គិតត្រឹមល្ងាចថ្ងៃទី១២ ខែកុម្ភៈ ឆ្នាំ២០២២ម្សិលមិញនេះ ថវិកាដែលប្រមូលបានពីការប្រកួតបាល់ទាត់សប្បុរសធម៌រវាងរដ្ឋបាលខេត្តសៀមរាប និងក្រុមហ៊ុន KW Cambodia មានចំនួនប្រមាណ២០លានរៀល ដើម្បីយកទៅបរិច្ចាគជូនដល់មន្ទីរពេទ្យកុមារអង្គរស្ថិតក្នុងក្រុងសៀមរាប ដែលបាននិងកំពុងជួបការលំបាកខ្វះខាតថវិកា ក្នុងប្រតិបត្តិការជួយសង្គ្រោះជីវិតកុមារកម្ពុជាមកពីទូទាំងប្រទេស។
លោក កុសល មករាពិសិដ្ឋ នាយកទីចាត់ការទំនាក់ទំនង និងសហប្រត្តិបត្តិការអន្តរជាតិ នៃសាលាខេត្តសៀមរាប
និងជាតំណាងក្រុមបាល់ទាត់ហនុមាន របស់សាលាខេត្តសៀមរាប បានបង្ហាញនូវការថ្លែងអំណរគុណដល់ ថ្នាក់ដឹកនាំ និងក្រុមការងារក្រុមហ៊ុន KW Siem Reap ទាំងអស់ ដែលបានចូលរួមជាមួយរដ្ឋបាលខេត្តសៀមរាបក្នុងការប្រយុទ្ធប្រឆាំងនឹងជំងឺកូវីដ-១៩ ព្រមទាំងកម្មវិធីកីឡាសប្បុរសធម៌នាពេលនេះ។ ចំពោះថវិកា ដែលរដ្ឋបាលខេត្តប្រមូលបានមានប្រមាណ១០លានរៀល ទទួលបាននៅពេលនេះ គឺជាការចូលរួមពីថ្នាក់ដឹកនាំ មន្ត្រីសាលាខេត្តគ្រប់លំដាប់ថ្នាក់ និងមន្ត្រីរាជការនៅតាមបណ្ដាមន្ទីរ និងអង្គភាព ព្រមទាំងសប្បុរសជនក្នុង និងក្រៅខេត្តផងដែរ។
ក្នុងឱកាសបើកការប្រកួតបាល់ទាត់សប្បុរសធម៌នេះដែរ ឧកញ្ញ៉ាបណ្ឌិត គីម ហ៊ាង ប្រធានស្ថាបនិកក្រុមហ៊ុន KW Cambodia លើកឡើងថា ការមកដល់ខេត្តសៀមរាប គឺជាមោទកភាពរបស់ក្រុមការងារលោក ដែលបានចូលរួមបង្កើតកម្មវិធីសប្បុរសធម៌នៅក្នុងខេត្តសៀមរាប ជាពិសេសជួយដល់មន្ទីរពេទ្យកុមារអង្គរ ដែលជាមន្ទីរពេទ្យក្នុងខេត្តមួយថែទាំសុខភាព និងព្យាបាលកុមារមិនយកកម្រៃ ក្នុងន័យសប្បុរសធម៌។
បើតាមអ្នកតំណាងរបស់មន្ទីរពេទ្យកុមារអង្គរខេត្តសៀមរាប បញ្ជាក់ថា ជារៀងរាល់ឆ្នាំមន្ទីរពេទ្យមួយនេះ ត្រូវការថវិកាប្រមាណ៦លានដុល្លារអាមេរិច ដើម្បីបន្តប្រត្តិបត្តរបស់ខ្លួនក្នុងការថែទាំសុខភាព និងព្យាបាលកុមារនៅកម្ពុជា។ ថវិកាទាំងនោះ ៨០ភាគរយទទួលបានពីការរៃអង្គាសពីក្រៅប្រទេស និង២០ភាគរយនៅក្នុងប្រទេស។ ដោយឡែកដោយសារតែវិបត្តិជំងឺកូវីដ-១៩រយៈពេល២ឆ្នាំចុងក្រោយនេះ (២០២០-២០២១) មន្ទីរពេទ្យបានជួបបញ្ហាថវិកាខ្លាំង ដោយសារម្ចាស់ជំនួយក្រៅប្រទេសបានកាត់បន្ថយជំនួយ និងផ្អាកទាំងស្រុង។
គួរជម្រាបថា ថវិការសរុបជាផ្លូវការ នឹងយកទៅប្រគល់ជូនមន្ទីរពេទ្យកុមារអង្គរ ក្នុងក្រុងសៀមរាប នៅថ្ងៃទី១៤ ខែកុម្ភៈស្អែកនេះ ដែលមានការចូលរួមពីសាលាខេត្តសៀមរាប និងក្រុមហ៊ុន KW Cambodia ផងដែរ។
អត្ថបទ ៖ លោក សេង ផល្លី
រូបភាព៖ អ៊ុន ណារាជ្យ
