វើការត្រួតពិនិត្យ និងគាំទ្រការអនុវត្តកម្មវិធីនយោបាយយុទ្ធសាស្ត្រចតុកោណដំណាក់កាលទី៤ របស់រដ្ឋាភិបាលកម្ពុជា ដោយធ្វើកំណែទម្រង់ អនុវត្តកម្មវិធីនយោបាយអភិវឌ្ឍន៍ លើគ្រប់វិស័យឲ្យមានប្រសិទ្ធភាពខ្ពស់ នៅក្នុងឆ្នាំ២០២២នេះ ប្រកបដោយតម្លាភាព យុត្តិធម៌ និងប្រសិទ្ធភាពខ្ពស់។បញ្ហាចំពោះមុខ ផ្តោតសំខាន់លើបញ្ហាព្រៃលិចទឹក ដែលត្រូវអនុវត្តតាមបទបញ្ជារបស់សម្ដេចតេជោ ឲ្យមានប្រសិទ្ធិភាពខ្ពស់ទៅលើ ក្រុមជនខិលខូច ដែលបានយកប្រជាកសិករធ្វើរនាំង ដើមី្បផលប្រយោជន៍របស់ខ្លួននោះ គ្រប់អាជ្ញាធរសមត្ថកិច្ចទាំងអស់ ត្រូវពិនិត្យចំពោះជនដែលបានបំពានការកាប់ទន្ទ្រានព្រៃលិចទឹក ដោយវិធានការធ្ងន់ធ្ងរបំផុត យើងក៏មិនអាចអនុគ្រោះឲ្យបានឡើយ គឺត្រូវអនុវត្តទៅតាមផ្លូវច្បាប់ ។ ក៏មានដែរ ការដោះស្រាយបញ្ហាប្រឈម និងរបាយការណ៍លើកឡើងរបស់សមាជិក សមាជិកានៃអង្គប្រជុំ ពីសំណាក់សម្តេចពិជ័យ និងឯកឧត្តមអភិបាលខេត្ត និងបានជម្រុញដល់ក្រុមការងារនេះ បន្តពិនិត្យតាមដាននូវរាល់សកម្មភាពទាំងឡាយណា ដែលកើតមាននៅមូលដ្ឋានរបស់ខ្លួន ហើយធ្វើការដោះស្រាយឱ្យបានទាន់ពេលវេលា តម្លាភាព សមធម៌ និងប្រសិទ្ធភាពខ្ពស់ ដើម្បីឱ្យបងប្អូនប្រជាពលរដ្ឋ មានទំនុកចិត្តលើរាជរដ្ឋាភិបាលយើងផងដែរ។
បញ្ហាបឹងទន្លេសាប សម្តេចក៏បានជម្រុញដល់អាជ្ញាធរក្រុង ស្រុកទាំងអស់ សំខាន់ជាប់បឹងទន្លេសាប រួមសហការគ្នា ដើមី្បធ្វើការផ្សព្វផ្សាយអប់រំណែនាំដល់ប្រជាពលរដ្ឋ និងសូមឲ្យអាជ្ញាធរបឹងទន្លេសាប ធ្វើការផ្សព្វផ្សាយអំពីច្បាប់គ្រប់តំបន់ព្រៃលិចទឹកឲ្យបានស៊ីជម្រៅដល់ប្រជាកសិករ ដែលអាស្រ័យផលនៅក្នុងតំបន់៣ ក្នុងការសំដៅរក្សាការពារបឹងទន្លេសាប កុំឲ្យវិនាសបាត់បង់នូវព្រៃ លិចទឹក ដែលជាដែនជម្រកត្រីពងកូន នៅរដូវវស្សា និងសត្វស្លាបរស់នៅ។ សម្តេច ក៏បានផ្តាំផ្ញើដល់សមាជិកក្រុមការងារទាំងអស់ ត្រូវប្រកាន់ឲ្យបានខ្ជាប់ខ្ជួនពីតួនាទីភារកិច្ចរបស់ខ្លួន ដែលប្រមុខរាជរដ្ឋាភិបាល បានប្រគល់ជូន ដើមី្បយកទៅអនុវត្តឲ្យទទួលបានជោគជ័យ និងមានប្រសិទ្ធភាពខ្ពស់ សំខាន់គោលនយោបាយភូមិ ឃុំ មានសុវត្ថិភាព, ត្រូវជម្រុញដល់ប្រជាពលរដ្ឋឲ្យបានទៅចាក់ វ៉ាក់សាំងគ្រប់ៗគ្នា និងបន្តអនុវត្តវិធានការ ៣កុំ ៣ការពារ និងចេះសម្របខ្លួនរស់នៅតាមបែបគន្លងថ្មី នៃកូវិដ-១៩ ៕
ព័ត៌មានជាតិ ថ្មីៗ
អត្ថបទ និងរូបភាព:លោក ស៊ាន សុផាត កែសម្រួលដោយ លីវ សុខុន!!!
