យុវសិស្ស ម៉ម សីហារាជ មកពីវិទ្យាល័យ១០ មករា ១៩ ខេត្តសៀមរាប បានឈ្នះជ័យលាភីលេខ៣ ក្នុងការប្រកួតប្រជែងល្បងប្រាជ្ញា យល់ដឹងពីអាស៊ាន ថ្នាក់ជាតិ លើកទី១០ ឆ្នាំ២០២២ នៅទូរទស្សន៍ជាតិកម្ពុជា រាជធានីភ្នំពេញ។
នេះជាលើកទី១ សម្រាប់សិស្សមកពីបណ្តាខេត្ត ដែលទទួលបានជ័យលាភីក្នុងកម្មវិធីនេះ ខណៈដែលឆ្នាំកន្លងទៅ គឺសុទ្ធសឹងតែបេក្ខជនមកពីរាជធានីភ្នំពេញ។
ក្នុងនោះ បេក្ខជនដែលទទួលបានជ័យលាភីផ្សេងទៀតមានដូចជា
-ជ័យលាភីលេខ១ សិស្ស លី ម៉ារី មកពីសាលាវេស្ទើនអន្តរជាតិ
-ជ័យលាភីលេខ២ សិស្ស គឹម ដឺវីប្រូស្ពែរ៍ មកពីសាលាអ៊ីធូស្ទេម អ៊ីឌូខេសិន ព្រះយុគន្ធរ
-ជ័យលាភីលេខ៣ សិស្ស ម៉ម សីហារាជ មកពីវិទ្យាល័យ ១០ មករា ១០៧៩ សៀមរាប។
ដោយឡែកចំណាត់ថ្នាក់លេខ៤ បានទៅលើសិស្ស ញឹម សុវណ្ណធីណា មកពីសាលាអន្តរជាតិ អេសអាយអេស។
សូមបញ្ជាក់ថាជ័យលាភីទាំង៣រូប គឺនឹងតំណាងកម្ពុជា ទៅចូលរួមការប្រកួតប្រជែងល្បងប្រាជ្ញាយល់ដឹងពីអាស៊ានថ្នាក់អន្តរជាតិ លើកទី១០ ឆ្នាំ២០២២ នៅប្រទេសមីយ៉ាន់ ដោយផ្ទាល់ ឬតាមប្រព័ន្ធអនឡាញ នាពេលខាងមុខ។
គួររំលឹកថា នេះជាលើកទី១០ហើយ ដែលទូរទស្សន៍ជាតិកម្ពុជារៀបចំកម្មវិធីការប្រកួតប្រជែងល្បងប្រាជ្ញាយល់ដឹងពីអាស៊ាន ធ្វើឡើងក្នុងគោលបំណង បំផុសស្មារតី បង្កើនការយល់ដឹងអំពីអាស៊ាន ក្នុងចំណោមយុវជន និងផ្សព្វផ្សាយទៅកាន់សាធារណជន តាមរយៈទូរទស្សន៍ជាតិកម្ពុជា។ កម្មវិធីនេះ មានការចូលរួម ពីបេក្ខជន ៣៩នាក់ មកពី៣៩វិទ្យាល័យរដ្ឋនិងឯកជន ដែលស្មើនឹង១៥រាជធានីខេត្ត។ បេក្ខជនទាំងអស់ ត្រូវប្រកួតឆ្លើយសំណួរ ប្រភេទ ពិតឬមិនពិត ពហុចម្លើយ បំពេញចន្លោះជាភាសាអង់គ្លេស និងវគ្គចុចប៊ូតុងឆ្លើយសំណួរ ហើយពួកគេឆ្លងកាត់ការប្រកួតជាច្រើនវគ្គ ដូចជាវគ្គជម្រុះក្នុងពូល វគ្គ១៦នាក់ចុងក្រោយ វគ្គពាក់កណ្តាលផ្តាច់ព្រ័ត្រ និងវគ្គផ្តាច់ព្រ័ត្រ។
សូមបញ្ជាក់ថា សម្រាប់វីដេអូការប្រកួតទាំងស្រុង សូមរង់ចាំពេលវេលានៃការផ្សាយរបស់ទូរទស្សន៍ជាតិកម្ពុជា ឬទស្សនាលើផេកASEAN Quiz Cambodia។
