នៅរសៀលថ្ងៃទី២៣ ខែកុម្ភះ ឆ្នាំ២០២២ម្សិលមិញនេះ លោកស្រី លី វណ្ណៈ ប្រធានការិយាល័យនិយ័តកម្មសុខាភិបាល នៃមន្ទីរសុខាភិបាលខេត្តសៀមរាប បានដឹកនាំមន្រ្តីជំនាញ នៃមន្តទីរសុខាភិបាលខេត្ត ចុះទៅពិនិត្យមើលតាមឱសថស្ថានមួយចំនួនក្នុងក្រុងសៀមរាប អំពីការដាក់លក់ថ្នាំព្យាបាលជំងឺកូវិដ-១៩ ដែលគ្មានលេខបញ្ជិកាពីក្រសួងសុខាភិបាល ជាពិសេសថ្នាំ Molnupiravir ដែលក្រសួងសុខាភិបាល បានប្រកាសហាមឃាត់ការចែកចាយ និងលក់ ព្រោះថ្នាំនេះពុំមានលេខទិដ្ឋាការ ឬបញ្ជីកាពីក្រសួងសុខាភិបាល។
លោកស្រី លី វណ្ណៈ បានឱ្យដឹងថា បន្ទាប់ពីក្រុមការងារបានចុះពិនិត្យទៅតាមឱសថស្ថានមួយចំនួនធំរួចមក ឃើញថា មានឱសថស្ថានមួយចំនួនតូចប៉ុណ្ណោះ ដែលបានលក់ថ្នាំព្យាបាលជំងឺកូវិដ-១៩ ប៉ុន្តែថ្នាំទាំងនោះ សុទ្ធតែមានលេខបញ្ជីការពីក្រសួងសុខាភិបាលត្រឹមត្រូវ ហើយមន្រ្តីជំនាញមិនទាន់រកឃើញការលក់ថ្នាំ ដែលគ្មានបញ្ជីកាពីក្រសួងសុខាភិបាលនៅក្នុងក្រុងសៀមរាបនោះទេ។
ជាមួយគ្នានោះដែរក្រុមការងារបានណែនាំឱ្យម្ចាស់ឱសថស្ថានទាំងអស់ត្រូវគោរពទៅតាមការណែនាំរបស់ក្រសួងសុខាភិបាល ហាមដាច់ខាតការលក់ថ្នាំ ដែលគ្មានបញ្ជីកាពីក្រសួងសុខាភិបាល ហើយសម្រាប់ឱសថស្ថានណាដែលបានលក់ថ្នាំព្យាបាលជំងឺកូវីដ-១៩ ដែលមានបញ្ជីកាត្រឹមត្រូវពីក្រសួងសុខាភិបាលហើយនោះ ត្រូវលក់ក្នុងតំម្លៃសមរម្យកុំតំម្លើងថ្លៃហួសហេតុដែល ធ្វើឱ្យអ្នកប្រើប្រាស់មិនអាចទទួលយកបាន។
សូមបញ្ជាក់ថា ក្រសួងសុខាភិបាល បានជូនព័ត៌មានដល់បងប្អូនប្រជាពលរដ្ឋទាំងអស់ឈប់ទិញ និងប្រើប្រាស់ឱសថ Molnupiravir ដែលគ្មានលេខទិដ្ឋាការ ឬបញ្ចិកាខាងលើជាបន្តទៀត ពីព្រោះឱសថទាំងនេះមិនអាចធានាបាននូវ ប្រសិទ្ធភាព គុណភាព និងសុវត្ថិភាពបានឡើយ ហើយអាចជាឱសថក្លែងក្លាយបណ្តាលឱ្យប៉ះពាល់សុខភាព ឬមាន គ្រោះថ្នាក់ដល់អាយុជីវិតរបស់អ្នកប្រើប្រាស់ទៀតផង។ ក្នុងនោះក្រសួងសុខាភិបាលនឹងមានវិធានការតឹងរ៉ឹងទៅតាមផ្លូវច្បាប់ចំពោះជនណាចែកចាយ និងផ្សព្វផ្សាយលក់ ឱសថគ្មានលេខបញ្ចិកាខាងលើ និងជនពាក់ព័ន្ធដទៃទៀតដែលនាំចូល ចែកចាយ និងផ្សព្វផ្សាយលក់ ឱសថដែលគ្មាន លេខទិដ្ឋាការ ឬបច្ឆិកាខាងលើ ទៅតាមច្បាប់ស្តីពីវិសោធនកម្មច្បាប់ស្តីពីការគ្រប់គ្រងឱសថជាធរមាន៕
អត្ថបទ និងរូបភាព៖ លោក ទ្រា ពន្លឺ
កែសម្រួល៖ លោក អ៊ុន ណារាជ្យ
