នៅព្រឹកថ្ងៃទី២១ ខែកុម្ភៈ ឆ្នាំ២០២២នេះ អ្នកភូមិបង្កោង ឃុំអំពិល ស្រុកប្រាសាទបាគង បានចាប់ផ្តើមកម្មវិធីចាប់ត្រីរួមគ្នា ក្នុងត្រពាំងអភិរក្សមួយកន្លែង សម្រាប់ត្រៀមពិធីឡើងមាឃ ឬឡើងអ្នកតា ដែលអ្នកភូមិបានប្រារព្ធឡើងជារៀងរាល់ឆ្នាំ មិនដែលខកខានឡើយ។
បើតាមលោក ពេជ្រ ឃិន មេភូមិបង្កោង ឃុំអំពិល ស្រុកប្រាសាទបាគង បានឱ្យដឹងថា ដោយសារឆ្នាំ២០២២នេះ ស្ថានភាពទឹកក្នុងត្រពាំងបឹង មានសភាពច្រើន ទើបគណៈកម្មាការសម្រេចកំណត់យកថ្ងៃទី២១ ខែកុម្ភៈនេះ ជាថ្ងៃរួមគ្នាចាប់ត្រី ដើម្បីប្រារព្ធពិធីឡើងមាឃ ឬធ្វើបុណ្យភូមិ តាមទំនៀមទម្លាប់របស់អ្នកស្រុកមិនដែលខកខាន។ ពិធីនេះតែងធ្វើឡើងនៅត្រពាំងបឹង ដែលសហគមន៍បានអភិរក្សទុកមិនឱ្យមានការលួចនេសាទ ក្នុងរយៈពេល ១ឆ្នាំ រហូតដល់មានការណាត់គ្នាពីលោកមេភូមិថាកំណត់ថ្ងៃណាមួយដើម្បីនេសាទ ទើបអ្នកភូមិនាំគ្នាទៅរកត្រីបាន។លោកបន្តថា ប្រជាពលរដ្ឋប្រមាណ ៣៤៧គ្រួសារ រស់នៅក្នុងភូមិបង្កោងនេះ បានមកជួបជុំគ្នាតាំងព្រលឹមស្រាងៗ ដោយមានភ្ជាប់មកជានូវឧបករណ៍ពីបុរាណមាន ឈ្នាង អង្រុត និងសំណាញ់ជាដើម ដើម្បីត្រៀមចុះចាប់ត្រីរួមគ្នា ក្រោយពេលគណៈកម្មាការប្រកាសមេក្រូ និងបាញ់កាំជ្រួចជាសញ្ញា។
លោកមេភូមិបង្កោង បន្តទៀតថា ជាមធ្យមក្នុងមួយឆ្នាំៗ ទិន្នផលត្រីដែលអ្នកភូមិចាប់បាន មិនតិចជាង ១០០គីឡូក្រាម សម្រាប់ធ្វើទឹកសម្លនំបញ្ចុក ប្រគេនដល់ព្រះសង្ឃក្នុងពិធីបុណ្យ ប៉ុន្តែសម្រាប់ឆ្នាំនេះ ទិន្នផលត្រីអាចមានការកើនឡើងជាងរាល់ឆ្នាំ ព្រោះគណៈកម្មាការភូមិ តែងតែរួមគ្នាអភិរក្សទុក មិនឱ្យមានការលួចនេសាទឡើយខុសច្បាប់ឡើយ។
ចំណែកលោក ភ័ក្រ ភ័ណ្ឌ ប្រជាពលរដ្ឋរស់នៅភូមិបង្កោង បានឱ្យដឹងថា ជារៀងរាល់ឆ្នាំ មិនដែលខកខានមួយឆ្នាំណាឡើយ បងប្អូននៅភូមិទាំងអស់ តែងតែប្រារព្ធពិធីចាប់ត្រីរួមគ្នា នៅក្នុងត្រពាំងអភិរក្សនេះ ដោយក្តីសប្បាយរីករាយ ដើម្បីយកត្រីដែលបង់បាន មកធ្វើជាទឹកសម្លរ នំបញ្ចុក និងម្ហូបអាហារផ្សេងៗ ដើម្បីប្រារព្វពិធីបុណ្យភូមិឬពិធីឡើងមាឃរួមគ្នា។ អ្នកភូមិដែលមកនេសាទទាំងអស់ មិនផ្តោតតែលើរកត្រីមួយមុខនោះទេ គឺមកជួបជុំ សប្បាយរីករាយ និងបង្ហាញសាមគ្គីភាពកាន់តែស្និទ្ធស្នាលរវាងប្រជាជននៅក្នុងភូមិថែមទៀតផង។
សូមរំលឹកថា តំបន់រមណីយដ្ឋានអង្គរ ជាតំបន់បេតិកភណ្ឌរស់ដែលសម្បូរទៅដោយមរតកអរូបីជាច្រើន ហើយត្រូវបានអ្នករស់នៅក្នុងតំបន់អង្គរ បន្តប្រតិបត្តិយ៉ាងខ្ជាប់ខ្ជួនរហូតមកដល់បច្ចុប្បន្ន។ ពិធីបុណ្យឡើងមាឃ ឬបុណ្យឡើងអ្នកតា ក៏ជាទំនៀមទម្លាប់ប្រពៃណីមួយក្នុងចំណោមបេតិកភណ្ឌអរូបីជាច្រើន បានប្រតិបត្តិដោយអ្នករស់នៅតំបន់អង្គរ៕
អត្ថបទ និង រូបភាព៖ លោក បូ សាវី
កែសម្រួល៖ លោក អ៊ុន ណារាជ្យ
