ប្រធានសហភាពសហព័ន្ធយុវជនកម្ពុជា កោតសរសើរទឹកចិត្តរបស់ក្រុមការងារសហភាពសហព័ន្ធយុវជនកម្ពុជាទាំងអស់ ដែលបានចូលរួមចំណែកក្នុងការងារប្រយុទ្ធប្រឆាំងជម្ងឺកូវីដ-១៩ ក្នុងស្មារតីទទួលខុសត្រូវ និងរួមសុខរួមទុក្ខជាមួយប្រជាជនគ្រប់កាល:ទេស: !
ឯកឧត្តម ហ៊ុន ម៉ានី ប្រធានគណ:កម្មការទី៧ នៃរដ្ឋសភា និងជាប្រធានគណ:កម្មាធិការសហភាពសហព័ន្ធយុវជនកម្ពុជា មានប្រសាសន៍លើកឡើងយ៉ាងដូច្នេះ នៅក្នុងពិធីប្រកាសទទួលស្គាល់សមាសភាពគណ:កម្មាធិការសហភាពសហព័ន្ធយុវជនកម្ពុជាខេត្តសៀមរាប និងសំណេះសំណាលជាមួយគណ:កម្មាធិការឃុំ សង្កាត់ ក្រុង ស្រុក ខេត្ត ក្នុងរចនាសម្ព័ន្ធសហភាពសហព័ន្ធយុវជនកម្ពុជាខេត្តសៀមរាប នារសៀលថ្ងៃទី២០ ខែកុម្ភ: ឆ្នាំ២០២២។
ឯកឧត្តម បានលើកថា៖ ក្រុមការងារសហភាពសហព័ន្ធយុវជនកម្ពុជា ដែលហៅកាត់ថា ( សសយក ) ទូទាំងប្រទេស បានខិតខំប្រឹងប្រែង ក្នុងសកម្មភាពបំពេញការងារមនុស្សធម៌ ដល់សង្គមជាតិ តាំងតែពីដំណាក់កាលដំបូង នៃការឆ្លងរីករាលដាលជំងឺកូវីដ-១៩ មកម្ល៉េះ ទាំងសមាជិកក្នុងខេត្តសៀមរាបផ្ទាល់ បានចូលរួមយ៉ាងសកម្មនៅតាមមូលដ្ឋាន រួមទាំងការនាំយកអំណោយស្បៀងអាហារទៅចែកជូនដល់ប្រជាពលរដ្ឋខ្វះខាត និងបានអនុវត្តយុទ្ធនាការ បញ្រ្ជាបការយល់ដឹងអំពីគ្រោះថ្នាក់ជំងឺកូវីដ-១៩ ឱ្យយល់ដឹងដល់សហគមន៍ ក្រោមកិច្ចសហការជាមួយអាជ្ញាធរគ្រប់លំដាប់ថ្នាក់ ពិសេសគឺការផ្សព្វផ្សាយអំពីវិធានការណ៍ការពារខ្លួន និងជម្រុញចលនាប្រជាពលរដ្ឋ ទទួលយកការចាក់វ៉ាក់សាំងបង្កាជំងឺកូវីដ-១៩ ចាប់ពីដូសមូលដ្ឋាន រហូតដល់ដូសទី៤ ដែលជានយោបាយយុទ្ធសាស្រ្តរបស់រាជរដ្ឋាភិបាល។ កិច្ចការទាំងនេះ ទោះជាត្រូវប្រឈមមុខនឹងហានិភ័យខ្ពស់យ៉ាងណាក៏ដោយ ប៉ុន្តែសមាជិក សសយក ទាំងអស់ នៅតែមានឆន្ទ: និងស្មារតីទទួលខុសត្រូវខ្ពស់ ដើម្បីរួមសុខរួមទុក្ខជាមួយរាជរដ្ឋាភិបាល និងប្រជាជនគ្រប់កាល:ទេស:។
ឯកឧត្តមបញ្ជាក់ថា៖ យ៉ាងណាក៏ដោយ ( សៀមរាបផ្ទះខ្ញុំ ) គឺជាឆ្អឹងខ្នង នៃយុទ្ធនាការមិនចេះរីស្ងួតរបស់ សសយក-សៀមរាប ដែលស្ថិតនៅជានិច្ចលើសកម្មភាពមនុស្សធម៌ និងសង្គមជាតិ។ ជាមួយគ្នានោះ ប្រធានសហភាពសហព័ន្ធយុវជនកម្ពុជា បានផ្តល់អនុសាសន៍ណែនាំមួយចំនួន ដល់សមាជិក សមាជិកា សសយក ទាំងអស់ថា ក្នុងនាមជាយុវជនជំនាន់ក្រោយ ត្រូវយល់ឲ្យបានច្បាស់អំពីការគោរពសិក្សាបទពិសោធន៍ពីព្រឹទ្ធាចារ្យជារៀមច្បង ដែលអ្វីទាំងនោះគឺសីលធម៌ គុណធម៌ និងប្រពៃណី។ ឯកឧត្តមពន្យល់ថា ការគោរពគ្នាតាមឋានានុក្រម គឺមានតម្លៃចេញមកពីការចាត់តាំង ហើយការគោរពការបញ្ចេញគំនិត គោរពភាពជាអ្នកដឹកនាំ គឺការគោរពចេញមកពីឧត្តមគតិ។
សូមបញ្ជាក់ថា ពិធីនេះក៏មានការអញ្ជើញចូលរួមផងដែរ ពីសំណាក់ឯកឧត្តមបណ្ឌិតអ្នកឧកញ៉ា សៀង ណាំ តំណាងរាស្រ្តមណ្ឌលសៀមរាប, ឯកឧត្តម អ៊ាន ឃុន ប្រធានក្រុមប្រឹក្សាខេត្តសៀមរាប, ឯកឧត្តម ទៀ សីហា អភិបាល នៃគណ:អភិបាលខេត្តសៀមរាប និងជាសមាជិកអចិន្ត្រៃយ៍ នៃគណ:កម្មាធិការសហភាពសហព័ន្ធយុវជនកម្ពុជា ព្រមទាំងវត្តមានឯកឧត្តម លោកជំទាវគណប្រតិភូ នៃគណ:កម្មាធិការសហភាពសហព័ន្ធកម្ពុជា ឯកឧត្តម លោកជំទាវ លោក លោកស្រីជាថ្នាក់ដឹកនាំស្ថាប័ន មន្ទីរ អង្គភាពក្នុងខេត្ត អភិបាល អភិបាលរងក្រុង ស្រុក គណ:កម្មាធិការសហភាពសហព័ន្ធកម្ពុជា ក្រុង ស្រុក សមាជិកសមាជិកាសហភាពសហព័ន្ធកម្ពុជាខេត្តសៀមរាប ប្រមាណជាង ៤០០នាក់៕
អត្ថបទ និងរូបភាព: លោកងិន គឹមឡេង!!! កែសម្រួលដោយ លីវ សុខុន!!!
