ព្រះសង្ឃវត្តដំណាក់ ក្រុងសៀមរាប មានថេរដីកាថា ព្រះគុណថ្លៃនៃវ៉ាក់សាំង ដែលបានមកពីបញ្ញាញាណ នៃប្រមុខរាជរដ្ឋាភិបាល និងឱវាទវិធានការពារសុខភាពប្រជាពលរដ្ឋ ៣ការពារ និង៣កុំ ចៀសឆ្ងាយពីកូវីដ។ ឆ្នាំនេះ ព្រឹត្តិការណ៍សាសនាបានកម្រើកឡើងវិញ ជាមួយនឹងការបើកប្រទេស និងបើកដំណើរការចលនាសេដ្ឋកិច្ចសង្គមលើគ្រប់វិស័យ។
តាមថេរដីកា ព្រះតេជគុណ មហានាមោ ឡាច ចន្ថា ព្រះចៅអធិការវត្តដំណាក់ នារសៀលថ្ងៃទី១៦ ខែកុម្ភ: ឆ្នាំ២០២២ បានឲ្យដឹងថា៖ ឆ្នាំនេះ ថ្ងៃពុធ ១៥កើត ខែមាឃ ឆ្នាំឆ្លូវ ត្រីស័ក ព.ស.២៥៦៥ ពិធីបុណ្យដង្ហែមាឃបូជា ត្រូវបានប្រារព្ធឡើងវិញ នៅក្នុងក្រុងសៀមរាប បន្ទាប់ពីមានការអាក់ខាន ប៉ុន្មានឆ្នាំកន្លងមក ដោយសារតែវិបត្តិកូវីដ-១៩។ ការរៀបចំពិធីដង្ហែបុណ្យមាឃបូជាឆ្នាំនេះ ត្រូវបានធ្វើឡើងស្របតាមការណែនាំរបស់រដ្ឋបាលខេត្ត និងមានកិច្ចសហការណ៍ផងដែរ ពីសំណាក់មន្ទីរ អង្គភាព ស្ថាប័នពាក់ព័ន្ធ សំខាន់គឺត្រូវបានអនុវត្តតាមគោលការណ៍ណែនាំរបស់រាជរដ្ឋាភិបាល និងក្រសួងសុខាភិបាល លើវិធានសុវត្ថិភាព ដើម្បីទប់ស្កាត់ជំងឺកូវីដ-១៩។
ព្រះតេជគុណ ក៏បានពន្យល់ឲ្យដឹងដែរថា ព្រះសង្ឃ អាចារ្យ គណ:កម្មការ ព្រមទាំងពុទ្ធបរិស័ទចំណុះជើងវត្តទាំងអស់ ដែលបានស្រុះស្រួលមូលមតិគ្នា ប្រារព្ធពិធីបុណ្យមាឃបូជានេះ គឺដើម្បីរំលឹកដល់ព្រឹត្តិការណ៍ធំៗពីរ នាសម័យពុទ្ធកាល គឺ ទី១ ថ្ងៃព្រះសម្មាសម្ពុទ្ធធ្វើចតុរង្គសន្និបាត សំដែងឱវាទបាតិមោក្ខ ទី២គឺថៃ្ងដែលព្រះសម្មាសម្ពុទ្ធដាក់ព្រះជន្មាយុសង្ខារ មុនបរិនិព្វាន ៣ខែ ចំពោះមុខមារ នៅបាវាលចេតិយ ក្បែរក្រុងវេសាលី ហើយក៏ជាថ្ងៃ ដែលព្រះសារីបុត្រ បានសម្រេចជាព្រះអរហន្ត តែងតាំងជាព្រះអគ្គសាវ័កស្តាំ និងព្រះមហាមោគ្គលាន ជាអគ្គសាវ័កឆ្វេង។ អាស្រ័យដោយព្រឹត្តិការណ៍ដ៏អស្ចារ្យមានយ៉ាងដូច្នេះហើយ បានជាព្រះសង្ឃ ពុទ្ធបរស័ទចំណុះជើងវត្ត និងពុទ្ធមាមកជន នឹករលឹក ស្រណោះសង្វេកដល់នាសម័យកាលនោះ ទើបជ្រះថ្លាប្រារព្ធពិធីបុណ្យមាឃបូជានេះឡើង។ នៅវត្តដំណាក់ ក្រុងសៀមរាប ភ្ជាប់តាមប្រពៃណី មានរៀបចំរាប់បាត្រព្រះសង្ឃចំនួន ២៥០អង្គ កាលពីវេលាព្រឹកមុនរៀបចំពិធីដង្ហែនេះ។
ព្រះតេជគុណ ញាណវារោ នៅ ម៉ែន ព្រះសង្ឃគង់នៅវត្តដំណាក់ មានសង្ឃដីកាដែរថាៈ ដូចគ្នា បុណ្យមាឃបូជា ត្រូវបានធ្វើឡើងនៅតាមបណ្តាទីអារាមផ្សេងៗទៀតដែរ ហើយក៏ដូចគ្នាដែរ ពុទ្ធបរិស័ទ ដែលចូលរួមក្នុងកម្មពិធីបុណ្យ មានទម្លាប់រស់នៅតាមបែបគន្លងថ្មី នឹងដឹងច្បាស់ថា ខ្លួនបានទទួលការចាក់វ៉ាក់សាំងតាមតំណាក់កាលទៀងទាត់ ដែលរាជរដ្ឋាភិបាលផ្តល់ឲ្យដោយឥតគិតថ្លៃ និងអនុវត្តបានយ៉ាងខ្ចាប់ខ្ជួនបំផុត នៃវិធានការ ៣ការពារ និង៣កុំ ដែលជាស្មារតីប្រយទ្ធប្រឆាំងជំងឺកូវីដ-១៩ ចាប់ផ្តើមពីមនុស្សម្នាក់ គឺខ្លួនយើង៕
អត្ថបទ និងរូបភាព៖ លោក ងិន គីមឡេង និងលោក យូ វង្ស
កែសម្រួល៖ លោក លីវ សុខុន
