គ្រឹះស្ថានអង្គរ បានចាប់ផ្ដើមលក់សំបុត្រជិះទូក ចូលទ្សនាទស្សនាតំបន់ទេសចរណ៍បឹងទន្លេសាប ស្ថិតនៅចុងឃ្នៀស ក្រុងសៀមរាប ចាប់ពីថ្ងៃជូនដំណឹងនេះតទៅ។ បើយោងតាមសេចក្ដីជូនដំណឹងរបស់គ្រឹះស្ថានអង្គរ បានជម្រាបជូនសាធារណជនជាតិ និងអន្តរជាតិ គ្រប់ប្រតិបត្តិករទេសចរណ៍ ព្រមទាំងភ្ញៀវទេសចរទាំងអស់ថា គ្រឹះស្ថានអង្គរ បានចាប់អនុវត្តការលក់សំបុត្រជិះទូក ទស្សនាតំបន់បឹងទន្លេសាបនៅកំពង់ផែទេសចរណ៍ចុងឃ្លៀសនេះ ចាប់ពីថ្ងៃទី១៥ ខែកុម្ភ: ឆ្នាំ២០២២នេះតទៅ ដែលមានតម្លៃសំបុត្រ ៧ដុល្លារ ក្នុងភ្ញៀវទេសចរមួយនាក់ ដោយគិតពីអាយុចាប់ពី១២ឆ្នាំឡើងទៅ រួមទាំងភ្ញៀវទេសចរជាតិ និងអន្តរជាតិ។ ក្នុងសេចក្ដីជូនដំណឹងបញ្ជាក់ថា ទូកតូចចំណុះ៨នាក់ សំបុត្រ៤ឡើងទៅទើបទូកចេញដំណើរបាន។ ចំពោះទូកចំណុះ៤៥នាក់ សំបុត្រ៩ឡើងទៅ ទើបទូកចេញដំណើរបាន។ សេចក្ដីជូនដំណឹងបានណែនាំឱ្យភ្ញៀវជាតិ អន្តរជាតិ និងគ្រប់ប្រតិបត្តិករទេសចរណ៍ ព្រមសាធារណជនទាំងអស់ចូលរួមអនុវត្តឱ្យបានត្រឹមត្រូវ ចាប់ពីពេលនេះតទៅ។
សូមជម្រាបថា កំពង់ផែចុងឃ្នៀស ស្ថិតនៅក្នុងតំបន់បឹងទន្លេសាប នៃសង្កាត់ចុងឃ្នៀស ក្រុងសៀមរាប។ ការលក់សំបុត្រទូកនេះ ក្រោយពេលរដ្ឋបាលខេត្តសៀមរាប ទទួលការគ្រប់គ្រង និងបានរៀបចំតំបន់ទេសចរណ៍នេះឡើងវិញ បន្ទាប់ពីរាជរដ្ឋាភិបាលកម្ពុជា បានដកហូតពីការវិនិយោគរបស់ក្រុមហ៊ុនឯកជន(ស៊ូ ជីង ) ហើយប្រគល់ឱ្យរដ្ឋបាលខេត្ដ និងគ្រឹះស្ថានអង្គរគ្រប់គ្រង ដើម្បីអភិវឌ្ឍន៍ ថែរក្សាតម្លៃផលប្រយោជន៍ជូនប្រជាពលរដ្ឋ នៅក្នុងតំបន់នេះ។ តំបន់ចុងឃ្នៀសនេះដែរ គឺជាគោលដៅ នៃការអភិវឌ្ឍពហុវិស័យ ដោយមានវិស័យទេសចរណ៍ជាស្នូល ហើយក៏ជាកំពង់ផែដឹកជញ្ជូនផ្លូវទឹក និងជាតំបន់ចែកចាយផលនេសាទទឹកសាបផងដែរ៕
អត្ថបទ និងរូបភាព: លោកបូ សាវី កែសម្រួលដោយ លីវ សុខុន!!!
